Taratasy Voaloha’e Hoahy o Tesalonianao

1 Ty taratasy toy le boake amy i Paoly, i Silvano naho i Timoty. Hoahy ty fiangonagne Tesaloniana tafaharo amy i Andrianagnahare Rae naho i Jesosy Kristy Tompo.

Lonike nareo mba hanehoagne hasoa fagnahy miambake naho homeagne fiadagnagne!

2 Misaotse an’Agnahare lognandro zahay naho fa manognogne ty agnara’areo amy ty vavake atao’ay, 3 satria tsy haligno’ay ty asa natao’areo noho ty finoa’areo, ty asa mafe natao’areo aman-katea naho ty fiareta’areo noho ty fanantena’areo i Jesosy Kristy Tompontikagne, agnatreha i Andrianagnahare Raentikagney eo. 4 Ry rahalahy tean’Agnahare, hai’ay fa nijobogne anareo reke, 5 satria i talily soa torie’aỳ, le tsy niavy tama’areo agne tan-drehake avao, fa tamy ty hery ka naho tamy ty fagnahy masigne vaho tamy ty fatokisagne tanterake. Fa hai’areo tie, nanjare ndaty nanao akore zahay, tamy izahay tama’areo agney mba hahasoa anareo. 6 Nanjare nanahake anay naho i Tompo nareo, satria ndra tie teo aza ty haoreagne maro natrehe’areo, le nagneke i saontsỳ nareo sady nifalefale avao, noho i hafaleagne boake amy i fagnahỳ. 7 Ty voka’e, nanjare fitsikombe hoahy ty mpino iaby a Makedonia naho a Akaia agne nareo.

8 Naho ty maregne aza, le tsy tihoe ty a Makedonia naho a Akaia agne avao ro naharey i saontsy i Jehovah boake ama’areoy, fa niparitake amy ty toeragne iaby ka ty finoa’areo an’Agnahare, le tsy mila mirehake ndra inogn’ino sasa zahay. 9 Ty anto’e, lava atalily iareo anay ty fomba nifankatreavantika voaloha’e naho ty nialà’areo tamo o sampio, le nitoliha’areo tamy i Andrianagnahare velogne naho maregney mba hanompo aze, 10 sady mba handigne ty hiavia i Ana-dahi’e boake an-dagnitse agney, i nivelome’e tamy ty matey, ndra i Jesosy. Ireke ty magnafake antika amy i havigneragne amy ty hoavỳ.