Hoahy o Romanao
16 Teako hampahafantaregne anareo ty Foiby rahavaventikagne. Mpanompo amy ty fiangona i Kenkrea ao reke. 2 Mangatake anareo raho mba handrambe aze manahake ty andrambesagne o ndaty masigneo, satria mpiharo finoagne amantika amy i Tompo ao reke. Mba omeo’areo aze ze raha paliae’e. Ty anto’e, maro ty ndaty narova’e, agnisa izay raho.
3 Mampamangy i Priska naho i Akoila mpiara-miasa amako amy i Kristy Jesosy ao. 4 Nahafoe ty fiai’e ho ahy iareo mirovaly, le tsy iraho avao ty misaotse iareo fa ty fiangonagne iaby boake amo o firenena hafao ka. 5 Mampamangy ka amy i fiangonagne mivory an-tragno iareo aoy. Mampamangy i Epaineto teako, i lohavoa hoahy i Kristy boake amy ty faritse Aziay. 6 Mampamangy i Maria, i miasa mafe ho anareoy. 7 Mampamangy i Androniko naho i Jonia, i longoko sady niara-nigadra amako rey. Fanta o apostolio soa o lahilahy rehoe sady fa nitafaharo raike amy i Kristy talohako.
8 Mampamangy i Ampliato teako mpanonjohy ty lia i Tompo. 9 Mampamangy i Orbano mpiara-miasa amantika amy i Kristy ao naho i Staky teako. 10 Mampamangy i Apela, i ankasitraha i Kristỳ. Mampamangy ze an-tragno i Aristobolo ao. 11 Mampamangy i Herodiona longoko. Mampamangy ze an-tragno i Narsisy ao, i mpanonjohy ty lia i Tompoy. 12 Mampamangy i Trifena naho i Trifosa, i ampela miasa mafe amy i Tompo ao rey. Mampamangy i Persy, i rahavave teantikagney, satria reke miasa mafe amy i Tompo ao. 13 Mampamangy i Rofosy, i jinobo i Tompoy, le mampamangy ka amy i rene’e sady renekoy agne. 14 Mampamangy i Asinkrito, i Flegona, i Hermesy, i Patroba, i Herma, naho ty rahalahy miarake amy iareo. 15 Mampamangy i Filologo, i Jolia, i Nerea naho i rahavave’ey, i Olimpa, naho ty ndaty masigne iaby miarake amy iareo. 16 Mifanalamà amy ty oroke masigne. Mampamangy anareo ty fiangona i Kristy iaby.
17 Mandrisike anareo raho ry rahalahy mba hagnaramaso ze mampisy fisaratsarahagne naho ze mahavy ty hafa hiala amy ty finoa’e, satria mifanohetse amy ty fampianaragne nampianaregne anareo ty raha atao iareo. Ihalaviro’areo ze ndaty rezay. 18 Tsy mpanompo i Kristy Tompontikagney ty ndaty hoe izay, fa mpanompo ty tro iareo. Manao rehake mandangolango naho mandroboke iareo mba hamitahagne ty fo o ndaty tsy marikari-drahao. 19 Fa voamare ty ndaty iaby fa mankatò nareo, le tena mahafale ahy zay. Teako hahilala amy ty fanoagne ty soa nareo faie tsy hanan-tsiny amy ty raty. 20 Tsy ho ela i Andrianagnahare magnomey fiadagnagney, le handemondemoke i Satana ambane tombo’areo eo. Lonike abey ty Jesosy Tompontikagne mba haneho hasoa fagnahy miambake ama’areo!
21 Mampamangy anareo ty Timoty mpiara-miasa amako, naho i Losio, i Jasona vaho i Sosipatro, i longoko rey.
22 Iraho Tertio nampanorategne ty taratasy toy, le mampamangy anareo mpanonjohy ty lia i Tompo.
23 Mampamangy anareo ty Gaio. Niambahiny ama’e ao raho naho ty fiangonagne iaby. Mampamangy anareo ty Erasto mpitam-bola i tanàgney naho i Koarto rahalahi’e. 24 ——
25 Afake magnatanjake anareo ty Andrianagnahare amy ty alala i talily soa ambarakoy naho ty fitoriagne miomba i Jesosy Kristy. O talily soa iohoe, le mifandrambe amy ty fampibaribariagne i raha mietake masigne naetake tagnate ty taogne maroy. 26 Faie fa nabaribary io hinane zao sady fa nampahafantaregne o firenenao iaby tamy ty alala ty faminania ty Soratse Masigne, arake ty lily i Andrianagnahare nainai’ey, mba hahavy iareo hankatò naho hino. 27 Hoahy i Andrianagnahare fara izay ty mahilalay abey ty voninahitse nainai’e amy ty alala i Jesosy Kristy! Amena.