Hoahy i Titosy
2 Fa irehe, ze raha mifagnarake amy i fampianaragne mahasoay avao ro rehafo lognandro. 2 Risiho o rangaheo mba hahay hanahatsahatse amy ty raha fatao’e, ho matotse, hisaigne soa, hatanjake amy ty finoagne, amy ty hatea naho amy ty fiaretagne. 3 Risiho ka o rakembao mba hanagne findesam-batagne magnomey voninahitse an’Agnahare, fa tsy ho mpandratiraty, tsy hoandevoze o divaio, fa ho mpagnanatse raha soa. 4 Amy izay iareo ho afake hanoro hevetse o ampela tanorao mba hotea ty vali’e, hotea ty ana’e, 5 hisaigne soa, halio findesam-batagne, hazoto hanao tolon-draha, hanao ty soa, hagneke ty vali’e, mba tsy hahavy ty saontsin’Agnahare hisy hagnaraty.
6 Risiho avao ka o lahilahy tanorao mba hisaigne soa 7 sady atorò tie fitsikombe soa rehe amy ty asa fanjaka sambe karaza’e. Raha malio ro ampianaro, sady anò am-pahamatoragne, 8 le i rehake mahasoa tsy azo kiagnegney ro ampiasao, amy izay ho megnatse o mpanohetseo sady tsy hisy raha raty horehafe iareo miomba antika. 9 Risiho ka o mpanompò mba hagneke ty tompo iareo amy ze kila raha naho hanao ze hampifale aze fa tsy hamalevale aze, 10 tsy hangalatse fa hanoro tie azo atokisagne tanterake, amy izay iareo hagnengo i fampianara i Andrianagnahare Mpagnavotse antikagney amy ze kila raha.
11 Ty anto’e, fa naseho i hasoa fagnahy miambake boake aman’Agnaharey, i minday fagnavotagne hoahy ty karaza o ndaty iabỳ. 12 Mampiofagne antikagne io mba handietse ze hene raha tsy mifagnarake amy ty zoton’arofon’Agnahare naho ty fagniria ty tontolo toy, sady hanoro amy ty fomba fiaignantika tie ndaty misaigne soa, maregne naho mahafoe tegna ho an’Agnahare amy ty tontolo toy eto. 13 Izay ty ataontika, amy itika mandigne i fanantenagne mahafale naho ty fisehoagne bey voninahy i Andrianagnahare lahibeỳ naho i Jesosy Kristy Mpagnavotse antikagney. 14 Nahafoe ty tegna’e ho antika reke mba hagnafahagne antika amy ze karazam-pandikan-dalàna naho mba hagnaliova’e vahoake ho aze manokagne hazoto amy ty asa fanjaka.
15 Rehafo avao o raha rehoe, sady ko mitofa ty mandrisike naho magnitsy ty hafa, satria fa nimeagne fahefagne feno hanao izay rehe. Ao tsy hisy ndaty henga’o tsy hagnisy dika’e azo.