Taratasy Faharoe Hoahy o Korintianao
5 Haintika tie, naho fa horotsahegne ty tragnolay toy, ndra ty tragnontika an-tane etoy toy, le hanagne tragno boake aman’Agnahare tikagne. Tsy namboaregne tagnagne o tragno iohoe sady maharetse nainai’e an-dagnitse agne. 2 Le vata’e mitaraigne tikagne amy ty tragno toy ato sady magniry mafe ty hiakanjo i raike boake an-dagnitse agney. 3 Amy izay naho fa iakanjoantikagne io, le tsy hotrea tie miboridagne tikagne. 4 Naho ty maregne, le tena mitaraigne tika agnate ty tragnolay toy ato, sady mivali-doha ka, satria tsy te hagnafake itoy tika, faie te hagnisy i raikey ka, amy izay i mete matey, hatele i havelogney. 5 Ty vatategnan’Agnahare ty nagnomagne ze raha zay ho antika, sady ireke ka ty nagnomey fagnahy masigne antika, mba ho antoke amy i raha ho avỳ.
6 Bey herim-po lognandro areke tikagne, sady mahay ka fa naho mbe amantikagne avao ty vatan’olombelogne mete mate toy, le lavitse i Tompo tikagne, 7 satria tikagne mandeha am-pinoagne, fa tsy mandeha amy ty raha trea maso. 8 Faie bey herim-po tika sady ndra aleo tikagne lavitse ty vatagne toy, amy izay hiharo toboke amy i Tompo. 9 Faie ndra miaigne miarake ama’e tikagne, ndra lavitse aze, le ataontikagne tanjogne ty ho ankasitraha’e. 10 Tsy maintsy hiseho agnatreha i seza fitsarà i Kristỳ eo tikagne iaby, amy izay ty tsikiraidraike hovaleagne arakarake ty raha natao’e tamy ireke mbe ni-ndatỳ, ndra soa ty raha natao’e, ndra raty.
11 Satria areke fa hai’ay tihoe matahotse i Tompo, le mandrese lahatse o ndatio lognandro zahay mba hino, fa izahay fa hain’Agnahare soa. Faie mitama ka raho, fa hahafantatse soa anay ty feo ty fieretsereta’areo. 12 Mirehake izay zahay, tsy tihoe mba hampahafantaragne anareo indraike ty miomba anay, fa mba hahavy anareo hirehareha miomba anay, amy izay hohai’areo ty hamale o ndaty mirehareha amy ty raha ivela’e etoio, fa tsy amy ty raha am-po aò. 13 Naho minegne zahay, le an’Agnahare, fa naho misaigne soa, le anareo. 14 Ty anto’e, ty hatea i Kristy ro manere anay, satria izao ty raha nanjare nitaka’ay: Nimate hoahy ty ndaty iaby o lahilahy raike iohoe. Fa mate iaby areke iareo, naho ty maregne. 15 Nimate hoahy ty ndaty iaby reke, amy izay ze velogne, le tsy velogne hoahy ty vata’e sasa, fa mba hovelogne hoahy i nimate hoahy iareoy naho i nivelomegne tamy ty matey.
16 Manomboke amy izao areke, le tsy arake ty fomba fiheve o ndatio sasa ty fagnentea’ay o ndatio. Ndra tie nahay i Kristy arake ty fomba fiheve o ndatio aza zahay tie taloha, le tsy hoe izay sasa ty fahafantara’ay aze amy izao. 17 Naho misy ndaty areke tafaharo amy i Kristy, le raha finorogne vaovao reke. Fa tsy eo ty raha taloha, fa raha vaovao ka ty eo. 18 Faie boake aman’Agnahare ze kila raha, le nampilongoe’e tama’e tamy ty alala i Kristy zahay, sady nimea’e anay i fanompoagne fampilongoagney. 19 Ty teagne horehafegne le tihoe, nampilongoen’Agnahare tama’e tamy ty alala i Kristy ty tontolo toy, le tsy nisahe’e ty fahadisoa iareo. Nankine’e tama’ay ty fitoriagne ze hafatse fampilongoagne zay.
20 Ambasadera solontegna i Kristy areke zahay, le hoe amy ty alala’ay ty Andrianagnahare ro mihalale. Amy ty maha solontegna i Kristy anay ro mahavy anay mihalale tihoe: “Mba milongoa aman’Andrianagnahare nareo.” 21 I mbe lia’e naho nanotay, le nataon’Andrianagnahare sorogne noho ty fahotantikagne, amy izay amy ty alala’e ro hahavy antikagne ho maregne agnatrehan’Agnahare eo.