Taratasy Faharoe Hoahy o Korintianao

10 Ty vatategnako izaho Paoly, le mihalale ama’areo noho ty fahalemem-pagnahy naho ty hasoa fagnahy i Kristy, ndra tie mirehake aza ty ila’e ama’areo tie maleme* raho naho fa mifagnatreke mivantagne ama’areo, fa mahasaky mirehake naho fa tsy eo. 2 Mitama raho fa naho fa avy, le fa hiova o ndaty mieretseretse anay tie mandeha arake ty nofotse zahaio, amy izay tsy voatere hagnanatse iareo mafe raho. 3 Fa ndra tie mandeha arake ty nofotse aza zahay, le tsy manahake ty atao o ndatio ty atao’ay naho fa mialy. 4 Ty anto’e, tsy arake ty nofotse ty fitaovam-pialia’ay, fa boake aman’Agnahare sady mahery, le mahavita mandrava raha tena fa mafe oregne. 5 Mahavita mandrava fisaignagne naho ze raha abo bey atsangagne, mba hanohetse ty fahalalagne an’Agnahare zahay. Resé’ay ka ze hevetse iaby mba hahavy aze hondevo, le hankatò i Kristy. 6 Vognogne ka zahay hagnasaze ze tsy mankatò, naho vaho aseho’areo tie mankatò tanterake nareo.

7 Naho fa magnente raha nareo, le ty ivela’e etoy avao ty hentea’areo. Naho misy ndaty matoky tie, ahy i Kristy reke, le toko’e hotadidie’e tie, ahy i Kristy manahake aze ka zahay. 8 Ndra tie hirehareha kede aza raho miomba ty fahefagne nimea i Tompo anay mba hampahery anareo, fa tsy hagnakivy anareo, le tsy ho megnatse. 9 Faie tsy teako ty hahatsapa’areo tie, te hampatahotse anareo amy i taratasikoy raho. 10 Ty anto’e, mirehake iareo tie: “Mavesatse naho mahery ty rehake amy i taratasi’e rey ao, faie naho fa magnatreke mivantagne reke, le maleme sady tsisy dika’e ty reha’e.” 11 Soa hohay ty ndaty mieretseretse hoe izay, fa ze raha rehafe’ay amy i taratasi’aỳ ao avao, ro hatao’ay ka naho fa eo zahay. 12 Tsy tea’ay ty hampitaha ndra hampitovy ty vata’ay amo o ndaty midera tegna reo. Faie naho fa mitsara ty vata’e iareo, sady mampitaha ty vata iareo, le arake ze trea iareo fa mete avao ty atao iareo. Trea amy izay fa tsy mahataka-draha iareo.

13 Tsy hirehareha ivela ty faritse nanendreagne anay zahay, fa agnate i faritse nimean’Agnahare anaỳ ao avao ro hirehareha’ay. Agnisa ze faritse zay nareo. 14 Naho ty maregne areke, le tsy tihoe nandeha ivela ty faritane nanendreagne anay zahay naho fa nandeha ama’areo agne, satria izahay ty nitory voaloha’e tama’areo ty talily soa miomba i Kristy. 15 Aha’a, tsy mirehareha ivela ty faritse nanendreagne anay zahay, fa hoe mirehareha amy ty asa o ndaty zahay naho manao izay. Faie mitama zahay fa naho fa mitombo ty finoa’areo, le hitombo ka ty asa natao’ay amy i faritane’aỳ ao. Vao mainke hitombo ka ty asa’ay amy izay, 16 le ho afake hitory i talily soay amy ty faritse ankoatse anareo zahay, amy izay tsy hirehareha amy ty raha natao ty hafa amy ty faritane iareo. 17 “Fa ze mirehareha, le i Jehovah ro toko’e hatao’e rehareha’e.” 18 Tsy ze midera tegna ro ankasitrahagne, fa ze derae i Jehovah.