Taratasy Faharoe Hoahy o Tesalonianao
1 Ty taratasy toy le boake amy i Paoly, i Silvano naho i Timoty. Hoahy ty fiangonagne Tesaloniana tafaharo amy i Andrianagnahare Raentika naho i Jesosy Kristy Tompo.
2 Lonike abey ty Andrianagnahare Rae naho i Jesosy Kristy Tompo mba haneho hasoa fagnahy miambake ama’areo naho hagnomey fiadagnagne anareo!
3 Ry rahalahy, mahatsapa zahay tie, mila misaotse an’Agnahare lognandro noho ty ama’areo. Mete ty anoa’ay izay, satria mihamitombo bey avao ty finoa’areo sady mitombo ka ty fifankateava’areo iaby. 4 Izay ty mahavy anareo horehareha’ay amo o fiangonan’Andrianagnahareo eo, noho ty fiareta’areo naho ty finoa’areo, agnate ze o fagnenjehagne naho o raha sarotse iaby atrehe’areo zao.* 5 Io ty porofo fa maregne ty fitsaran’Andrianagnahare, sady io ka ty mahavy anareo ho fagneva i Fanjakàn’Andrianagnaharey, i iareta’areo fijaleagney.
6 Maregne areke ty an’Agnahare naho mamale haoreagne ze mampahore anareo. 7 Fa inareo miaretse haoreagneo, le homeagne fagnamaivagnagne miarake ama’ay, naho fa habaribary boake an-dagnitse agne ty Jesosy Tompo miarake amo o anjeli’e maherio, 8 agnate ty afo mirearea ao, amy i fotoagne hampihara’e vale fate ze tsy mahafantatse an’Agnahare naho tsy mankatò ty talily soa miomba i Jesosy Tompontikagneỳ. 9 Hihatse amy iareo i saze vokatse ty lilim-pitsaragney, ndra i famonovonoagne nainai’ey, le tsy ho agnatreha i Tompo eo naho ty voninahy ty heri’e eo. 10 Amy ze fotoagne zay, naho fa ho avy mba homeagne voninahitse miarake amo o ndati’e masigneo reke, le ho gaga ze naneho finoagne aze amy ze andro zay naho fa mahatrea aze. Ho agnisa izay ka nareo, satria nino i hafatse nambara’ay anareoy.
11 Izay ty mahavy anay mivavake ho anareo lognandro, mba hahavy i Andrianagnaharentikagney hihevetse anareo ho fagneva i fikanjia’ey, sady mba hotanterahe’e iaby amy ty alala ty heri’e ze asa soa mampifale aze naho ze asa ty finoagne. 12 Amy izay homeagne voninahitse amy ty alala’areo ty agnara i Jesosy Tompontikagne naho inareo tafaharo ama’e, arake ty hasoa fagnahy miambake boake amy i Andrianagnaharentikagney naho i Jesosy Kristy Tompo.