Taratasy Voaloha’e Hoahy i Timoty
3 Azo atokisagne ty rehake toy: Naho misy lahilahy mikezake ty ho mpiandraikitse, le magniry asa fanjaka reke. 2 Ty mpiandraikitse areke, le tsy toko’e hisy hokiagnegne, manambaly raike, mahay manahatsahatse amy ze raha fatao’e, misaigne soa, tea filaminagne, tea mandrambe ambahiny, mahay mampianatse, 3 tsy mamo lava, tsy tea mijera fa mahay manahatsahatse, tsy tea aly, tsy tea vola. 4 Toko’e hahay hitarike soa* ty keleia’e reke, le ty ana’e mankatò sady soa findesam-batagne. 5 (Ty anto’e, naho misy lahilahy tsy mahay mitarike ty keleia’e, le akore ty hahaia’e hikarakara o fiangonan’Agnahareo?) 6 Tsy vaho tsy ela ka reke ro nanjare mpino, tsy mone hanjare hibohaboha reke, le hahazo fagnamelohagne manahake ty niazo i Devoly. 7 Toko’e hanagne laza soa amy ty ndaty ivela’ey ka reke, amy izay tsy ho afa-baraka sady tsy hoazo ty fandry i Devoly.
8 Ty mpagnampe amy ty fiangonagne ka, le toko’e ho matotse, tsy magnovaova rehake,* mahay manahatsahatse naho fa minogne divay, tsy ndaty tsy mete afa-po amy ty fahazoagne tombo’e amy ty raha tsy maregne, 9 sady mitagne i raha mietake masigne miomba ty finoagney amy ty feo ty fieretseretagne malio.
10 Mila tsapaegne heike iareo mba hotrea tie mahafeno fepetse, vaho izay engagne hanao ty asa ty mpanompo, satria tsy misy hokiagnegne.
11 Toko’e ho matotse ka ty ampela, tsy mpagnaratiraty, mahay manahatsahatse amy ty raha fatao’e sady azo atokisagne amy ze kila raha.
12 Toko’e hanambaly raike avao ty mpagnampe amy ty fiangonagne, le hahay hitarike soa ty ana’e naho ze ndaty toboke an-tragno’e ao. 13 Ze lahilahy manompo amy ty fomba soa, le hahazo laza soa hoahy ty vata’e, sady tena tsy misalasala naho fa mirehake miomba i finoagne amy i Kristy Jesosy aoy.
14 Sorateko ama’o o raha rehoe, ndra tie mitama aza raho tie ho avy ama’o agne tsy ho ela. 15 Amy izay naho tara raho, le fa hai’o ty toko’e hatao’o amo o keleian’Agnahareo. Tsy inogne zay fa i fiangonan’Andrianagnahare velogne, i fahagne* naho tohagne hoahy ty hamaregnagney. 16 Tena tsy azo lieregne tie, lahibey i raha mietake masigne miomba i naneho fahafoezan-tegna ho an’Agnaharey: Ni-nofotse reke, nambara ho maregne naho fa nanjare fagnahy, niseho tamy ty anjely, nitoriegne tamo o firenenao, ninoagne magneneke ty tontolo toy, le nirambesegne tamam-boninahitse tan-dagnitse agne.