Taratasy Faharoe Hoahy i Timoty
1 Ty taratasy toy le boake amy i Paoly, apostoly i Kristy Jesosy noho ty zoton’arofon’Agnahare, sady mifagnarake amy i fampitamagne havelogne azo amy ty alala i Kristy Jesosỳ. 2 Hoahy i Timoty anako tena teako:
Lonike abey mba haneho hasoa fagnahy miambake ama’o naho hamindra fo ama’o vaho hagnomey fiadagnagne azo ty Andrianagnahare Rae naho i Kristy Jesosy Tompontikagne.
3 Misaotse an’Andrianagnahare, i anoako fanompoagne masigne manahake ty nataon-drazakoy raho, sady amy ty feo ty fieretseretagne malio ty anoako aze. Lava mahatsiaro azo avao raho, amy iraho mihalale handro halegney. 4 Naho fa mahatsiaro i ranomaso’oy raho, le te hahatrea azo mafe, amy izay ho feno ty fifaleako. 5 Ty anto’e, tsy halignoko i finoagne tsy misy hasoa miatreke anagna’oy, i nanagna i Loisa bebei’o naho i Eonika rene’oy, faie matoky raho fa mbe ama’o ao ka io.
6 Izay ty mahavy ahy maniahy azo tie, ampirebarebao manahake o afò i fagnomezan’Agnahare ama’o aoy, i niazo’o naho fa iraho nametra-tagnagne ama’oy. 7 Ty anto’e, i Andrianagnahare tsy nagnomey antika fagnahy ty havotroagne, fa fagnahy ty hery naho hatea vaho fahaiagne misaigne. 8 Ko megnatse ty hagnambara ty miomba i Tompontikagney areke, ndra ho megnatse noho ty amako satria raho gadraegne noho ty ama’e, fa mivognona hiatreke haoreagne noho i talily soay, le miantehera amy ty fagnahin’Andrianagnahare. 9 Nagnavotse naho nikanjy antika tamy ty fikanjiagne masigne reke, tsy noho ty asantika, fa noho ty fikasa’e manokagne naho ty hasoa fagnahi’e miambake. Tamy ty alala i Kristy Jesosy ty nagnomeagne io antika, taloha ela bey tagne. 10 Faie fa mibaribary soa reke amy hinane zao, amy ty alala ty fagnatreha i Mpagnavotse antikagney, tsy ia zay fa i Kristy Jesosy. Fa nifoagna’e o fateo sady fa nihazavae’e tamantikagne tamy ty alala i talily soay ty miomba i fiaignagney naho i vatagne tsy mete lo oy. 11 Ty hagnambara izay ty nanendrea’e ahy ho mpitory naho apostoly vaho mpampianatse.
12 Izay ka ty mahavy ahy miaretse o raha rehoe, faie tsy megnatse raho. Ty anto’e, haiko i inoakoy sady matoky raho fa hovita’e ty hiambegne i raha iaby nankineko tama’ey, amparake ty hiavia ze andro zay. 13 Ipiteho avao i modely ty rehake mahasoa nirei’o tamakoy, le manehoa finoagne naho hatea avao, manahake o ndaty tafaharo amy i Kristy Jesosio. 14 Ambeno amy ty alala i fagnahy masigne agnatentikagne aoy o raha fanjaka nankinegne tama’o iohoe.
15 Fa hai’o tie, nienga ahy iareo iaby amy ty faritse a Azia agneo. Agnisa izay ty Figelo naho i Hermogena. 16 Lonike abey ty Tompo haneho famindram-po amy ze ndaty mitoboke an-tragno i Onesiforosy ao, satria namelombelogne ahy mateteke reke, sady tsy natao’e hahamegnatse aze ty hagadrako. 17 Ireke aza nikodebe ahy mafe tamy ireke ta Roma agney, le nahatrea ahy. 18 Lonike abey ty Tompo hanao ze hahazoa’e famindram-po boake amy i Jehovah amy ze andro zay. Hai’o soa ka ty fanompoagne iaby natao’e ta Efesosy agne.