Hoahy o Filipianao

2 Naho misy afake mampahery nareo amy i Kristy aò, naho misy afake mampionogne noho ty hatea, naho misy afake maneho fiheveragne ty hafa, naho misy afake maneho hatea naho miferenaigne ty hafa, 2 le anò’areo ze tena hahafale ahy, le mikezaha mba hiharo hevetse, hifankatea, hiharo raike tanterake* naho hiharo saigne. 3 Ko manao raha noho ty hatea aly hevetse* ndra ty firohafagne, fa miambanea, le hevero’areo ho ambone noho inareo ty ndaty hafa. 4 Ko ze raha hahasoa ty vata’areo avao ka ro eretseretegne, fa mba eretsereto ze hahasoa ty hafa.

5 Mikezaha avao mba hanagne ty toe-tsaigne nanagna i Kristy Jesosy toy: 6 Ndra tie fagnahy mitovy aman’Agnahare aza reke, le tsy mba nieretserete’e ndra kidikidy tihoe hikezake hitovy aman’Agnahare. 7 Ie aza nafoe’e ze kila raha,* sady le hamake reke nagneke hatao manahake o mpanompò naho hanjare ndaty.* 8 Tsy izay avao, fa naho fa nanjare ndaty reke, le niambane sady neke’e ndra ty hamonoagne aze aza. Ie, nagneke ty hovonoegne tamy i hazo fijaleagney ey reke. 9 Izay ty nahavy an’Agnahare nanondrotse aze amy ty toeragne ambone noho i nanagna’e talohay, sady nagnomey aze aman-kasoa fagnahy agnaragne ambone noho ty agnaragne hafa iaby. 10 Amy izay amy ty agnara i Jesosy ro hanongalefa ze ongotse iaby, ndra ty an-dagnitse agne zay, ndra ty an-tane etoy, ndra ty ambane tane agne. 11 Amy izay ka ty lela iaby hagneke agnatreha o ndaty maro eo tie, i Jesosy Kristy ro Tompo, mba ho voninahin’Andrianagnahare Rae.

12 Fa nankatò lognandro nareo ry longo mamy, tsy tamy iraho tama’areo eoy avao, fa lohotsie aza fa amy iraho tsy ama’areo eò. Naho izay areke, le mikezaha avao mba ho voavonje, sady anò aman-tahotse naho am-pagnajagne zay. 13 I Andrianagnahare ro magnomey fagniriagne naho hery anareo mba hanoagne raha. Mahafale aze ty magnatanjake anareo. 14 Ko asiagne figneogneogne naho aly hevetse ze raha atao’areo. 15 Amy izay nareo tsy hanan-tsiny naho halio sady ho anan’Agnahare tsy misy tasy,* agnivo ty taranake mahery loha naho raty fagnahy toy sady ho mpagnazava agnivo ty tontolo toy. 16 Tano’areo mafe i saontsy ty havelogney. Hanagne anto’e hifaleagne amy i andro i Kristỳ raho amy izay, satria fantako fa tsy montso antoke ty nifilaisako ndra ty asa mafe nataoko. 17 Faie ndra tie ailigne manahake o raha inomegne atao fagnatetse ambone o sorogneo eoy aza raho, amy ty alala ty fandrambesako anjara amy i fanompoagne masigne, i nitariha ty finoa’areo anareoy, le tena fale raho sady miharo hafaleagne ama’areo iaby. 18 Hoe izay ka, fa toko’e ho fale naho hiharo hafaleagne amako nareo.

19 Mitama raho amy izao, fa hagnirake i Timoty ama’areo agne tsy ho ela, naho sitrapo i Jesosy Tompo, amy izay raho hahazo fampaherezagne naho fa maharey vaovao miomba anareo. 20 Ty anto’e, iraho tsy mahatrea ndaty hafa managne toe-tsaigne manahake aze, hahavita hikarakara soa anareo. 21 Satria ty hahasoa ty vata’e avao ro paliave ty ila’e, fa tsy ty raha tea i Jesosy Kristy. 22 Faie hai’areo tie fa niporofoe’e zay. Manahake o ajaja miarake aman-drae’eo, ty niaraha’e nanompo tamako mba hampandroso i talily soay.

23 Ireke areke ro tamaeko hirahegne, naho vaho haiko tie ino ty raha hanjò ahy. 24 Tena matoky ka raho fa tsy ho ela, le ho avy agne naho sitrapo i Tompo.

25 Faie noho ty raha misy, le treako tie soa naho irahegne ama’areo agne hey ty Epafrodito amy hinane zao. Rahalahiko naho mpiara-miasa amako vaho maramila manahake ahy reke sady nirahe’areo hanompo ahy naho hikarakara ze raha paliaeko. 26 Fa tsy ligne’e ty hahatrea anareo iaby sady tena kivy reke, satria nirei’areo reke tie narare. 27 Narare mafe le fa ho nimate reke, faie namindra fo tama’e ty Andrianagnahare. Tsy tama’e avao aza, fa tamako ka, amy izay tsy hifanesesese ty alaheloko. 28 Halefako ama’areo agne malaky areke reke tie amy izao, amy izay nareo ho fale indraike naho fa mahatrea aze, le iraho tsy hinekoneko loatse. 29 Rambeso’areo soa reke, manahake ty fomba fandrambesa’areo o mpiana i Tompò am-pifaleagne, sady hajao’areo avao ty ndaty manahake aze, 30 satria fa didỳ avao ty tsy nahafate aze noho ty fanoa’e ty asa i Kristy.* Nanao sorogne ty fiai’e ka reke mba hikarakara ahy manokagne, hosolo ty tsy naha teto anareo.