Taratasy Faharoe Hoahy o Korintianao

3 Mila mampahafantatse ty tegna’ay indraike vao zahay? Sa zahay mipay taratasy fampahafantaragne boake ama’areo, ndra mila magnomey taratasy fampahafantaragne anareo, manahake ty atao ty ndaty ila’e? 2 Inareo ty taratasi’ay voasoratse am-po’ay ao, sady fanta ze kila ndaty naho vakie iareo. 3 Mibaribary fa taratasy i Kristy nareo, le izahay mpanompon’Agnahare ty nanoratse aze. Tsy nisorategne tamy ty rano mainte, fa nisorategne tamy ty fagnahy i Andrianagnahare velogney. Le tsy nisorategne tamy ty vato pisake ka, fa nisorategne am-po ao.

4 Tena tsy misalasala zahay mirehake izay agnatrehan’Agnahare eo, noho ty amy i Kristy. 5 Faie tsy noho ty ama’ay ro mahavy anay mahay o asa iohoe, fa noho ty fagnampean’Andrianagnahare anay. 6 Ireke ro mahavy anay ho ampe fahaiagne mba ho mpanompo i fifagnekeagne vaovaoy. Tsy mpanompo i Lalàna voasoratsey, fa mpanompo i fagnahỳ. Ty anto’e, i Lalàna voasoratsey mamono, fa i fagnahỳ mamelogne.

7 I Lalàna minday mbamo o fateo mbeoy, i nisorategne tamy ty vatoy, le nimeagne tamam-boninahitse. Tsy nivita o Israelitao ty nagnente ty tarehe i Mosesy noho i voninahitse namilepiletse tamy ty tarehe’ey, ie amy izao ze voninahitse zay tsy maintsy hofoagne avao. 8 Tsy toko’e ho ambone izay vao ty voninahitse homeagne i fagnahỳ? 9 Naho nibey voninahitse i Lalàna minday fagnamelohagney, le tsy handikoatse izay vao ty voninahy i mahavy o ndatio ho maregney? 10 Ndra tie nibey voninahitse aza i Lalàna voasoratsey, le nafahagne tama’e ze voninahitse zay, satria soa mandikoatse aze ty voninahy i fifagnekeagne vaovaoy. 11 Naho nimeagne voninahitse i raike hofoagney, tsy toko’e handikoatse izay vao ty voninahy i raike haharetsey?

12 Satria zahay managne ze fanantenagne zay, le manjare mahavany mirehake amy ty hafa,* 13 sady tsy manao ty raha natao i Mosesy. Nitakona’e lamba zao i tarehe’ey, amy izay tsy hotrea o Israelitao ty hiafarà i raike tsy maintsy hofoagnagney. 14 Faie tsy nahataka-draha iareo. Hatrake amy izao, le mbe manakogne ty say iareo avao o lamba iohoe, naho fa vakiegne i fifagnekeagne talohay, satria amy ty alala i Kristy avao ty agnafahagne aze. 15 Naho fa vakiegne ty raha nisorate i Mosesy amy izao, le mbe manakogne ty fo iareo avao i lambay. 16 Faie naho fa misy ndaty miheregne amy i Jehovah, le afahagne i lambay. 17 Fagnahy ty Jehovah, le ze misy ty fagnahy i Jehovah, misy fahafahagne. 18 Itika iaby, le manahake ty fitaratse magnomey taratse ty voninahy i Jehovah, satria fa nafahagne tamy i tarehentikagney ey i lamba manakogney. Hovagne hitovy vintagne aman’Agnahare tikagne, sady vao mainke hagnomey taratse ty voninahi’e tsikedetsikede. Ze fiovagne zay, le hifagnarake tanterake amy ze anoa i Jehovah aze, i Fagnahỳ.