Hoahy i Filemona
1 Ty taratasy toy le boake amy i Paoly, gadra noho i Kristy Jesosy, naho i Timoty rahalahintikagne. Hoahy i Filemona mpiara-miasa tea’ay, 2 naho hoahy i Apia rahavave’ay, naho hoahy i Arkipo maramila raike ama’ay, vaho hoahy i fiangonagne an-tragno’o aoy.
3 Ho ama’areo abey i hasoa fagnahy miambake naho i fiadagnagne boake amy i Andrianagnahare Raentikagne naho i Jesosy Kristy Tompoy.
4 Misaotse i Andrianagnaharekoy lognandro raho naho fa mirehake ty miomba azo amy ty vavake ataoko, 5 satria lava maharey miomba ty finoa’o naho ty hatea’o i Jesosy Tompo vaho ty hatea’o o ndaty masigneo iaby raho. 6 Mivavake raho mba handrisike azo hahatakatse ze raha soa azontika amy ty alala i Kristy, i finoagne iombona’o amy ty hafay. 7 Tena nifale raho sady nahazo fampionognagne naho fa naharey ty hatea’o, satria nivelombelogne ty fo o ndaty masigneo, noho ty ama’o rahalahy.
8 Ndra tie managne fahasahiagne bey amy i Kristy ao handily azo mba hanao ty raha toko’e hatao aza raho, 9 le ndra aleoko mihalale ama’o noho ty hatea, satria iraho Paoly fa antetse sady amy izao ka raho le gadraegne noho ty amy i Kristy Jesosy. 10 Mihalale ama’o raho noho ty amy i Onesimosy anako, satria nanjare rae’e raho, amy iraho am-pirizò ato zao. 11 Tsy nahasoa azo reke tie taloha, fa amy izao reke mahasoa azo naho mahasoa ahy. 12 Ahereko ama’o agne areke reke. Tena mamy ty foko reke.
13 Teako ho nitanagne amako eto avao reke, amy izay ho nisolo ty fanompoagne toko’e ho natao’o ho ahy, amy iraho gadraegne noho i talily soay zao. 14 Faie tsy te hanao ndra inogn’ino raho naho tsy mahazo alalagne boake ama’o, amy izay ty raha soa atao’o tsy ho an-tere, fa an-tsitrapo. 15 Va’e noho izao varagne nahavy aze nilay azo tagnate ty fotoagne kedekedeo, amy izay reke hiheregne ama’o agne nainai’e, 16 tsy ho mpanompo sasa, fa mihoatse noho o mpanompò, satria fa rahalahy teagne reke, lohotsie fa ho ahike. Faie mbe ambone izay ty azo, ndra amy ty nofotse ndra amy i Tompo ao. 17 Naho hevere’o ho nama’o areke raho, le rambeso aman-kasoa fagnahy reke manahake ty ho nandrambesa’o ahy. 18 Ankoatse izay, naho nisy raha tsy mete natao’e tama’o ndra misy raha mila aloa’e ama’o, le anò agnisa ty trosako zay. 19 Iraho Paoly ty nanoratse toy amy ty tagnako: Iraho ty hagnavake izay ... Toe iraho tsy te hirehake ama’o anio tie, toko’e havaha’o amako ndra ty nagnavotako o vata’ò aza. 20 Ie, lonike rahalahy mba hahazo ze fagnampeagne zay boake ama’o raho noho ty amy i Tompo; velombelomo ty foko noho ty amy i Kristy.
21 Matoky raho fa hatao’o ze raha angataheko ama’o, le izay mahavy ahy manoratse ama’ò. Ie, hanao mihoatse izay aza rehe. 22 Faie magnomana toeragne hivantagnako ka, satria mitama raho fa haheregne ama’areo agne noho ty vavake atao’areo.
23 Mampamangy azo ty Epafra, i mpiara-migadra amako noho ty amy i Kristy Jesosỳ. 24 Le hoe izay ka ty Marka, i Aristarko, i Demasy naho i Lioka, i mpiara-miasa amako rey.
25 Ho amy ty toe-tsaigne aseho’areo abey i hasoa fagnahy miambake boake amy i Jesosy Kristy Tompoy.