Taratasy Faharoe Hoahy o Korintianao

7 Satria nahazo o fampitamagne rehoe tikagne ry ragnetse teako, le andao tika hagnalio ty vatantikagne amy ze raha mandoto ty nofotse naho ty saigne, amy izay tika vao mainke ho masigne tanterake naho hatahotse an’Agnahare.

2 Mba omeo’areo toeragne am-po’areo ao zahay. Tsy nanao raty tama o ndaty zahay, tsy nanimba fiaigna o ndaty, sady tsy nagnararaotse ndaty ka. 3 Tsy ty hagnameloke anareo ty nirehafako izay. Fa nirehafeko taloha teo tie, am-po’ay ao avao nareo, ndra mate zahay, ndra velogne. 4 Tsy misalasala raho mirehake ama’areò. Tena mirehareha miomba anareo raho. Nahazo fampionognagne bey raho. Tena fale raho, ndra tie eo aza o haoreagne maro atrehe’aio.

5 Naho fa niavy ta Makedonia teto zahay, le tsy nilamigne ty fiaigna’ay, satria lava niatreke raha sarotse avao. Teo ty aly ivela’e ey, le eo ka ty tahotse agnate’e ao. 6 Faie nampionogne anay ty Andrianagnahare, i mampionogne ze kivỳ. Nampionogne anay ty naha teo i Titosy. 7 Tsy ty naha teo aze avao ro nahazoa’ay fampionognagne, fa noho ty fampionognagne niazo’e tama’areo ka. Ty anto’e, nanao tatetse tama’ay reke tie, magniry mafe hahatrea ahy nareo, le tena malahelo sady minekoneko mafe miomba ahy ka. Vao mainke nampitombo ty hafaleako zay.

8 Ndra tie nampalahelo anareo aza raho tamy i taratasikoy, le tsy manegnegne. Fa ndra tie nanegnegne aza raho tamy ty voaloha’e (satria nihaiko tie nampalahelo anareo i taratasikoy, faie tsy naharetse zay), 9 le fale raho amy izao, satria tsy tihoe nalahelo avao nareo, fa nahavy anareo hibebake ka i alahelo’areoy. Ty anto’e, nalahelo arake ty zoton’arofon’Agnahare nareo, le izay ty nahavy ty raha nirehafe’ay tsy nisy voka’e raty tama’areo. 10 Mitarike amy ty fibebahagne naho amy ty fagnavotagne ty alahelo arake ty zoton’aforon’Agnahare, sady tsy anegnenagne zay. Fa ty alahelo arake ty tontolo toy mitarike mbamy i fatey mbeo. 11 Tena nisy voka’e soa tama’areo, i alahelo arake ty zoton’aforon’Agnaharey, satria nahavy anareo hikezake mafe mba halio, ho boseke amy ty vata’areo, hatahotse an’Agnahare, hagniry mafe hiova, hafana fo, naho hagnitsy ze tsy mete. Natoro’areo fa mete ty natao’areo tamy i olagne ignehoe. 12 Ndra tie nanoratse tama’areo aza raho, le tsy nanao izay hoahy i ndaty nanao ratỳ, ndra i nanoagne ratỳ, fa mba hibaribary agnatrehan’Agnahare eo tie, mazoto mitsanogne anay nareo. 13 Nampionogne anay zay.

Faie tsy tihoe nahazo fampionognagne avao zahay, fa vao mainke nahafale anay ka ty hafalea i Titosy, satria namelombelogne aze nareo iaby. 14 Tsy nahamegnatse ahy ty nirehareha tama’e ty miomba anareo. Maregne ze raha nirehafe’ay tama’areo, le tsy diso zahay naho nirehareha tamy i Titosy. 15 Tena tea’e ka nareo, le tsy haligno’e ty fankatoava’areo iaby, naho ty fomba nandrambesa’areo aze tamy ty tahotse naho ty fihondrahondra. 16 Fale raho fa afake matoky anareo amy ze kila raha.