దినవృత్తాంతాలు రెండో గ్రంథం

24 యెహోయాషు రాజైనప్పుడు అతనికి ఏడేళ్లు.+ అతను యెరూషలేములో 40 సంవత్సరాలు పరిపాలించాడు. అతని తల్లి బెయేర్షెబాకు+ చెందిన జిబ్యా. 2 అతను యాజకుడైన యెహోయాదా బ్రతికున్నంత కాలం యెహోవా దృష్టిలో సరైనది చేస్తూ ఉన్నాడు.+ 3 యెహోయాదా అతనికి ఇద్దరు స్త్రీలతో పెళ్లి చేశాడు. అతనికి కుమారులు, కూతుళ్లు పుట్టారు.

4 కొంతకాలం తర్వాత యెహోయాషు, యెహోవా మందిరాన్ని బాగుచేయాలని+ తన హృదయంలో కోరుకున్నాడు. 5 అప్పుడు అతను యాజకుల్ని, లేవీయుల్ని పిలిపించి, వాళ్లతో ఇలా అన్నాడు: “ప్రతీ సంవత్సరం మీ దేవుని మందిరాన్ని బాగుచేయడానికి, మీరు యూదా నగరాలకు వెళ్లి ఇశ్రాయేలీయులందరి దగ్గర డబ్బులు సేకరించండి;+ మీరు ఈ పనిని వెంటనే చేయండి.” కానీ లేవీయులు ఆ పనిని వెంటనే చేయలేదు.+ 6 కాబట్టి యెహోయాషు రాజు ముఖ్య యాజకుడైన యెహోయాదాను పిలిచి అతనితో ఇలా అన్నాడు:+ “సాక్ష్యపు గుడారం+ కోసం యెహోవా సేవకుడైన మోషే ఆజ్ఞాపించిన పవిత్రమైన పన్నును+ అంటే ఇశ్రాయేలు సమాజం ఇవ్వాల్సిన పవిత్రమైన పన్నును యూదా, యెరూషలేముల నుండి తీసుకురమ్మని నువ్వు లేవీయుల్ని ఎందుకు అడగలేదు? 7 ఆ దుష్టురాలైన అతల్యా+ కుమారులు సత్యదేవుని మందిరంలోకి చొరబడి,+ యెహోవా మందిరంలోని పవిత్రమైన వస్తువులన్నిటినీ బయలు దేవుళ్ల కోసం ఉపయోగించారు.” 8 రాజు ఆజ్ఞాపించినట్టు వాళ్లు ఒక పెట్టెను+ చేయించి, దాన్ని బయట యెహోవా మందిర ద్వారం దగ్గర ఉంచారు.+ 9 తర్వాత, ఎడారిలో సత్యదేవుని సేవకుడైన మోషే ఇశ్రాయేలీయులకు విధించిన పవిత్రమైన పన్నును+ యెహోవా దగ్గరికి తీసుకురమ్మని యూదా, యెరూషలేము అంతటా చాటించారు. 10 అధిపతులందరూ, ప్రజలందరూ సంతోషంగా+ విరాళాలు తెస్తూ పెట్టె నిండేంతవరకు* దానిలో వేస్తూ వచ్చారు.

11 లేవీయులకు ఆ పెట్టెలో చాలా డబ్బులు కనిపించినప్పుడల్లా వాళ్లు దాన్ని రాజు దగ్గరికి తెచ్చేవాళ్లు. అప్పుడు రాజు కార్యదర్శి, ముఖ్య యాజకుని అధికారి వచ్చి ఆ పెట్టెను ఖాళీ చేసేవాళ్లు.+ తర్వాత దాన్ని దాని స్థానంలో పెట్టేవాళ్లు. వాళ్లు ప్రతీరోజు అలా చేసేవాళ్లు. అలా వాళ్లు విస్తారంగా డబ్బు సమకూర్చారు. 12 రాజు, యెహోయాదా ఆ డబ్బును యెహోవా మందిర పనిని పర్యవేక్షిస్తున్నవాళ్లకు ఇచ్చేవాళ్లు. వాళ్లు ఆ డబ్బుతో యెహోవా మందిరాన్ని బాగుచేయడానికి రాళ్లు చెక్కేవాళ్లను, నైపుణ్యంగల పనివాళ్లను, అలాగే యెహోవా మందిరాన్ని బాగుచేయడానికి+ ఇనుము, రాగి పనివాళ్లను కూలికి తెచ్చేవాళ్లు. 13 పర్యవేక్షకులు పనిని ప్రారంభించారు, వాళ్ల పర్యవేక్షణలో మరమ్మతు పని కొనసాగింది. వాళ్లు సత్యదేవుని మందిరాన్ని మునుపటి స్థితికి తీసుకొచ్చి దాన్ని పటిష్ఠం చేశారు. 14 వాళ్లు ఆ పని పూర్తిచేయగానే, మిగిలిన డబ్బును రాజు దగ్గరికి, యెహోయాదా దగ్గరికి తీసుకొచ్చారు. వాళ్లు ఆ డబ్బును యెహోవా మందిరం కోసం పాత్రల్ని, పరిచారం కోసం, అర్పణల కోసం ఉపయోగించే పాత్రల్ని, వెండి-బంగారు గిన్నెల్ని, పాత్రల్ని+ చేయించడానికి ఉపయోగించారు. యెహోయాదా బ్రతికున్నంత కాలం యెహోవా మందిరంలో ప్రతీరోజు దహనబలులు+ అర్పించబడుతూ ఉండేవి.

