Taratasy Faharoe Hoahy o Korintianao
4 Tsy kivy areke zahay, satria managne ze fanompoagne nankinegne tama’ay zay, noho ty famindram-po naseho tama’ay. 2 Faie niliere’ay ty raha mahamegnatse aetaketake, sady tsy manao raha aman-kafetseagne zahay, ro tsy manao raha hampatsatso* ty saontsin’Agnahare, fa i hamaregnagney ro abaribari’ay. Ty fanoa’ay izay, le hahavy ty feo ty fieretsereta ty ndaty iaby hagneke, fa ohatse soa zahay agnatrehan’Agnahare eo. 3 Naho takogne i talily soa torie’aỳ, le amy ze hozamagne reke ro takogne. 4 Tsy ia zay fa o tsy mpinò, o nigoà i andrianagnahare ty tontolo toy ty sai’eo, amy izay tsy hamilepiletse amy iareo ty voninahy i talily soa miomba i Kristỳ, i vintan’Agnaharey. 5 Tsy mitory miomba ty vata’ay zahay, fa miomba i Jesosy Kristy, le tihoe ireke ro Tompo. Rehafe’ay ka tie mpanompo’areo zahay noho ty amy i Jesosy. 6 Le ty vatategnan’Agnahare ro nisaontsy tie: “Hamilepiletse amy i iegney ao i fahazavagney.” Namilepiletse tam-po’ay ao ty Andrianagnahare mba hagnazava amy iareo i fahalalagne bey voninahitse miomba azey, amy ty alala ty tarehe i Kristy.
7 Faie managne ze harena zay zahay, ndra tie manahake o fanake vita amy ty tane lietseo aza. Trea areke tie boake aman’Andrianagnahare, fa tsy boake ama’ay, i hery mihoatse ty ahy o ndatio niazo’aỳ. 8 Fejagnegne amy ty lafi’e iaby zahay, faie mbe afake mihetseke avao. Lany ty hai’ay, faie mbe misy lalagne hombagne avao.* 9 Enjehegne zahay, faie tsy afoe. Atonta zahay, faie tsy mate. 10 Miaretse loza mahafate lognandro manahake ty natrehe i Jesosy zahay, amy izay hotrea mibaribary tie manahake ty raha niaigna i Jesosy ty iaigna’ay. 11 Velogne zahay, faie oharam-pate lognandro noho ty amy i Jesosy, amy izay mibaribary amy i nofo’ay mete matey ty fiaigna i Jesosy. 12 I fatey areke ty miasa agnate’ay ao, fa i havelogney ty miasa agnate’areo ao.
13 Voasoratse tie: “Mirehake raho satria manam-pinoagne.” Le hoe izay ka, fa noho izahay manam-pinoagne* ro mahavy anay mirehake. 14 Ty anto’e, hai’ay fa i namelogne i Jesosy tamy ty matey, le hamelogne anay ka mba hiarake amy i Jesosy sady hampiseho anay agnatreha’e eo miarake ama’areo. 15 Miaretse o raha rehoe zahay noho ty ama’areo, amy izay vao mainke mitombo ty hasoa fagnahy miambake asehon’Agnahare. Satria naho fa mitombo io, le maro ty hisaotse an’Agnahare mba ho fagnomeagne voninahitse aze.
16 Tsy kivy areke tikagne, satria ndra tie mihaosa aza ty vatantikagne, le havaozegne lognandro ty agnate’ay ao. 17 Fa ndra tie mihelagne naho maivagne avao aza ty haoreagne iaretantikagne, le hinday voninahitse lahibey tsy misy hoe’e ho antika zay sady haharetse nainai’e. 18 Mila mampifantoke avao ty masontikagne amy ty raha tsy trea areke tika, fa tsy amy ty raha trea. Satria ty raha trea, le mandriogne avao, fa ty raha tsy trea maharetse nainai’e.