Taratasy Voaloha’e Hoahy i Timoty
2 Ty raha lahibey voaloha’e andrisihako, le tihoe mba hisy fihalaleagne, vavake, fangatahagne naho vavake fisaoragne hatao hoahy ty karaza o ndaty iaby, 2 hoahy ty mpanjaka, naho hoahy ze managne toeragne ambone, amy izay tika hanagne fiaignagne milamigne avao naho tsy hisy hagnelengelegne, le hahafoe tegna tanterake ho an’Agnahare sady hifantoke soa naho fa manao izay.* 3 Fanjaka zay sady ankasitrahagne agnatreha i Andrianagnahare Mpagnavotse antikagney eo. 4 Ty zoton’arofo’e, le ty hahavoavonje ty karaza o ndaty iaby naho ty hahavy iareo hanagne fahalalagne maregne soa ty hamaregnagne. 5 Raike ty Andrianagnahare, le raike ka ty mpagnelagnelagne o ndatio aman’Agnahare. Tsy ia ze ndaty zay, fa i Kristy Jesosy, 6 i nanolotse ty tegna’e ho solovoigne mifandanja hoahy ty ndaty iabỳ. Hotoriegne amy ty fotoa’e ze raha zay. 7 Ty hitory ze raha zay ty anto’e nanendreagne ahy ho mpitory, ho apostoly naho ho mpagnanatse o ndaty boake amy ty firenena hafao miomba ty finoagne naho ty hamaregnagne. Mirehake ty maregne raho fa tsy mavande.
8 Irieko areke ze lahilahy amy ty toeragne iaby magnonjogne ty tagna’e magnambone mba hivavakeo, mba tsy hivalike sady tsy hanao izay aman-kabosehagne naho amy ty fandiendieragne.* 9 Irieko ka ty ampela naho fa mihamigne mba hagnisy akanjo mete soa, le ahatreavagne tie magnaja ty hafa sady misaigne soa, fa tsy amy ty randram-bolo bey hengohengo’e naho amy ty volamena, ndra perla, ndra amy ty akanjo tena lafo vily. 10 Fa naho fa mihamigne iareo, le toko’e hifagnentagne amo o ampela mirehake ho mpivavake aman’Agnahareo ty fihamina iareo. Tsy inogne zay fa ty fanoagne asa soa.
11 Mila mitsigne naho magneke tanterake o ampelao naho fa ampianaregne. 12 Tsy magnomey alalagne ty ampela mba hampianatse raho, ndra hanagne fahefagne amo o lahilahio, fa toko’e hitsigne avao reke. 13 Ty anto’e, i Adama heike ty niforognegne voaloha’e, vaho izay i Eva. 14 Tsy i Adama ka ro nivoafitake, fa i ampelay ro nivoafitake tanterake, le nanjare mpandika lalàna. 15 Faie ho voaro reke naho fa miterake, naho ohatse tsy miala amy ty finoagne naho ty hatea vaho amy ty fahamasignagne, sady misaigne soa.