Taratasy Faharoe Hoahy o Korintianao

6 Miara-miasa aman’Andrianagnahare zahay, le mandrisike anareo ka, tsy tihoe mba hagneke i hasoa fagnahy miambake aseho’ey, ie naho fa avy eo, tsy manao raha mifagnarake amy ty anto’e nagnomeagne aze. 2 Ty anto’e, izao ty saontsie’e: “Nitsanogne azo raho tamy i fotoagne fankasitrahagney, le nagnampe azo ka raho tamy i andro fagnavotagney.” Amy izao i fotoagne fankasitrahagney, le amy izao ka i andro fagnavotagney.

3 Tsy manao raha va’e hahavy ty hafa ho boseke ama’ay zahay, amy izay tsy hisy tsiko’e ty fanompoa’ay. 4 Faie atoro’ay amy ze kila raha fa mpanompon’Agnahare zahay. Niaretse raha maro zahay: Haoreagne, tsy fisiagne, raha sarotse, 5 jera, hagadragne, niatreke vahoake romotse, niasa mafe, nisy fotoagne tsy niroro halegne naho nikeré. 6 Malio findesam-batagne ka zahay, miaigne mifagnarake amy ty fahalalagne, manam-paharetagne, soa fagnahy, magneke hotarihe i fagnahy masigney, tsy manao soa miatreke naho fa maneho hatea, 7 mirehake ty maregne, miantehetse amy ty herin’Agnahare, mitagne i fitaovam-pialia ty hamaregnagney amy ty tagnagne havana naho havia, 8 nimeagne voninahitse naho nafahagne baraka, niharatiratiegne naho nideraegne, heveregne ho mpamitake zahay ie amy izao zahay mirehake ty maregne, 9 heveregne ho tsy fantatse faie fantatse avao zahay, hoe mate* faie velogne, nisazeagne* faie tsy natolotse mba hovonoegne, 10 hoe malahelo faie fale lognandro, hoe mahantra faie mampanan-karena ndaty maro, hoe tsy manan-draha faie tape-draha iriegne.

11 Tsy nisalasala zahay ty nirehake tama’areo* ry Korintiana, sady nisokafe’ay bey ty fo’ay. 12 Tsy nasia’ay fetra’e* ty hatea’ay anareo, fa inareo ro nagnisy fetra’e ty hatea’areo anay. 13 Mba manoa manahake anay ka areke nareo, le sokafo’areo bey ty fo’areo. Sahala hoe mirehake amy ty anako raho mirehake ama’areò.

14 Ao nareo tsy hiharo baogne amo o tsy mpinò. Ino moa ty ifandrambesa o hamaregnagneo amo o fandikan-dalànao? Ino ty iharoa ty mazava naho ty maiegne? 15 Ino ka ty ifagnaraha i Kristy amy i Beliala? Ino ty iharoa ty mpino naho ty tsy mpino? 16 Ino ty ifandrambesa ty tempolin’Agnahare amo o sampio? Tempoly i Andrianagnahare velogney tikagne, arake i nisaontsien’Agnahare tihoey tie: “Hiarake hipetrake amy iareo eo raho, sady handeha hiarake amy iareo. Ho Andrianagnahare iareo ka raho, le iareo ho vahoako.” 17 “‘Miboaha boake amy iareo ao areke nareo, le misaraha amy iareo’, hoe ty Jehovah. ‘Ko mikasikasike ze raha maloto ka’”, “‘le handrambe anareo raho.’” 18 “‘Sady hanjare ho Rae’areo raho, le inareo ho ana-dahiko naho ho anak’ampelako’, hoe ty Jehovah, i Mahery Fara Tampo’ey.”