Taratasy Voaloha’e Hoahy i Timoty
4 Faie mirehake mazava i fagnambaragne boake amy i fagnahỳ tie, hiala amy ty finoagne ty ndaty ila’e naho fa afara agne, le hitsanogne ty fagnambaragne mamitake boake amo o fagnahio naho ty fampianara o demoniao, 2 noho ty vande rehafe o ndaty manao soa miatrekeo. Tsy ia zay, fa o hoe tinomboke vigne mae ty feo ty fieretsereta’e le tsantsagneo. 3 Mandrara tsy hanambaly iareo, sady mandily o ndatio mba tsy hihinagne ty hanegne ila’e, ie amy izao namboaren’Agnahare mba hohanegne i raha rey, le afake ty hisaotse aze ze mino naho mahafantatse soa ty hamaregnagne. 4 Ty anto’e, fanjaka iaby ze raha namboaren’Agnahare, le tsy misy toko’e holieregne naho ohatse rambesegne am-pisaoragne, 5 satria hamasignegne amy ty alala ty saontsin’Agnahare naho ty vavake i raha rey.
6 Naho mea’o o rahalahio o toromareke rehoe, le ho mpanompo fanjaka ahy i Kristy Jesosy rehe, nifahanagne tamy ty reha ty finoagne, naho i fampianaragne fanjaka fa norihe’o mariney. 7 Liero ty tantara tsy maregne, manahake o tantarae o rakembaò, fa zaro hahafoe tegna ho an’Agnahare ty vata’o, arake i tanjo’oy. 8 Ty anto’e, mahasoa kede avao o fampiasam-batagneo, fa ty fahafoezan-tegna ho an’Agnahare ro mahasoa amy ze kila raha, satria miankigne amy io ty ahazoagne i fitahiagne ampitamaegne amo o fiaignagne zao naho i fiaignagne amy ty hoavỳ. 9 Azo atokisagne ze rehake zay, sady fagneva ty hekegne tanterake. 10 Izay ty mahavy antika miasa mafe naho mifofotse mafe, satria ty fanantenantika le fa napetrantika amy i Andrianagnahare velogne Mpagnavotse ze kila ndatỳ, lohotsie fa ze tsy mivalike.
11 Meo iareo lognandro o lily rehoe sady ampianaro iareo. 12 Ao tsy hisy ndaty henga’o tsy hagnisy dika’e azo amy ty maha tanora azo. Fa mikezaha ho fitsikombe hoahy o ndaty tsy mivalikeo amy ty raha rehafegne, amy ty findesam-batagne, amy ty hatea, amy ty finoagne naho amy ty fahaliovagne. 13 Amparake ty hiaviako, le mikezaha avao amy ty vakin-teny agnatreha o ndaty maro naho amy ty fandrisihagne ty hafa vaho amy ty fampianaragne. 14 Ao tsy hohevere’o ho tsy misy dika’e i fagnomezagne nimeigne azo tamy ty alala ty faminaniagney, tamy i fotoagne nametraha o fitambaran’androanavio tagnagne tama’oy. 15 Saintsaigno soa o raha reo, le mifantoha tanterake ama’e, amy izay hotrea ty ndaty iaby ty fandrosoa’o. 16 Ambeno soa lognandro ty vata’o naho ty fampianara’o, le mahareta ka amo o raha rehoe, satria naho manao ireo rehe, le ho voavonje rehe naho ze mitsanogne azo.