Taratasy Faharoe Hoahy o Korintianao
8 Teako hohai’areo ry rahalahy, ty miomba i hasoa fagnahy miambake nasehon’Agnahare tamy ty fiangona i Makedoniay. 2 Tena niatreke haoreagne mafe iareo. Faie tena natarike iareo, satria nifalefale avao ndra tie tena nahantra aza. 3 Nagnomey arakarake ze nanagna’e iareo. Ie, mihoatse izay aza. Vavolombelo izay raho. 4 Ty vatategna iareo ro nihalale mafe tama’ay, mba hengagne hanao fagnomezagne ho fandrambesagne anjara amy ty fanompoagne o ndaty masigneo. 5 Tsy ty raha nitamae’ay avao ka ro natao iareo, fa natolo iareo hoahy i Tompo ty vata iareo sady nagnampe anay iareo, arake ty zoton’aforon’Agnahare. 6 Nirisihe’ay areke ty Titosy mba hamita ty famoriagne i fagnomezagne ama’areo agney, satria ireke ty nanomboke o asa iohoe tama’areo eo. 7 Ndra tie eo zay, le manahake ty anagna’areo maro amy ze kila raha, agnisa izay ty finoagne, ty fahafahagne mirehake, ty fahalalagne, ty fazotoagne amy ze hene raha naho ty hatea’ay anareo, le lonike abey mba hagnomey maro ka nareo amy ty fagnomezagne toy.
8 Tsy tihoe mandily anareo raho naho mirehake izay, fa mba hampahafantatse anareo ty fazotoa ty hafa, naho mba hahatreavagne tie, tena avy am-po ty hatea’areo. 9 Hai’areo fa naneho hasoa fagnahy miambake ty Jesosy Kristy Tompontikagne, le ndra tie nimpagnarivo aza reke, le nanjare nahantra noho ty ama’areo, amy izay nareo hanjare ho mpagnarivo amy ty alala i fahantra’ey.
10 Izao ka ty heveko: Mahasoa anareo ty famitagne io, satria fa tao’e raike zay nareo ty nanao io, sady natoro’areo ka fa tena magniry ty hanao io nareo. 11 Vitao’areo hatrake ampara’e areke ze natombo’areo. Amy izay hanahake ty fahavognona’areo hanao aze ty fahavognona’areo hamita aze, arake ze anagna’areo. 12 Naho misy ndaty vognogne hagnomey, le tena ankasitrahagne naho magnomey arake ze anagna’e reke, fa tsy arake ze tsy anagna’e. 13 Tsy teako ty hampaivagne ty hafa, faie hagnavesatse anareo. 14 Faie mba hisia ty fitoviagne, le ze mihoatse ama’areo eo amy izao, ro hamenoagne ze tsy ampe amy iareo eo. Le ze mihoatse amy iareo eo ka, hamenoagne ze tsy ampe ama’areo eo. Hisy fitoviagne amy izay, 15 arake ty voasoratse toy tie: “Ty ndaty nanagne maro, le tsy nanagne maro loatse. Ty ndaty nanagne kede, le tsy nanagne kede loatse.”
16 Isaoragne ty Andrianagnahare, satria natao’e tam-po i Titosy ao ka ty fagniriagne hagnampe anareo, manahake ty atao’ay. 17 Tsy tihoe nagneke i fandrisihagney avao reke, fa tena vognogne ty handeha ama’areo agne, satria magniry ty hanao izay ka reke. 18 Faie hirahe’ay miarake ama’e i rahalahy deraegne amy ty fiangonagne iaby noho i talily soaỳ. 19 Faie tsy izay avao, fa tinendre o fiangonagneo ka reke, mba hiarake ama’ay hizara ty fagnomezagne toy, ho voninahy i Tompo naho ho porofo ty fahavognona’ay hagnampe ty hafa. 20 Nanao izay zahay, amy izay tsy hisy ndaty hagnomey tsiny anay amy ty fizaragne ty fagnomezagne maro toy. 21 ‘Atao’ay am-pahamaregnagne ze kila raha, faie tsy agnatreha i Jehovah eo avao, fa agnatreha o ndatio eo ka.’
22 Nirahe’ay miarake amy iareo ka i rahalahintikagne fa nitsapae’ay mateteke, sady trea tie mazoto amy ze kila rahay. Faie vao mainke mazoto reke tie amy izao, satria tena atokisa’e nareo. 23 Faie naho managne fagnonteneagne miomba i Titosy nareo, le soa hohai’areo fa ragneko reke, sady mpiara-miasa amako mba hahasoa anareo. Ndra, naho managne fagnonteneagne miomba o rahalahintikagneo ka nareo, le soa hohai’areo fa apostoly o fiangonagneo iareo sady voninahy i Kristy. 24 Porofò’areo areke tie tena tea’areo iareo, le atorò’areo o fiangonagneo tie, nagnino zahay ro mirehareha miomba anareo.