Taratasy Faharoe Hoahy o Korintianao

13 Fagninteloko zao ty vognogne handeha ama’areo agne. “Vavolombelogne roe ndra telo ty mirehake ty raha raike vaho izay azo antoke.” 2 Ndra tie tsy ama’areo agne aza raho amy izao, le rambeso’areo ty raha rehafeko, manahake tihoe ama’areo agne fagnindroe’e raho. Mampitao mialoha o ndaty nanota talohao naho ty hafa iaby ka raho, satria naho avy agne indraike raho, le tsy hengako moramora iareo. 3 Ty fanoako izay ty porofo tie, mirehake amy ty alalako vata’e ty Kristy. Tsy raha maleme reke naho fa misy raha atao’e ama’areo, fa atoro’e anareo ty heri’e. 4 Maregne fa toe nivonoegne tamy i boda-kataey eo reke tamy ireke nalemey, faie nivelomegne noho ty herin’Agnahare. Maregne fa maleme ka zahay manahake aze talohay, faie hovelogne miarake ama’e ka noho i herin’Agnahare miasa ama’areo aoy.

5 Mandineha tegna lognandro nareo mba hahatreavagne tie mbe amy ty finoagne ao vao nareo sa tsy ao. Hamaregno’areo lognandro tie manao akore ty tegna’areo. Sa tsy eke’areo tie tafaharo amy i Jesosy Kristy nareo? Tsy toko’e ho izay ty raha misy, naho tsy tihoe tsy ankasitrahagne nareo. 6 Tena mitama raho fa hagneke nareo tie ankasitrahagne zahay.

7 Mivavake aman’Agnahare zahay mba tsy hanao raha raty nareo. Tsy tihoe amy izay mba hankasitrahagne zahay, fa amy izay nareo manao ty soa, ndra tie hoe tsy ankasitrahagne zahay. 8 Tsy misy raha azo’ay atao mba hanoheragne i hamaregnagney, fa ty mampandroso i hamaregnagney avao ro azo’ay atao. 9 Tena fale zahay naho fa maleme, fa inareo matanjake. Izay ty mahavy anay mivavake mba hagnitsia’areo ze toko’e hahitsy. 10 Izay ty mahavy ahy manoratse o raha rehoe amy iraho mbe tsy eoy, amy izay naho fa eo raho le tsy ho hentetse loatse, naho fa mampiasa ty fahefagne nimea i Tompo ahy. Nimea’e fahefagne mba hampahery raho fa tsy handrava.

11 Fara’e, ry rahalahy, mifalea lognandro, ahitsio ze toko’e hahitsy, mifampionogna, miharoa hevetse, sady milongoa soa. Ho ama’areo abey i Andrianagnahare ty hatea naho ty fiadagnagney! 12 Mifanalamà amy ty oroke masigne. 13 Mampamangy anareo o ndaty masigneo iaby.

14 Ho ama’areo iaby abey i hasoa fagnahy miambake aseho i Jesosy Kristy Tompoy naho ty hatean’Andrianagnahare naho i fagnahy masigne nimea’e antikagney!