Hoahy o Romanao

8 Tsy hahazo fagnamelohagne areke ze tafaharo raike amy i Kristy Jesosy. 2 Ty anto’e, i lalà ty fagnahy magnomey havelogne ze tafaharo raike amy i Kristy Jesosỳ ro nagnafake azo amy ty lalà ty ota naho ty fate. 3 Nisy raha tsy nivita i Lalànay, satria naleme reke noho i nofotsey. Faie ze raha tsy nivita’e zay, le nataon’Agnahare naho fa nagnirake i Ana-dahi’ey reke, le nampanahafe’e o nofotse mpanotao mba hagnafoagnagne i otay naho hagnamelohagne i ota amy ty nofotse aoy. 4 Amy izay tika hagnatanterake ty fitsipike maregne take i Lalànay, le tsy handeha arake ty nofotse fa handeha arake ty fagnahy. 5 Ty anto’e, ze magnatanterake ty fagniria ty nofotse, le mampifantoke ty sai’e amy ty raha miomba ty nofotse. Fa ze magneke hotarihe ty fagnahy, le mampifantoke ty sai’e amy ty raha miomba ty fagnahy. 6 Ty fampifantohagne ty saigne amy ty nofotse, le mitarike mbamy i fatey mbeo. Fa ty fampifantohagne ty saigne amy ty fagnahy, le mitarike mbamy i havelogney mbeo naho mbamy i fiadagnagney mbeo. 7 Ty anto’e, ze mampifantoke ty sai’e amo o nofotseo, le hanjare ho fahavalon’Agnahare, satria tsy mankatò ty lalàn’Agnahare o nofotseo, sady tsy ombia hahavita izay naho ty maregne. 8 Ze miaigne mifagnarake amy ty fagniria ty nofotse areke, le tsy mahavita mampifale an’Agnahare.

9 Faie tsy miaigne mifagnarake amy ty fagniria ty nofotse nareo ry rahalahy, naho agnate’areo ao vata’e i fagnahin’Agnaharey, satria hitarike anareo i fagnahỳ. Ze tsy managne ty fagnahy i Kristy, le tsy ahy i Kristy. 10 Faie naho tafaharo raike amy i Kristy nareo, ndra tie mate aza nareo satria mpanota, le hovelogne satria nambara ho maregne noho i fagnahỳ. 11 Naho agnate’areo ao i fagnahy i namelogne i Jesosy tamy ty matey, le i namelogne i Kristy Jesosy tamy ty matey ka ro hamelogne i vata’areo mete matey, amy ty alala i fagnahi’e agnate’areo aoy.

12 Izao areke ry rahalahy, managne adidy tika, faie tsy amo o nofotseo, mba tsy hahavy antika hiaigne mifagnarake amo o nofotseo. 13 Ty anto’e, naho miaigne mifagnarake amy ty nofotse nareo, le tsy maintsy homate. Fa naho enga’areo hamono o asa ty nofotseo i fagnahỳ, le hovelogne nareo. 14 Fa ze magneke hotarihe ty fagnahin’Andrianagnahare ro tena anan’Agnahare vata’e. 15 Ty anto’e, i fagnahy niazo’areoy le tsy mahavy anareo hondevo naho hatahotse indraike, fa mahavy anareo hatsangan’Agnahare ho ana’e. O fagnahy iohoe areke ty mahavy antika hitoka mafe tie: “Abba, Rae!” 16 I fagnahỳ naho ty saintikagne ty vavolombelogne fa anan’Agnahare tika. 17 Naho toe anake vata’e areke tika, le mpandova an’Andrianagnahare sady mpiharo lova amy i Kristy. Faie tsy maintsy mijale miarake ama’e tika, amy izay homeagne voninahitse miarake ama’e ka.