15 యెహోయాదా చాలాకాలం జీవించి ముసలివాడై తృప్తిగా చనిపోయాడు; చనిపోయినప్పుడు అతని వయసు 130 ఏళ్లు. 16 అతను సత్యదేవునికి, ఆయన మందిరానికి సంబంధించి ఇశ్రాయేలులో మంచిపనులు చేశాడు+ కాబట్టి అతన్ని దావీదు నగరంలో రాజులతోపాటు పాతిపెట్టారు.+

17 యెహోయాదా చనిపోయిన తర్వాత యూదా అధిపతులు రాజు దగ్గరికి వచ్చి అతనికి సాష్టాంగపడ్డారు, రాజు వాళ్ల మాట విన్నాడు. 18 ప్రజలు తమ పూర్వీకుల దేవుడైన యెహోవా మందిరాన్ని విడిచిపెట్టి పూజా కర్రల్ని,* విగ్రహాల్ని పూజించడం మొదలుపెట్టారు. దాంతో వాళ్ల అపరాధం కారణంగా యూదా మీదికి, యెరూషలేము మీదికి దేవుని కోపం వచ్చింది. 19 యెహోవా వాళ్లను మళ్లీ తన దగ్గరికి తీసుకురావడానికి ప్రవక్తల్ని పంపిస్తూ ఉన్నాడు. ఆ ప్రవక్తలు వాళ్లను హెచ్చరిస్తూ* ఉన్నా వాళ్లు వినడానికి ఇష్టపడలేదు.+

20 యాజకుడైన యెహోయాదా కుమారుడు+ జెకర్యా మీదికి దేవుని పవిత్రశక్తి వచ్చింది.* అప్పుడు అతను ప్రజల కన్నా కాస్త ఎత్తులో నిలబడి వాళ్లతో ఇలా అన్నాడు: “సత్యదేవుడు చెప్తున్నదేమిటంటే, ‘మీరు యెహోవా ఆజ్ఞల్ని ఎందుకు మీరుతున్నారు? మీరు వర్ధిల్లరు! మీరు యెహోవాను విడిచిపెట్టారు కాబట్టి ఆయన కూడా మిమ్మల్ని విడిచిపెడతాడు.’ ”+ 21 అప్పుడు వాళ్లు అతని మీద కుట్రపన్ని,+ రాజాజ్ఞ ప్రకారం అతన్ని యెహోవా మందిరంలోని ప్రాంగణంలో రాళ్లతో కొట్టి చంపారు.+ 22 అలా యెహోయాషు రాజు, జెకర్యా తండ్రైన యెహోయాదా తనమీద చూపించిన విశ్వసనీయ ప్రేమను మర్చిపోయి, అతని కుమారుణ్ణి చంపాడు. జెకర్యా చనిపోతూ ఇలా అన్నాడు: “యెహోవా దీన్ని చూసి, నిన్ను లెక్క అడగాలి.”+

23 సంవత్సరం ప్రారంభంలో* సిరియా సైన్యం యెహోయాషు మీదికి వచ్చింది. వాళ్లు యూదా మీద, యెరూషలేము మీద దాడిచేశారు.+ వాళ్లు ప్రజల అధిపతులందర్నీ చంపారు,+ వాళ్లు తమ దోపుడుసొమ్ము అంతటినీ దమస్కు రాజుకు పంపించారు. 24 దండెత్తిన సిరియా సైన్యంలో కొంతమందే ఉన్నా, యెహోవా వాళ్ల చేతికి చాలా పెద్ద సైన్యాన్ని అప్పగించాడు.+ ఎందుకంటే ప్రజలు తమ పూర్వీకుల దేవుడైన యెహోవాను విడిచిపెట్టారు; కాబట్టి వాళ్లు* యెహోయాషును శిక్షించారు. 25 వాళ్లు అతని దగ్గర నుండి వెళ్లినప్పుడు (ఎందుకంటే వాళ్లు అతన్ని తీవ్రంగా గాయపర్చారు*), అతని సేవకులు అతని మీద కుట్రపన్నారు. ఎందుకంటే అతను యాజకుడైన యెహోయాదా కుమారుల* రక్తాన్ని చిందించాడు.+ వాళ్లు అతన్ని అతని మంచం మీదే చంపారు.+ వాళ్లు అతన్ని దావీదు నగరంలో+ పాతిపెట్టారు కానీ రాజుల సమాధుల్లో పాతిపెట్టలేదు.+

26 అతని మీద కుట్రపన్నినవాళ్లు+ ఎవరంటే: అమ్మోనీయురాలైన షిమాతు కుమారుడు జాబాదు, మోయాబీయురాలైన షిమ్రీతు కుమారుడు యెహోజాబాదు. 27 అతని కుమారుల్ని గురించిన, అతనికి వ్యతిరేకంగా చెప్పబడిన తీర్పుల గురించిన,+ సత్యదేవుని మందిరం బాగుచేయడం+ గురించిన విషయాలన్నీ రాజుల గ్రంథంలోని రాతల్లో* నమోదు చేయబడ్డాయి. అతని స్థానంలో అతని కుమారుడు అమజ్యా రాజయ్యాడు.