Taratasy Faharoe Hoahy o Korintianao
12 Tsy maintsy mirehareha raho. Tsy mahasoa zay, faie hirehake fahitagne mahagaga naho ty raha nabaribary i Tompo raho. 2 Misy ndaty raike fantako zay tafaharo amy i Kristy. Tamy 14 taogne lasa, le nentegne amy i lagnitse fahateloy agne reke. Tsy fantako ndra tagnate ty vatagne ndra tsy tagnate ty vatagne, fa i Andrianagnahare ty mahafohigne aze. 3 Ie, haiko o ndaty iohoe. Faie tsy fantako ndra tagnate ty vatagne ndra tsy tagnate ty vatagne, fa i Andrianagnahare ty mahafohigne aze. 4 Nentegne am-paradisa agne reke, le naharey rehake tsy hay rehafegne naho tsy azo o ndatio rehafegne. 5 Hirehareha miomba o ndaty iohoe raho, faie tsy hirehareha miomba ty vatako, ankoatse ty fahalemeako. 6 Fa ndra tie te hirehareha aza raho, le tsy tihoe hanjare gege, satria hirehake ty maregne. Faie tsy hirehareha raho, amy izay tsy hisy ndaty hieretseretse tie mahavita raha mandikoatse ty raha trea iareo ataoko naho ty raha rey iareo boake amako raho, 7 satria maro ty raha miambake nabaribary tamako.
Faie mba hahavy ahy tsy hagnambone tegna loatse, le nisiagne fatike tagnate nofotse ao, ndra anjely i Satana mba hitakapike ahy tsy misy fitofa’e, amy izay raho tsy magnambone tegna loatse. 8 Intelo raho ro nangatake amy i Tompo mba hagnafaha’e o raha iohoe amako. 9 Faie hoe reke tamako: “Fa ampe ty hasoa fagnahy miambake asehoko ama’o, satria manjare voririke ty fiasa ty heriko ama’o ao naho fa maleme rehe.” Ndra aleoko areke hirehareha amy ty fahalemeako, amy izay mijanogne amako ao avao manahake o tragnolaio ty hery i Kristy. 10 Mahafale ahy areke tihoe maleme, ambanembanegne, ty agnate ty tsy fisiagne, ty enjehegne naho ty miatreke raha sarotse noho ty amy i Kristy. Ty anto’e, naho fa meleme raho, le amy izay raho ro mahery.
11 Nanjare gege raho. Faie tsy voatere ho nanao izay raho naho nidera ahike nareo. Ty anto’e, fa natoroko tie tsy ambane raho naho oharegne amo o apostoli’areo soa loatse reo, ndra tie tsy misy dika’e aza raho. 12 Fa natoroko anareo ty porofo amy ty maha apostoly ahy: Maro ty raha niaretako, sady nanao fahagagagne naho famantaragne vaho raha miambake ka raho. 13 Ty anto’e raike toy avao ro maha ambane anareo naho oharegne amy ty fiangonagne hafa: Noho iraho tsy nagneke ho entagne mavesatse ho anareo. Mamelà ahy nareo noho ze hadisoako zay.
14 Fagninteloko zao ty vognogne handeha ama’areo agne, faie tsy ho entagne mavesatse ho anareo raho. Ty anto’e, tsy ty fanagna’areo ro paliaeko fa inareo. Tsy raha o anakeo ro mamory harena hoahy o rae aman-dreneo, fa o rae aman-dreneo ro mamory harena hoahy ty ana’e. 15 Fa naho iraho, le tena hahafale ahy ty hagnomey anareo ze raha iaby anagnako ho anareo, ndra ty fiaiko aza. Naho tena tea anareo raho, le ho ambane izay vao ty hatea’areo ahy? 16 Fa ndra tie eo zay, le tsy te hampinday entagne mavesatse anareo raho. Faie mbe mirehake avao nareo tie, “nametsefetse” anareo raho sady “nanao raha mba hamitahagne” anareo. 17 Tsy nagnararaotse anareo tamy ty alala i ndaty niraheko tama’areo tagney raho, sa tsy izay? 18 Nandrisike i Titosy ho ama’areo agne raho, sady nisy rahalahy ka niraheko niarake tama’e. Faie tena tsy nagnararaotse anareo ty Titosy. Nitovy ty toe-tsai’ay sady nitovy ka ty lia tomboke norihe’ay.
19 Mihevetse vao nareo fa miaro tegna agnatreha’areo eo zahay? Tsy manao izay zahay, fa mirehake ty maregne agnatrehan’Agnahare eo, satria zahay tafaharo amy i Kristy. Ze raha iaby atao’ay, le atao’ay mba hampaherezagne anareo ry ragnetse tea’ay. 20 Faie matahotse raho, tsy mone naho fa avy agne, le tsy ho arake ty eretsereteko ty fahatreavako anareo, le iraho tsy arake ty eretserete’areo. Fa ndra ho fifamaleagne, fialognagne, habosehagne tsy voafehe, aly hevetse, fagnaratiagne, tsikotsiko,* fireharehagne naho korontagne ro hisy. 21 Naho fa avy ama’areo agne indraike raho, le va’e hatao i Andrianagnaharekoy ze hahamegnatse ahy ama’areo eo. Va’e halahelo ka raho, satria mbe maro ty tsy nibebake tamy ty fahotagne nifatao iareo taloha. Agnisa izay ty fahalotoagne, fijangajangagne naho findesam-batagne tsy misy hegnatse.