Hoahy o Filipianao
1 Ty taratasy toy le boake amy i Paoly naho i Timoty, mpanompo i Kristy Jesosy. Hoahy ty ndaty masigne ahy i Kristy Jesosy a Filipy agne, agnisa izay ty mpiandraikitse naho ty mpagnampe amy ty fiangonagne.
2 Lonike abey ty Andrianagnahare Raentika naho i Jesosy Kristy Tompo haneho hasoa fagnahy miambake ama’areo naho hagnomey fiadagnagne anareo!
3 Misaotse i Andrianagnaharekoy lognandro raho naho fa mahatsiaro anareo, 4 amy iraho mihalale ho anareo iabỳ. Falefale raho isake tie mihalale ho anareo, 5 satria nandrambe anjara amy ty fampandrosoagne i talily soay nareo, nanomboke tamy i andro nahareiza’areo azey hatrake amy izao. 6 Fa matoky raho tie, i nanomboke i asa soa tama’areo eoy, le hamita aze tanterake, amparake ty iavia i andro i Kristy Jesosỳ. 7 Tsy mahalatsa naho izay ty raha eretsereteko miomba anareo iaby, satria tsy mete afake am-poko ato nareo. Nanehoagne hasoa fagnahy miambake manahake ahy ka nareo sady nanohagne ahy avao ndra tamo o figadrako zao, ndra tamy iraho niaro i talily soay naho nikezake hahazo zo ara-dalàna hitory azey.
8 I Andrianagnahare ty vavolombelogne tie te hahatrea anareo mafe raho, sady tena teako nareo, manahake ty iteava i Kristy Jesosy anareo. 9 Izao ka ty raha lava angataheko naho fa mivavake ho anareo: Ty hitomboa ty hatea’areo avao, naho ty hanagna’areo fahalalagne maregne, vaho fahaiagne magnambake. 10 Mivavake raho mba hahaia’areo hamantatse ty raha tena lahibey, amy izay nareo tsy hisy tsiko’e naho tsy hanao raha mba haminganagne ty ila’e, amparake ty iavia i andro i Kristỳ. 11 Mivavake ka raho mba ho feno vokatse ty hamaregnagne nareo, i azontikagne boake amy i Jesosy Kristỳ, mba ho voninahin’Agnahare naho ho fideragne aze.
12 Teako hofanta’areo ry rahalahy, fa vao mainke nampandroso i talily soay o raha manjò ahy zao. 13 Ty anto’e, nanjare nifanta o ndaty Mpiambegne i Kaisarao naho ty ndaty hafa, fa noho i Kristy ro mahavy ahy hirohy seny naho gadraegne hoe izao. 14 Vao mainke nifeno toky ty ankamaroa ty rahalahy amy i Tompo ao noho ze o figadrako zao. Vao mainke nanagne herim-po ka iareo, le tsy natahotse nitory i saontsin’Agnaharey.
15 Maregne fa mitory miomba i Kristy ty ndaty ila’e, faie fialognagne naho hatea aly hevetse ty mandrisike iareo hanao izay, fa ty ila’e anto’e soa ty mandrisike aze. 16 Hatea ty mandrisike iareo hitory miomba i Kristy, satria hay iareo fa tinendre mba hiaro i talily soay raho. 17 Faie i ila’e mitory noho ty fialognagne naho ty hatea hialy hevetsey, le tsy soa ty anto’e mandrisike iareo, satria mbe tea iareo hampeagne ka ty fahasahiragnako, amy iraho fa mirohy seny am-pirizò ato zao. 18 A ino ty voka izay? Maharey ty hafatse miomba i Kristy o ndatio, ndra anto’e soa ndra anto’e raty ty itoriagne ty miomba aze, le mahafale ahy zay. Lava ho fale avao aza raho, 19 satria fantako tie noho io ro hahavoavonje ahy amy ty alala ty fihalalea’areo naho ty fagnampea ty fagnahy i Jesosy Kristy. 20 Ze raha zay, le mifagnarake amy i raha irieko naho tamaekoy, i tsy misy anto’e toko’e hahamegnatse ahy ndra raikey. Fa hahavany hirehake raho tie amy izao, manahake ty taloha, mba hagnomeagne voninahitse i Kristy amy ty alala ty tegnako, ndra velogne raho ndra mate.
21 Faie naho velogne raho, le velogne hoahy i Kristy. Fa ndra tie mate aza raho, le mahazo tombo’e. 22 Fa naho mbe velogne amy ty nofotse ao raho, le vokatse ty asako io.* Faie tsy hambarako* tie ty aia ty hofilieko. 23 Mampiasa loha ahy o raha roe rehoe. Tena te hovotsotse raho, le hiarake amy i Kristy, satria izay ty raha fara’e soa. 24 Faie mahasoa anareo ka raho naho mbe mijanogne amy ty maha nofotse ahy. 25 Matoky izay raho. Haiko fa mbe ho velogne raho sady mbe hiarake ama’areo iaby lognandro, le hagnampe anareo mba handroso naho hanagne fifaleagne boake amy ty finoagne. 26 Amy izay nareo vao mainke ho fale amy ty maha mpiana i Kristy Jesosy anareo noho ty amako, naho fa ho avy ama’areo agne indraike raho.
27 Teako avao naho atao’areo mifagnarake amy* i talily soa miomba i Kristỳ ty findesam-bata’areo. Amy izay ndra ama’areo eo raho ndra tsy eo, le ho reiko tie mafe oregne, miharo saigne, mitovy tanjogne, naho mikezake mifanohagne mba hino i talily soay avao, 28 sady tsy mete horohoroe o mpanohetseo nareo. Ze tsy fatahora’areo zay ty porofo tie habaibay iareo, fa inareo ho voavonje. Boake aman’Andrianagnahare ze raha zay. 29 Ty anto’e, nimeagne tombotsoa nareo noho i Kristy, tsy tihoe mba hino aze avao, fa mba hijale noho ty ama’e ka. 30 Miatreke aly manahake i nitrea’areo tie natrehekoy nareo hinaneke zao, sady rei’areo tie mbe miatreke aly avao raho hatrake amy izao.