Taratasy Voaloha’e Hoahy o Tesalonianao

3 Naho fa tsy nitante’ay sasa areke ty tsy nahatrea anareo, le nieretseretse zahay tie, ndra aleo’ay mijanogne irerike a Atena agne, 2 le nirahe’ay ty Timoty rahalahintika sady mpanompon’Agnahare* magnambara i talily soa miomba i Kristỳ, hagnamafe oregne* anareo naho hampionogne anareo mba hagnamafe ty finoa’areo, 3 amy izay tsy hisy ho voaozongozo* o haoreagne rehoe. Ty anto’e, hai’areo tie, tsy afake lomay ty fijaleagne hoe ireo tika.* 4 Tamy izahay tama’areo agney aza, le mateteke nirehake tama’areo mialoha tie, tsy maintsy hiaretse haoreagne tika, le izay vata’e ty niseho, arake ty fa fanta’areo. 5 Naho fa tsy nitanteko sasa areke zay, le niraheko tama’areo agne reke, mba hahafantarako ty tsy fivaliha’areo, tsy mone hitsapa hevetse anareo i Mpitsapa Hevetsey, le hanjare ho montso antoke ty asa mafe natao’ay.

6 Faie vaho fiavi’e boake ama’areo agne ty Timoty hinane zao, sady ninday talily soa miomba ty tsy fivaliha’areo naho ty hatea’areo. Nirehake reke tie, tsy nihalignove’areo i fotoagne mamy niaraha’ay tama’areo rey, sady tena te hahatrea anay ka nareo, manahake ty tsapa’ay ama’areo. 7 Nanjare nahazo fampionognagne areke zahay ry rahalahy, noho ty ama’areo naho ty tsy fivalihagne aseho’areo, ndra tie eo aza ty raha sarotse* naho ty haoreagne atrehe’ay. 8 Ty anto’e, velombelogne* zahay naho mafe oregne amy i Tompo ao nareo. 9 Akore ty fomba hanehoa’ay aman’Agnahare ty fisaora’ay mba hovale ty hafaleam-bey tsapa’ay agnatreha i Andrianagnaharentikagney eo, noho ty ama’areo? 10 Mihalale mafe handro halegne zahay, mba ho afake hahatrea anareo mivantagne naho mba ho afake hagnomey ze raha tsy ampe amy ty finoa’areo.

11 Lonike abey ty Andrianagnahare Raentika naho i Jesosy Tompontika hagnampe anay hahatrea fomba mba hiavia’ay ama’areo agne. 12 Lonike ka abey ty Tompo mba hampitombo ty fifankateava’areo, ie, lonike abey reke mba hampiroborobo ty fifankateava’areo naho ty hatea’areo ty ndaty iaby, manahake ty atao’ay ama’areo. 13 Amy izay hatao’e mafe oregne naho tsy misy tsiny sady masigne ty fo’areo agnatrehan’Andrianagnahare Raentikagne eo, amy i fagnatreha i Jesosy Tompontikagney, miarake amo o ndati’e masigneo iaby.