Taratasy Faharoe Hoahy i Timoty
4 Mandily mafe azo raho agnatrehan’Agnahare naho i Kristy Jesosy eo, i mitsara ty velogne naho ty matey, sady amy ty alala ty fisehoa’e naho amy i Fanjakà’ey tie: 2 Torio i saontsỳ, sady anò tsy misy hatake andro, ndra amy ty mora zay ndra amy ty sarotse. Magnitsia, mampitaoa, mandrisiha, le anò am-paharetagne naho manahake o mpampianatse mahaio zay. 3 Ty anto’e, ho avy ty fotoagne tsy hahatanteza iareo i fampianaragne mahasoay, fa hagnorike ze teatea’e avao iareo, le hipay mpampianatse hirehake ze raha tea iareo horey.* 4 Tsy hitsanogne i hamaregnagney sasa iareo, fa ndra aleo iareo mitsanogne o tantara tsy maregneo. 5 Fa irehe, misaigna soa lognandro amy ze kila raha, miareta raha sarotse, anò ty asa i mpitory i talily soay, sady anò soa ty fanompoa’o.
6 Fa nailigne manahake o raha inomegne atao fagnatetseo raho, sady fa marine ty fotoagne hagnafahagne ahy. 7 Fa nialy i aly fanjakay raho, fa nahavita ty laiko hatrake am-para’e, sady nagnorike i finoagney avao. 8 Manomboke amy izao, le tamiriegne ho ahy i satro-boninahy ty hamaregnagne, i homey i Tompo, i mpitsara maregneỳ, mba ho valesoako amy ze andro zay. Faie tsy iraho avao ty homea’e izay, fa ze nitea i fisehoa’ey ka.
9 Anò ze azo’o atao mba hiaviagne amako atoy malaky. 10 Ty anto’e, fa nienga ahy ty Demasy, satria nanjare nitea ty tontolo toy, sady fa nandeha a Tesalonika agne reke. I Kreska nandeha ta Galatia agne, le i Titosy nandeha ta Dalmatia agne. 11 I Lioka raike avao ty amako eto amy izao. Indeso miarake ama’o ka ty Marka, satria tena magnampe ahy amy ty fanompoagne reke. 12 Fa i Tikiko niraheko ta Efesosy agne. 13 Naho fa mbetoa rehe, le ento i palito beiko nengako tamy i Karpo a Troasy agney. Indeso ka i horognam-boke rey, lohotsie fa i horognam-boke holitse rey.
14 Nampijale mafe ahy ty Aleksandra mpanefe saba. I Jehovah abey hamale aze, arake ty raha natao’e. 15 Mitaoa ka rehe ama’e, satria reke manohetse mafe ty raha rehafe’ay.
16 Tamy i fiarovan-tegnako voaloha’ey, le tsy mba nisy niavy nanohagne, fa le nienga ahy iaby iareo. Lonike abey mba tsy hisahegne ho hadisoa iareo zay. 17 Faie i Tompo nitsangagne tagnilako teo, le nagnomey hery ahy, amy izay raho hahavita i fitoriagney soa, sady amy ty alalako ro hahareiza ty firenena iaby aze. Navota i Tompo boake am-bava i lionay eo ka raho. 18 Handrombake ahy amy ze hene asa raty ty Tompo, sady hagnavotse ahy reke, noho i Fanjakà’e an-dagnitse agney. Ho aze abey ty voninahitse nainai’e nainai’e. Amena.
19 Mampamangy amy i Priska naho i Akoila vaho amy ze an-tragno i Onesiforosy ao.
20 Nijanogne a Korinto agne ty Erasto, fa i Trofimo nengako a Mileto agne, satria narare. 21 Anò ze azo’o atao mba hiaviagne atoy, aloha i asotrỳ.
Mampamangy azo ty Eobolo, i Poda, i Lino, i Klaodia naho ty rahalahy iaby.
22 Hitahy azo abey ty Tompo noho ty toe-tsaigne aseho’o. Ho ama’o abey i hasoa fagnahi’e miambakey.