Taratasy Faharoe Hoahy i Timoty
2 Naho izay areke anake, le anò avao ze hahazoa’o hery amy ty alala i hasoa fagnahy miambake amy i Kristy Jesosy aoy. 2 Le ze raha nirei’o tamako sady nihamafese ty vavolombelogne maro, le ampitao amy ty lahilahy azo atokisagne hahavita hampianatse ty hafa ka. 3 Amy ty maha maramila fanjaka i Kristy Jesosy azo, le mivognona hiatreke haoreagne mafe. 4 Tsy misy maramila hizilike amy ty raharaham-barotse amo ze o fiaignagne zao, naho tea’e ty hahazo sitrake amy i ndaty nanendre aze ho maramilay. 5 Hoe izay ka ty amo o fihisagne misy fifaninanagneo. Ze mandrambe anjara ama’e, le tsy hahazo satro-boninahitse naho tsy magnorike ty fitsipike amy i fifaninanagney. 6 Ty mpambole miasa mafe ro toko’e hahazo anjara voaloha’e amy i vokatsey. 7 Saintsaigno lognandro ty raha rehafeko. Hagnomey azo fahatakaragne ze kila raha* ty Tompo.
8 Tsiarovo fa nivelomegne tamy ty mate ty Jesosy Kristy sady tarana i Davida* reke, arake i talily soa toriekoy. 9 Noho io ty mahavy ahy miaretse haoreagne naho gadraegne manahake o ndaty mpanao ratio. Faie ndra tie eo zay, le tsy voafehe i saontsin’Agnaharey. 10 Izay ty mahavy ahy hiaretse avao ze kila raha noho ty amo o ndaty jinobogneo, amy izay ka iareo hahazo fagnavotagne amy ty alala i Kristy Jesosy naho voninahitse nainai’e. 11 Azo atokisagne ty rehake magnarake toy: Naho toe nimate niarake ama’e vata’e tika, le hovelomegne miarake ama’e ka. 12 Naho miaretse avao tika, le ho mpanjaka miarake mitondra ama’e ka. Naho mandietse aze tika, le holiere’e ka. 13 Naho mivalike tika, le ireke tsy ombia hivalike, satria tsy afake mandietse ty vata’e.*
14 Tiahivo iareo avao o raha rehoe, sady anaro agnatrehan’Agnahare eo ka iareo mba tsy hialy hevetse miomba ty rehake, satria tsy mahasoa ze raha zay, fa manimba ze mitsanogne aze. 15 Anò ze azo’o atao mba hahavy azo hankasitrahan’Agnahare, mpiasa tsy megnatse amy ty asa natao’e ndra inogne zay ndra inogne, hampianatse naho hagnazava amy ty fomba maregne soa ty reha i hamaregnagney. 16 Fa liero o rehake tsy misy dika’e manivetive raha masigneo, satria vao mainke mitarike o ndatio tsy hatahotse an’Agnahare i raha rey, 17 sady miparitake manahake o bae mitatseo ty reha iareo. Agnisa ireo ty Himeneo naho i Fileto. 18 Niala tamy i hamaregnagney o lahilahy rehoe, satria mirehake iareo tie, fa niseho i famelomagne amy ty matey, sady manimba ty finoa ty ndaty ila’e ka iareo. 19 Fa ndra tie eo zay, le mbe mijanogne eo avao i fototse mafe an’Agnaharey. Misy tampò hoe izao ty ama’e: “Ony i Jehovah ze aze”, naho tihoe, “ze ndaty mitoka ty tahina i Jehovah, le toko’e hiala amy ty tsy hamaregnagne.”
20 Tsy fitaovagne vita tamy ty volamena naho volafotsy avao ty agnate ty tragno bey raike ao, fa misy ka ty vita amy ty hatae naho tane. Le ty ila’e natao hampiasaegne amy ty raha misy haja’e, fa ty ila’e natao hampiasaegne amy ty raha tsy le misy haja’e. 21 Naho misy ndaty areke magnalavitse o fara’e rehoe, le ho fitaovagne natao hampiasaegne amy ty raha misy haja’e reke, masigne, mahasoa i tompo’ey sady vognogne amy ze hene asa soa. 22 Ilaiso areke o fagniriagne mpahazo o tanoraò, fa mikezaha hanagne ty toetse retoa: Hamaregnagne, finoagne, hatea, fiadagnagne* miarake amo o ndaty mitoka i Tompo amy ty fo maliò.
23 Ialao o aly hevetse gegegege naho tsy misy dika’eo, satria hai’o tie miterake aly i raha rey. 24 Ty anto’e, tsy toko’e hialy ty mpanompo i Tompo, fa toko’e ho soa fagnahy amy ty ndaty iaby, hahay hampianatse, hahafehe tegna naho fa misy raha raty, 25 sady hampianatse am-pahalemem-pagnahy o ndaty tsy mora magneke torohevetseo, kera ty Andrianagnahare hagnenga iareo hibebake, le hahafantatse soa ty hamaregnagne iareo 26 sady ho tonga saigne, le hovotsotse amy ty fandry i Devoly, i nitsepake iareo velogne mba hanao ty sitrapo’ey.