Taratasy Voaloha’e Hoahy i Timoty
1 Ty taratasy toy le boake amy i Paoly, apostoly i Kristy Jesosy noho ty lilin’Agnahare, i Mpagnavotse antikagney, naho i Kristy Jesosy, i fanantenantikagney. 2 Hoahy i Timoty, i tena anako amy i finoagne aoy.
Lonike abey ty Andrianagnahare Rae naho i Kristy Jesosy Tompontika haneho hasoa fagnahy miambake naho famindram-po ama’o sady hagnomey fiadagnagne azo!
3 Manahake ty nandrisihako azo mba hijanogne a Efesosy agne, tamy iraho handeha ta Makedonia agney ty andrisihako azo ka amy izao, mba handilia’o ty ndaty ila’e tsy hampianatse fampianaragne hafa, 4 ndra hitsanogne tantara tsy maregne naho tantaran-drazagne. Tsy misy ilagne aze ty raha hoe ireo, fa miterake tombatombagne avao. Tsy agnisa ty raha mein’Agnahare mba hagnatanjahagne finoagne rey. 5 Ty tanjo o toromareke iohoe naho ty maregne, le ty hahavy ty ndaty iaby haneho hatea boake amy ty fo malio naho boake amy ty feo ty fieretseretagne malio vaho boake amy ty finoagne tsy misy hasoa miatreke. 6 Niala tamo o raha rehoe ty ndaty ila’e, le nandrambe anjara tamy ty rehake tsy misy dika’e. 7 Te ho mpampianatse lalàna iareo, faie tsy taka iareo ty raha rehafe iareo, ndra o raha izizoa iareo mafeo.
8 Haintika tie fanjaka i Lalànay naho ampiharegne arake ty toko’e ho ie. 9 Ty anto’e, haintikagne tie tsy natao hoahy ty ndaty maregne i lalànay, fa natao hoahy o mpandika lalànao naho o mpigoreveo, o ndaty tsy matahotse an’Agnahare naho mpanotao, o mpivalike naho mpanivetive raha masigneo, o mpamono ty rae’e naho mpamono ty rene’eo, o mpamono ndatio, 10 o mpijangajangao, o lahilahy mila lahilahio, o mpitsepake ndatio, o mpavandeo, o ndaty tsy mitagne ty vava natao’eo, naho ze kila raha hafa manohetse i fampianaragne mahasoay. 11 Ze fampianaragne zay, le mifagnarake amy i talily soa bey voninahitse ahy i Andrianagnahare falefaleỳ, i nankinegne tamakoy.
12 Mankasitrake i Kristy Jesosy Tompontikagne, i nagnomey hery ahỳ raho, satria mino reke tie azo atokisagne raho, kanao nagnankigna’e i fanompoagney, 13 ndra tie ni-mpanivetive naho ni-mpagnenjeke vaho ni-mpagnambane ndaty aza raho tie taloha. Ndra tie teo iaby zay, le nanehoagne famindram-po raho, satria noho ty tsy fahafantarako naho iraho tsy ampe finoagne ty nahavy ahy nanao ireo. 14 Faie fara izay ty bey ty hasoa fagnahy miambake naseho i Tompontikagney, naho ty finoagne vaho ty hatea amy i Kristy Jesosy ao. 15 Azo atokisagne sady fagneva ty hekegne tanterake ty rehake magnarake toy: Niavy tamy ty tontolo toy eto ty Kristy Jesosy mba hagnavotse o mpanotao, le iraho ty loha’e amo o ndaty rehoe. 16 Fa ndra tie teo zay, le nanehoagne famindram-po raho, amy izay ho amy ty alalako, i loha’e amo o mpanotaoy, ro hanehoa i Kristy Jesosy ty fahareta’e iaby. Natao ho fitsikombe hoahy ze mametrake ty finoa’e ama’e mba hahazoagne i havelogne nainai’ey ka raho.
17 Hoahy i Andrianagnahare tokagne, i Mpanjaka nainai’e, tsy mete lo naho tsy trea masoy ty haja naho ty voninahitse nainai’e nainai’e. Amena.
18 Ankineko ama’o, ihe anako Timoty ty toromareke toy, arake i faminaniagne nirehafegne miomba azoy, mba ho amy ty alala ireo ro hanohiza’o avao i aly fanjakay. 19 Amy ihe manao izaỳ, le mikezaha hitagne i finoagney naho hanagne feo ty fieretseretagne malio. Naria ty ila’e o raha rehoe, hafarà ty finoa iareo nanahake o sambo nirendrekeo. 20 Agnisa ireo ty Himeno naho i Aleksandra. Natoloko i Satana iareo, amy izay hotaka iareo amy i fandilovagne iareoy tie, tsy toko’e hanivetive iareo.