Taratasy Voaloha’e Hoahy o Tesalonianao

5 Naho ty miomba i fotoagney naho i vanim-potoagney ry rahalahy, le tsy mila manoratse ama’areo ndra inogn’ino zahay, 2 satria hai’areo soa, fa ho avy manahake o mpangalatse avy halegneo i andro i Jehovah-y. 3 Naho fa mirehake iareo tie: “Fiadagnagne naho filaminagne!”, le avy le hotra ty famonovonoagne tampoke iareo, manahake ty fanaintaigna o ampela mitsongò, sady tsy ho afake hilay iareo. 4 Fa inareo ry rahalahy tsy agnate i iegney ao, le tsy ho tampoke anareo, manahake o mpangalatse tra i andro mazavaio ze andro zay, 5 satria ana i fahazavagney naho i androy nareo iaby. Sady tsy ahy i halegney tika, ro tsy ahy i iegney.

6 Andao areke tika tsy hiroro manahake ty atao ty ila’e, fa andao tika hifoha avao, sady hisaigne soa lognandro. 7 Fa amy i halegney ro iroroa ze miroro, le amy i halegney ka ro imamoa ze minon-toake. 8 Satria tika ahy i androy, le andao tika hisaigne soa lognandro, sady hisikigne ty finoagne naho ty hatea ho fiarovan-tratra, vaho hagnisy i fanantenagne fagnavotagney ho fiarovan-doha. 9 Ty anto’e, tsy tinendren’Agnahare ho amy ty havigneragne tika, fa mba hahazo fagnavotagne amy ty alala i Jesosy Kristy Tompontikagne. 10 Nimate ho antikagne reke, amy izay tika ndra mifoha ndra miroro, le toko’e hovelogne miarake ama’e. 11 Naho izay areke, le mifampionogna naho mifampahereza lognandro, manahake ze o fa atao’areo zao.

12 Mangatake ama’areo zahay ry rahalahy, mba hanehoa’areo fagnajagne ze miasa mafe ama’areo eo naho ze mitarike anareo amy i Tompo ao, sady magnitsy anareo. 13 Aneho’areo fiheveragne miambake sady aman-katea iareo, noho ty asa atao iareo. Milongoa soa nareo sambe inareo. 14 Mandrisike anareo ka zahay ry rahalahy, mba hagnanatse mafe ze mitangingigne, hanao rehake mampahery ze kivy, hanohagne ty maleme, naho hanam-paharetagne amy ze kila ndaty. 15 Mitaoa ka mba tsy hamale raty ty raty, fa mikezaha mba hifanao soa lognandro naho hanao soa amy ze kila ndaty.

16 Mifalea lognandro. 17 Mivavaha lognandro. 18 Misaora amy ze kila raha. Izay ty zoton’arofon’Agnahare ho anareo amy i Kristy Jesosy ao. 19 Ko vonoegne ty afo i fagnahỳ. 20 Ko heveregne ho tsy misy dika’e o faminaniagneo. 21 Anò azo antoke ze kila raha. Mipiteha mafe amy ze soa. 22 Falio ze kila raha raty.

23 Lonike abey i Andrianagnahare ty fiadagnagney mba hagnamasigne anareo tanterake! Lonike ka abey ty toe-tsai’areo, ty fiaigna’areo naho ty vata’areo ry rahalahy mba tsy hisy tsiko’e amy ty lafi’e iaby, le inareo ka tsy hanan-tsiny amy i fagnatreha i Jesosy Kristy Tompontikagneỳ. 24 Azo atokisagne i nikanjy anareoy, le azo antoke fa hanao izay vata’e reke.

25 Ry rahalahy, mivavaha ka ho anay.

26 Salamao’areo amy ty oroke masigne ty rahalahy iaby.

27 Mangatake ama’areo amy ty agnara i Tompo raho mba horambese’areo ho andraikitse lahibey ty hamaky ty taratasy toy amy ty rahalahy iaby.

28 Ho ama’areo abey ty hasoa fagnahy miambake boake amy i Jesosy Kristy Tompontikagne!