LESOGNE 11

Mikezaha Hafana Fo

Romanina 12:11

TY DIKA IZAY: Mikezaha hafana fo naho fa mirehake, amy izay i ndatỳ hazoto hampihatse i raha rehafe’oy.

Engao hanohigne ty fo’o hey i foto-kevetsey. Naho fa magnomagne ty foto-kevetse horehafe’o rehe, le saintsaigno mialoha tie nagnino o raha hohazavae’o iohoe ro ilaegne. Mikezaha hagnomagne soa, mba ho trea i ndatỳ fa vokatse ty fo’o ty raha rehafe’o.
Eretsereto ty soa horambese i ndatỳ boake ama’e. Saintsaigno ty soa horambese i ndatỳ boake amy ty raha hovakie’o ndra ty raha hampianare’o aze. Afara izay, le dineho tie inogne ty azo’o atao mba hazava soa amy i ndatỳ zay.
Ko atao mampiroro ty fagnazava’o. Mikezaha hafana fo naho fa mirehake. Ko amboamboaregne ty fihetse’o, fa ze tena fihetseham-po tsapa’o ro aboaho.

Ko atao mitovy iaby ty fihetsehagne atao’o. Naho izay, le i fihetse’oy ro ifantoha i ndatỳ. Anò mifagnarake amy ty raha rehafe’o ty fihetseke atao’o. Toko’e hisy dika’e ty fihetseke atao’o. Toko’e hafana fo rehe lohotsie naho fa mirehake hevetse lahibey ndra mandrisike i ndatỳ hampihatse torohevetse. Faie ko mafana fo losotse loatse, fa manjare ho entsake ty fitsanognagne azo i ndatỳ.