Hoahy i Titosy
1 Ty taratasy toy le boake amy i Paoly, mpanompon’Agnahare naho apostoly i Jesosy Kristy, arake ty finoa o ndaty jinobon’Agnahareo naho i fahalalagne maregne soa ty hamaregnagney, i mifagnarake amy ty fahafoezan-tegna ho an’Agnahare 2 naho mioregne amy ty fampitamagne havelogne nainai’ey. Nampitamae i Andrianagnahare tsy mahay mandagnitsey zay, sady fa ela reke ro nampitama aze. 3 Faie tamy ty fotoagne fa tinondro’e, le nampahafantare’e ty saontsi’e tamy ty alala i fitoriagne nankigne’e tamakoy, arake ty lily i Andrianagnahare Mpagnavotse antikagney. 4 Hoahy i Titosy, i tena anakoy, arake i finoagne iombognantikagney.
Ho ama’o abey i hasoa fagnahy miambake naho i fiadagnagne boake amy i Andrianagnahare Rae naho i Kristy Jesosy Mpagnavotse antikagney.
5 Nengako ta Kreta agne rehe mba hagnitsy ty raha tsy mete agne sady hanendre androanavy isake tanàgne, arake i toromareke nimeiko azoy, 6 naho ohatse misy lahilahy tsy misy hokiagnegne, manambaly raike, mpino ty ana’e sady tsy malaza ho magnaram-po amy ty raha raty ndra mpigoreve. 7 Ty anto’e, mpanompon’Agnahare o mpiandraikitseo, le toko’e tsy misy hokiagnegne, tsy bey zizo, tsy mora boseke, tsy mamo lava, tsy tea mijera, tsy ndaty tsy mete afa-po amy ty fahazoagne tombo’e amy ty raha tsy maregne, 8 fa tea mandrambe ambahiny, tea ty soa, mahay mandineke, maregne, tsy mivalike, mahafehe tegna. 9 Toko’e hotrea amy ty fomba fampianara’e fa mitagne mafe i reha ty finoagney reke, amy izay hohai’e ty hampahery* ty hafa amy ty alala i fampianaragne mahasoay naho hagnanatse ze manohetse.
10 Ty anto’e, maro ty mpigoreve, mpanao rehake tsy misy dika’e, mpamitake, lohotsie fa o mipiteke amo o fanapahagneò. 11 Mila hiliagne ty vava o lahilahy rehoe, satria iareo tsy mitofa fa lava manimba ty keleiagne iaby avao amy ty alala ty fampianaragne ty raha tsy toko’e hampianaregne, mba hahazoa iareo tombo’e. 12 Misy mpaminany firenena raike amy iareo zay nirehake tie: “Mpavande avao o Kretanao, bibihako masiake sady tea hanegne.”
13 Maregne ze fagnambaragne zay. Izay ty anto’e mahavy azo toko’e hagnanatse mafe iareo avao mba hahavy iareo hatanjake amy ty finoagne, 14 naho tsy hitsanogne ty talily o Jiosio vaho ty lily o ndaty niala tamy i hamaregnagneio. 15 Amy ty ndaty malio, le malio ze kila raha. Fa amy ty ndaty maloto naho tsy manam-pinoagne, le tsy misy raha malio zao. Ty anto’e, sambe maloto ndra ty say iareo ndra ty feo ty fieretsereta iareo. 16 Agnatreha o ndaty eo iareo, le mirehake tie mahafantatse an’Agnahare, faie ty raha atao iareo,* le ahatreavagne tie mandietse aze iareo. Ty anto’e, mampangorigne iareo, tsy mankatò sady tsy mahafeno fepetse hanao ze asa soa iaby.