Hoahy o Filipianao
3 Fara’e ry rahalahy, mifalea lognandro amy i Tompo ao. Tsy mampagnino ahy ty manoratse raha mitovy ama’areo sady fiarovagne ho anareo rey.
2 Mitaoa amo o amboao; mitaoa amo o ndaty mpanao ratio, le mitaoa ka amo o ndaty manapake nofotseo. 3 Itika ro tena mitapake, satria manao fanompoagne masigne amy ty alala ty fagnahin’Andrianagnahare, sady i Kristy Jesosy ro reharehantikagne. Tsy mitoky amo o nofotseo ka tikagne. 4 Naho misy ndaty aza, managne anto’e hitokiagne amo o nofotseo, le izaho zay.
Naho misy ndaty ka mieretseretse tie managne anto’e hitokiagne amo o nofotseo, le izaho mbe ambonembone’e. 5 Ty anto’e, nitapahegne tamy ty andro fahavalo raho, Israely ty firenena niaviako, boake tamy ty foko i Benjamina, Hebreo natera ty Hebreo, le Fariseo naho arake i lalànay. 6 Naho ty hafanam-po ro rehafegne, le nagnenjeke o fiangonagneo raho. Naho ty hamaregnagne boake amo o lalànao ka ro rehafegne, le niporofoeko tie tsy misy tsiko’e raho. 7 Faie o tombo’e niazoko reo, le nihevereko ho fateantoke, noho i Kristy. 8 Ie, nihevereko ho fateantoke vata’e ze kila raha, satria fara izay ty sarobily ty fahalalagne i Kristy Jesosy Tompoko. Noho ty ama’e, le nidirako fateantoke ze kila raha, sady hevereko manahake o fako mitoborogneo* i raha rey, mba hahazoako tombo’e amy i Kristy, 9 sady hotrea tie tafaharo ama’e raho. Faie tsy tihoe noho ty hamaregnako boake amy ty fagnorihagne i Lalànay, fa noho i hamaregnagne boake amy ty finoagne i Kristỳ. Tsy ino zay fa i hamaregnagne boake aman’Agnahare mioregne amy ty finoagney. 10 Ty tanjoko le ty hahafantatse aze naho ty hery ty famelomagne aze amy ty mate, sady hijale miarake ama’e. Hagneke ty homate manahake aze aza raho. 11 Ty tanjoko, le ty hanao ze azoko atao, amy izay raho kera mba hahazo i famelomagne amy ty mate alohay.
12 Tsy tihoe fa niazoko zay, ndra fa natao voririke ka raho, fa mbe mikezake avao raho, amy izay kera mba hoazoko ka zay, satria izay ty anto’e nijobogna* i Jesosy Kristy ahy. 13 Ry rahalahy, tsy mieretseretse raho tie fa niazoko ze raha zay. Faie izao ty raha ataoko azo antoke: Magnaligno ty raha afarako agne, le mifofotse mafe mba hagnatratraragne ty raha alohako eo. 14 Manao ze azoko atao raho mba hagnatratraragne i tanjokoy, ndra ty hahazo i loka ambone agne homean’Andrianagnahare ze kanjie’e, amy ty alala i Kristy Jesosỳ. 15 Naho izay areke, le ao ze matotse amantikagne hanagne ze toe-tsaigne zay avao, sady naho magnaly hieretseretse raha hafa nareo, ndra inogne zay ndra inogne, le habaribarin’Andrianagnahare ama’areo o toe-tsaigne ambone eò. 16 Faie ndra izay aza, ndra inogn’ino fandrosoagne fa nivitantikagne, le andao tika hikezake handroso hoe izay avao.
17 Manahafa ahy nareo iaby ry rahalahy, sady dineho naho tsikombeo’areo ka ze managne fomba fiaignagne mifagnarake amy i modely natoro’ay anareoy. 18 Ty anto’e, maro ty mitsangagne ho fahavalo ty hazo fijalea i Kristy. Fa nirehake mateteke ty miomba iareo raho, fa amy izao, le mirehake ty miomba iareo aman-dranomaso. 19 Habaibay ty hiafara iareo, sady ty tro’e ro andrianagnahare iareo. O raha mahamegnatseo ro hevere iareo ho voninahitse, sady ty raha ambone tane etoy ro ifantoha ty say iareo. 20 Fa an-dagnitse agne ty firenena fiaviantika sady mandigne mafe i mpagnavotse boake agney tika, le i Jesosy Kristy Tompo. 21 Ie ty hagnova ty vatantikagne tsy misy dika’e toy mba hanahake* i vata’e bey voninahitsey, amy ty alala ty heri’e lahibey, i mahavy aze ho eke ze kila rahay.