Taratasy Faharoe Hoahy o Korintianao
11 Teako naho mandefetse amako amy ty hagegeagne kedekede hataoko nareo. Faie naho ty maregne, toe fa mandefetse amako nareo! 2 Sarote’e ama’areo raho, manahake ty mahasarote’e an’Agnahare ama’areo, satria ty vatategnako ro nanolotse anareo ho valifofo ty lahilahy raike, ndra i Kristy, le teako ty hanolotse anareo ama’e ho virjiny malio. 3 Faie matahotse raho, kera hisy ndaty hanimba ty sai’areo, le hahavy anareo tsy halio naho hivalike amy i Kristy, manahake ty navandeza i meregney tamy i Eva mba hamitahagne aze. 4 Mirehake izay raho, satria naho misy ndaty avy mba hitory ty miomba i Jesosy, ankoatse i nitorie’ay tama’areoy, ndra minday fagnahy hafa ankoatse i fa nirambese’areoy, ndra talily soa, ankoatse i fa neke’areoy, le mora ama’areo ty mandefetse ama’e. 5 Fa naho ty amako, le tsy treako tie, ino ty maha ambane ahy, naho oharegne amo o apostoli’areo soa loatse reo. 6 Fa ndra tie tsy mahay mirehake aza raho, le tena managne fahalalagne. Ie, fa niporofoe’ay tama’areo tamy ty lafi’e iaby naho tamy ze kila raha zay.
7 Sa nanota raho naho fa niambane mba hisondrota’areo, satria nahafale ahy ty nitory ty talily soa miomba an’Agnahare tama’areo maimaim-poagne? 8 Hoe nitavagne ty fiangonagne hafa raho, naho nandrambe ty fagnampeagne omey iareo mba hanompoako anareo. 9 Faie naho fa nisy raha nipaliaeko raho, tamy iraho tama’areo agney, le tsy nanjare entagne mavesatse, ndra tamy ia ndra tamy ia. Ty anto’e, o rahalahy boake a Makedonia agne reo ro nagnomey ahy ze raha nipaliaeko, sady tena maro ty nimey iareo. Ie, nataoko ze hahavy ahy tsy ho entagne mavesatse ho anareo amy ty lafi’e iaby, sady mbe hikezake hanao izay avao raho. 10 Naho mbe amako ao avao ty hamaregna i Kristy, le tsy hitofa ty hirehareha miomba izay raho amy ty faritse a Akaia agne. 11 Fa nagnino? Satria vao raho tsy tea anareo? Mahafohigne ty Andrianagnahare tie teako nareo.
12 Faie hotohizako avao ty raha fa ataoko, amy izay tsy hanagne anto’e hireharehagne o ndaty mieva ty hitovy ama’aio, le mirehareha amy ty raha atao iareò. 13 Ty anto’e, sare manao apostoly i Kristy iareo, faie tsy tena apostoly sady mpiasa mamitake. 14 Tsy mahalatsa zay, satria ndra i Satana ka, le sare manao anjely ty mazava. 15 Tsy mahalatsa ka areke naho sare manao mpanompo i hamaregnagney o mpanompo’eo. Faie arakarake ty raha atao iareo ty hiafarà iareo.
16 Hoe indraike raho: Ao tsy hisy ndaty hihevetse ahy ho gege. Faie naho misy ama’areo mieretseretse tie gege raho, le rambeso’areo avao, ndra tie manahake o ndaty gegeo aza, amy izay mba misy hireharehako kede. 17 Tsy magnorike ty modely i Tompo raho amo ze o fomba firehako zao, fa manahake o ndaty gegeo, o mirehareha naho matoky tegna loatseo. 18 Satria maro ty mirehareha arake ty nofotse, le mba hirehareha ka raho. 19 Ty anto’e, “tena misaigne” nareo, le mahafale anareo ty mandefetse amo o ndaty gegeo. 20 Faie naho ty maregne, le mandefetse amy ze magnandevo anareo, naho ze mihinagne ty fanagna’areo, ze mangalake ty fanagna’areo, ze magnambone tegna ama’areo eo, vaho ze mitakapike anareo nareo.
21 Mahamegnatse anay ty firehafako izay, satria hoe mihevetse zay nareo tie matahotse hampiasa ty fahefa’ay zahay.
Faie naho misy ndaty tsy megnatse ty hirehareha, le tsy mahamegnatse ahy ka ty mirehareha. Mirehake manahake o ndaty gegeo raho. 22 Hebreo vao iareo? Iraho ka. Israelita vao iareo? Iraho ka. Tarana i Abrahama vao iareo? Iraho ka. 23 Mpanompo i Kristy vao iareo? Mamale manahake o ndaty gegeo raho. Iraho aza tena miambake naho oharegne amy iareo. Nanao asa maro mandikoatse iareo raho, nigadraegne mateteke mandikoatse iareo, fa tsy hay isahegne ty jera nahazo ahy, le mateteke ka raho ro fa ho nimate. 24 Indimeko raho ro jinera o Jiosio in-39 isa’e, 25 intelo raho ro jinera tamy ty kobaigne, indraike nitorahegne vato, intelo nivaky sambo, nisy fotoagne tan-driake ey avao tagnate ty halegne raike naho andro raike. 26 Nandeha lavitse mateteke, niatreke loza tamy ty rano mandeha, niatreke raha sarotse noho o ndaty mpitavagneo, niatreke raha sarotse noho o ndaty firenena raike amakò, niatreke raha sarotse tamo o ndaty boake amy ty firenena hafao, niatreke raha sarotse tamy ty tanàgne rova bey, tam-patrambey agne, tan-driake ey naho tamo o rahalahy sandokeo. 27 Niasa mafe naho nikezake mafe raho, tsy niroro halegne mateteke, nikeré naho narandrano, mateteke tsy nanan-kanegne, nanintsigne sady zara’e naho niakanjo.
28 Ankoatse o raha ivela’e reo, le nisy raha ka nampivali-doha* ahy isan’andro. Tsy inogne zay fa ty finekonekoko miomba o fiangonagneo iaby. 29 Ia ty maleme, faie tsy maleme raho? Ia ty nivoafingagne, faie tsy niboseke raho?
30 Naho tsy maintsy mirehareha raho, le ze raha mampiseho ty fahalemeako ro hireharehako. 31 Mahafohigne ty Andrianagnahare, i Rae i Jesosy Tompoy, i fagneva ty hoderaegne nainai’ey, tie tsy mavande raho. 32 Nambena i governora tambane fahefà i Areta Mpanjakay ty tanà i Damaskosy, mba hitsepahagne ahy. 33 Faie nazotso tamy ty vaha tamy ty lafinete ty manda i tanàgney eo raho, le nilay.