Hoahy o Filipianao
4 Naho izay areke ry rahalahy tena teako naho imanignako, inareo ro fifaleako vaho satro-boninahiko. Mikezaha avao nareo ry longo mamy mba ho mafe oregne amy i Tompo ao, arake i fa rinehakoy.
2 Mandrisike i Eodia naho i Sentike raho mba hiharo saigne amy i Tompo ao. 3 Mangatake azo, ihe tena mpiara-miasa* amako ka raho mba hagnampe iareo roe vave avao. Nikezake mafe nitory i talily soay niarake amako iareo roe vave, naho i Klementa vaho ty mpiara-miasa amako hafa iaby. Sambe voasoratse amy i boke i fiaignagney ao ty agnara iareo.
4 Mifalea lognandro amy i Tompo ao. Hoe indraike raho: Mifalea! 5 Anò fanta ze kila ndaty fa mahay manahatsahatse* nareo. Marine ty Tompo. 6 Ko minekoneko ndra amy ty ino ndra amy ty ino. Fa amy ze kila raha, le ampahafantaro an’Agnahare ty fihalalea’areo, amy ty alala ty vavake naho fihalaleagne vaho fisaoragne, 7 sady ty fiadagnan’Andrianagnahare, i mihoatse lavitse ty raha taka ty saigney, ro hiambegne ty fo’areo naho ty sai’areo,* amy ty alala i Kristy Jesosy.
8 Fara’e ry rahalahy, ndra inogn’inogne maregne, ndra inogn’inogne raha lahibey,* ndra inogn’inogne mahitsy,* ndra inogn’inogne malio, ndra inogn’inogne raha fanjaka, ndra inogn’inogne soa laza, ndra inogn’inogne raha soa, ndra inogn’inogne fagneva ty hoderaegne, le izay avao ro dineho’areo.* 9 Oriho’areo soa avao ze raha nianara’areo, naho neke’areo vaho nirei’areo, sady nitrea’areo tamako. Lonike abey i Andrianagnahare ty fiadagnagney ho ama’areo!
10 Tena fale amy i Tompo ao raho, satria fa nieretseretse ze hahasoa ahy indraike nareo hinane zao. Fa nieretseretse ty hagnampe ahy avao moa nareo naho ty maregne, faie tsy nahatrea hirike hanoroagne izay. 11 Tsy tihoe noho iraho mipay fagnampeagne ty mahavy ahy mirehake izay. Fa nianatse hionogne* raho, ndra manao akore ndra manao akore ty toe-draha misy ahy. 12 Haiko tie manao akore ze o miafy zao, le haiko tie manao akore ka ze o manan-draha zao. Tamy ze kila raha naho tamy ty toe-draha iaby, le fa nianarako ty sekiré ty hahavontsy* naho ty hahakeré, le ty hanan-draha maro naho ty ho faìty. 13 Ty anto’e, managne hery hiatrehagne ze kila raha raho, satria misy magnomey hery ahy.
14 Faie ndra tie eo zay, le soa ty raha natao’areo, satria nagnampe ahy nareo tamy ty haoreagne nanjò ahy. 15 Fanta’areo Filipianao ka, fa nanomboke tamy i nahareiza’areo i talily soaỳ naho tafara ty nialako ta Makedonia agne, le tsy nisy fiangonagne nagnampe ahy ndra nagneke hampeako, naho tsy inareo avao. 16 Ty anto’e, tamy iraho ta Tesalonika agney, le nandefa raha ho ahy nareo mba hahazoako ze raha nipaliaeko, sady tsy indraike avao fa indroe. 17 Tsy tihoe mipay fagnomezagne raho, fa i vokatse vao mainke mampitombo ty konte’areoy ro paliaeko. 18 Faie fa managne ze raha paliaeko raho. Mihoatse aza! Tsy misy raha mahaore ahy ty amy izao, satria fa nivoaraeko iaby i raha nampindese’areo i Epafroditoy. Hagnitse soasoa i raha rey, sady sorogne ankasitrahan’Agnahare naho tena mahafale aze. 19 Le i Andrianagnaharekoy ro hagnomey anareo ze raha paliae’areo iaby, arake i harena’e bey voninahitsey, amy ty alala i Kristy Jesosy. 20 Hoahy i Andrianagnahare Raentikagney abey ty voninahitse nainai’e! Amena.
21 Mampamangy amy i ndaty masigne iaby tafaharo amy i Kristy Jesosy ao rey. Mampamangy anareo i rahalahy miarake amako etoa rey. 22 Mampamangy anareo ka o ndaty masigneo iaby, lohotsie fa ze an-tragno i Kaisara ao.
23 Ho amy ty toe-tsaigne aseho’areo abey ty hasoa fagnahy miambake boake amy i Jesosy Kristy Tompo!