Taratasy Voaloha’e Hoahy o Tesalonianao

2 Hai’areo soa ry rahalahy, fa tsy tihoe tsy nisy voka’e ty fitiliha’ay anareo. 2 Ty anto’e, naho fa boake nampijalegne naho nafahagne baraka zahay ta Filipy agne, arake ty fa hai’areo, le navori’ay ty herim-po’ay tamy ty alala i Andrianagnaharentikagney, mba hagnambara’ay ama’areo i talily soan’Agnaharey, ndra tie nisy nanohetse mafe aza.* 3 Ty fandrisihagne mea’ay anareo, le tsy mifototse amy ty heve-diso ndra boake amy ty fahalotoagne sady tsy misy fitake. 4 Satria zahay fa nankasitrahan’Agnahare, le nankine’e tama’ay i talily soay, le izay ty mahavy anay mirehake. Tsy tihoe mba hampifale ndaty, fa mba hampifale an’Agnahare, i mandineke ty fo’aỳ.

5 Naho ty maregne aza, le fanta’areo fa mbe lia’ay naho nampiasa rehake mandroboke, ndra nanao raha mba hagnetahagne ty anto’e raty mandrisike anay. Vavolombelo izay ty Andrianagnahare. 6 Tsy nipay voninahitse boake ama o ndaty ka zahay, ndra boake ama’areo zay ndra boake amy ty ndaty hafa, ndra tie afake ty ho nienta-mavesatse ho anareo* aza zahay, amy ty maha apostoly i Kristy anay. 7 Fa naleme fagnahy tama’areo zahay, manahake ty atao o rene mampinono mikarakara soa ty ana’eo. 8 Satria tena tea’ay nareo, le nanapa-kevetse zahay, fa hagnomey anareo, tsy i talily soan’Agnaharey avao, fa ndra ty fiai’ay ka aza. Ty anto’e, le vata’e mami’ay nareo.

9 Azo antoke fa tsy haligno’areo ry rahalahy, ty asa mafe naho ty kezake mafe natao’ay. Niasa mafe handro halegne zahay, amy izay tsy hampinday enta-mavesatse ndra ia ndra ia ama’areo, naho fa nitory i talily soan’Agnaharey tama’areo. 10 Inareo naho i Andrianagnahare ty vavolombelogne, fa natoro’ay tie ndaty tsy mivalike naho maregne vaho tsy nanao raha raty zahay, tamy izahay niarake tama’areoy. 11 Hai’areo soa, fa lava nandrisike naho nampionogne anareo sady nanoro hevetse anareo tsikiraidraike zahay, manahake ty atao ty rae amy ty ana’e. 12 Amy izay nareo handeha lognandro amy ty fomba ankasitrahan’Agnahare, i nikanjy anareo ho amy i Fanjakà’ey naho ty voninahi’ey.

13 Izay ka ty mahavy anay misaotse an’Agnahare lognandro, satria naho fa nandrambe i saontsin’Agnahare nirei’areo boake ama’aỳ nareo, le neke’areo tie tsy reha o ndaty io, fa arake ty tena ie, le saontsin’Agnahare, i miasa agnate’areo mpino aoy ka. 14 Ry rahalahy, nanjare nitsikombe ty fiangonan’Agnahare a Jodia agne, tafaharo amy i Kristy Jesosio nareo, satria nijale noho ty natao o ndaty mpiharo tanendrazagne ama’areò, manahake ty ijalea iareo noho ty atao o Jiosio ka, 15 i namono i Jesosy Tompo naho o mpaminanio vaho nagnenjeke anaio. Tsy mampifale an’Agnahare ka iareo, fa manohetse ty tombotsoa ty ndaty iaby. 16 Ty anto’e, manao ze hikalagnagne anay mba tsy hirehake amo o ndaty boake amy ty firenena hafao iareo mba hahavoavonje i ndaty rey. Ty fanoa iareo izay, le manovogne ty fahota iareo. Faie fa ho avy amy iareo i havignera’ey.*

17 Faie naho fa nisarahegne tama’areo tagnate ty fotoagne fohe zahay (ty tegna’ay fa tsy ty fo’ay), le nanao ze azo’ay natao zahay mba hahatreavagne anareo. Ty anto’e, tena te hahatrea anareo mafe zahay. 18 Izay ty nahavy anay te ho ama’areo agne. Ie, nikezake ho agne, izaho Paoly, le tsy indraike avao fa indroe. Faie nisakagne ty lala’ay ty Satana. 19 Ino moa ty fanantena’ay ndra ty fifalea’ay ndra satro-boninahitse irehareha’ay agnatreha i Jesosy Tompontika eo, amy i fagnatreha’ey? Tsy inareo vao? 20 Ie, inareo vata’e ty voninahi’ay naho ty fifalea’ay.