18 Naho ty amako, le tsy misy dika’e ty fijaleagne iaretantikagne amy izao naho ampitahaegne amy i voninahitse habaribary amantikagney. 19 Tena fa tsy ligne o raha finorogneo ty hampibaribariagne i anan’Andrianagnahare rey. 20 Ty anto’e, nengagne hanagne fiaignagne tsy misy dika’e o raha finorogneo, faie tsy noho ty sitrapo iareo, fa noho ty zoton’arofo i nagnenga ze raha zay hisehoy. Faie ndra tie eo zay, le mbe misy fanantenagne avao. 21 Hafahagne tsy hondevo ty halò o raha finorogneo, le hanagne ty fahafahagne miambake* anagna o anan’Andrianagnahareo. 22 Haintika fa miarake mitaraigne naho miarake mijale o raha finorogneo iaby hatrake amy izao. 23 Faie tsy izay avao, fa ndra itikagne managne i lohavogney ndra i fagnahỳ, le mitaraigne agnatentikagne ao, amparake ty andignisantika i fananganagne antika ho anakey. Amy ze fotoagne zay tika ro hovotsoragne amy ty vatantikagne toy amy ty alala i solovoigney. 24 Naho fa navotagne tika, le nanjare nanagne ze fanantenagne zay. Faie tsy hotamaegne ty raha raike naho fa trea maso. Sa misy ndaty vao mbe hitama ty raha raike fa trea’e maso? 25 Fa naho itika mitama ty raha mbe tsy treantika, le mandigne mafe izay avao tika sady miaretse.

26 Hoe izay ka, fa magnampe antika amy ty fahalemeantikagne i fagnahỳ. Ty anto’e, izao ty olagne: Haintika tie mila mivavake tika faie tsy haintika tie inogne ty raha hangatahentikagne. I fagnahỳ, le afake mihalale ho antika amy itika mitaraigne sady tsy haintika ty raha horehafegney. 27 Faie ony i Andrianagnahare mpandineke ty fo oy ty raha rehafe i fagnahỳ, satria mifagnarake amy ty zoton’arofo’e ty raha ihalalea’e hoahy o ndaty masigneo.

28 Haintika fa ze kila raha ataon’Andrianagnahare, le atao’e miara-miasa mba hahasoa ze tea aze. Tsy ia zay, fa ze jinobo’e mifagnarake amy ty fikasa’e. 29 Ty anto’e, fa nioni’e mialoha tie ia ty hojobogne’e sady tinendre mialoha hanahake i Ana’ey iareo, amy izay reke ty ho tale ty rahalahy maro. 30 Ankoatse izay, nikanjie’e i nijobogne’e mialoha rey. Nambara’e ho maregne ka i nikanjie’e rey. Tamy ty fara’e, le nimea’e voninahitse i nambara’e ho maregne rey.

31 Ino areke ty horehafentika miomba o raha rehoe? Naho manohagne antika ty Andrianagnahare, ia ty hahavita hanohetse antika? 32 I Ana’ey aza tsy narova’e fa nenga’e hovonoegne mba hagnavotagne antika, le tsy homea’e antikagne ka vao ze raha hafa ilaentika? Tena hanao izay aman-kasoa fagnahy reke. 33 Ia ty afake magnaratiraty ze fa jinobon’Andrianagnahare? I Andrianagnahare aza fa magnambara iareo ho maregne. 34 Ia ty hagnameloke iareo? Tsy misy. I Kristy Jesosy, le nimate faie nivelomegne tamy ty mate. Faie tsy nivelomegne tamy ty mate avao reke, fa ankavanan’Andrianagnahare eo sady mihalale ho antikagne.

35 Inogne ty raha hahavita hampisarake antika amy ty hatea i Kristy? Haoreagne vao, sa raha sarotse, sa fagnenjehagne, sa hakerégne, sa fiboridagnagne, sa loza sa mesa? 36 Fa voasoratse tie: “Vonoegne isan’andro zahay noho ty ama’o; manahake o agnondry hovonoegneo ty fiheveragne anay.” 37 Faie vitantikagne ty mandrese o raha rehoe iaby, satria magnomey hery antika i tea antikagney. 38 Fa matoky raho, fa ndra fate, ndra fiaignagne, ndra anjely, ndra fanjakagne, ndra raha amy izao, ndra raha amy ty hoavy, ndra hery, 39 ndra ty ambone, ndra ty ambane, ndra raha finorogne hafa, le tsy hahavita hampisarake antika amy ty hatean’Andrianagnahare. Naseho’e tamy ty alala i Kristy Jesosy Tompontikagne ze hatea’e antikagne zay.