Taratasy Voaloha’e Hoahy i Timoty
5 Ko kiagnegne mafe loatse o rangaheo, fa hevero manahake ty rae reke, le ty ajalahy manahake ty rahalahy, 2 le ty rakemba manahake ty rene, le ty somondrara manahake ty rahavave, amy ty fahaliovagne tanterake.
3 Anehò fiheveragne* ze vantotse vata’e.* 4 Fa naho misy vantotse managne anake ndra zafe, le ireo heike ro toko’e hanoro tie mahafoe tegna ho an’Agnahare amy ze ndaty toboke an-tragno amy iareo ao, naho hamale babeagne ty rae aman-drene iareo naho ty dadabey vaho ty bebey iareo, satria mete zay agnatrehan’Agnahare eo. 5 Ty ampela vantotse vata’e sady tsy managne ndra inogn’ino, le mitama an’Agnahare sady mihalale ama’e lognandro naho mivavake ama’e handro halegne. 6 Fa ze vantotse manao ze mahafinaritse aze avao, le hoe fa mate ndra tie velogne aza. 7 Meo iareo lognandro o toromareke rehoe, amy izay iareo tsy misy hokiagnegne. 8 Fa naho misy tsy magnomey ty raha paliae ze ndaty andraike’e ty mikarakara aze,* lohotsie fa ze agnisa ty an-tragno’e ao, le fa nandietse ty finoa’e reke sady raty ambone ty ndaty tsy manam-pinoagne.
9 Aziliho agnate lisita ka ty ampela vantotse raike naho ohatse 60 taogne miakatse, ni-raike avao ty vali’e, 10 managne laza soa amy ty fanoagne asa fanjaka, niteza soa ty ana’e, nitea nandrambe ambahiny, nanasa ty tombo o ndaty masigneo naho nagnampe ze ore sady nahafoe tegna amy ze asa soa iaby.
11 Fa o vantotse mbe tanorao tsy ampidiregne agnate lisita ao, satria naho fa mikalakalagne ty fanompoa iareo i Kristy i fagniria iareo te hila ndatỳ, le te hanambaly iareo. 12 Homelohegne ka iareo, satria tsy nitana iareo i fagnambaragne natao iareo voaloha’e miomba ty finoa’ey.* 13 Tsy misy raha atao ka iareo, fa mitsoeke tragno o ndaty, ie, tsy vita tihoe tsy manao raha avao iareo, fa mbe mpitsikotsiko ka, sady mpizilike amy ty fiaigna o ndaty naho mirehake ty raha tsy toko’e horehafe iareo. 14 Irieko mba hanambaly areke o ampela vantotse mbe tanorao, le hiterake, hikarakara ty tokantragno’e, sady tsy hanao raha mba hahavy o mpanohetseo hagnakiagne. 15 Fa nitsile aza ty ila’e naho ty maregne, le nagnorike i Satana. 16 Naho misy ampela mpino managne longo vantotse, le ireke ro hanohagne i longo’e vantotse rey mba tsy ho entagne mavesatse hoahy o fiangonagneo. Amy izay ka o fiangonagneo ho afake hanohagne ze vantotse vata’e.
17 Ze androanavy mahay mitarike, le fagneva ty hanehoagne fagnajagne bey,* lohotsie fa o miasa mafe amy ty firehafagne naho ty fampianaragneo. 18 Ty anto’e, hoe ty Soratse Masigne: “Ko fehegne ty vava o agnombeo naho fa miasa amo o tane famofoham-bareo ey”, naho tihoe, “fagneva hahazo ty karama’e o mpiasao.” 19 Ko le avy le ekegne naho misy mirehake tie, nanao raha raty o ndaty fa antetseo,* naho tsy tihoe misy porofo boake amy ty vavolombelogne roe ndra telo. 20 Anaro agnatreha ty ndaty maro eo ze zatse manota, mba ho fampitaoagne hoahy ty ila’e.* 21 Mandily mafe azo agnatrehan’Agnahare naho i Kristy Jesosy vaho o anjely jinobogneo eo raho, mba hagnorike o toromareke rehoe, le ko mitsara ivela’e ndra magnavakavake naho fa manao izay.
22 Ko meke hametrake tagnagne ndra amy ia ndra amy ia. Ko miharo tsikombakomba amy ty fahota ty ndaty hafa. Anò ka ze hahavy azo halio findesam-batagne avao.
23 Ko minogne rano sasa, fa divay kede ro inomo noho i vavoni’oy sady noho ihe tsy salama matetekeo.
24 Fanta ty ndaty iaby ty fahota ty ndaty ila’e, sady le avy le mitarike mbamy i fitsaragney mbeo. Fa ty ahy ty ndaty ila’e, afara agne vaho mibaribary. 25 Hoe izay ka, fa fanta ty ndaty iaby o asa fanjakao. Fa ndra o tsy fantatseo aza, le tsy tihoe lelia’e hietake avao.