రెండో కొరింథీయులు
3 మమ్మల్ని మేము మళ్లీ కొత్తగా సిఫారసు చేసుకోవడం మొదలుపెట్టామా? వేరేవాళ్లలా మా గురించిన సిఫారసు ఉత్తరాలు మీకు చూపించాలా, లేక మీ నుండి మాకు సిఫారసు ఉత్తరాలు అవసరమా? 2 నిజానికి, మీరే మా సిఫారసు ఉత్తరం;+ ఈ ఉత్తరం మా హృదయాల మీద చెక్కబడింది, అది మనుషులందరికీ తెలుసు, వాళ్లు దాన్ని చదువుతున్నారు. 3 మా పరిచర్య ద్వారా మేము రాసిన క్రీస్తు ఉత్తరం మీరే అని స్పష్టమౌతోంది. అది సిరాతో రాయబడలేదు కానీ జీవంగల దేవుని పవిత్రశక్తితో చెక్కబడింది; రాతి పలకల+ మీద కాదు, హృదయాల మీద చెక్కబడింది.+
4 క్రీస్తు ద్వారా దేవుణ్ణి బట్టి మాకు ఈ నమ్మకం ఉంది. 5 మా సొంత శక్తితో మేము ఈ పనికి అర్హులమయ్యామని అనట్లేదు, మమ్మల్ని అర్హుల్ని చేసింది దేవుడే.+ 6 ఆయన వల్లే మేము కొత్త ఒప్పందానికి*+ పరిచారకులుగా ఉండడానికి అర్హులమయ్యాం, రాతపూర్వక ధర్మశాస్త్ర నిర్దేశం కింద కాకుండా పవిత్రశక్తి నిర్దేశం కింద సేవచేస్తున్నాం; ఎందుకంటే రాతపూర్వక ధర్మశాస్త్రం మరణానికి గురిచేస్తుంది,+ కానీ పవిత్రశక్తి బ్రతికిస్తుంది.+
7 రాతి పలకల మీద చెక్కబడి+ మరణానికి గురిచేసే ధర్మశాస్త్రమే ఎంత మహిమతో వచ్చిందంటే, మోషే ముఖం మీద ప్రకాశించిన ఆ మహిమ కారణంగా ఇశ్రాయేలీయులు అతని ముఖాన్ని చూడలేకపోయారు. కనుమరుగైపోయే మహిమతో వచ్చిన ధర్మశాస్త్రానికే అంత మహిమ ఉంటే, 8 పవిత్రశక్తితో చేసే పరిచర్యకు ఇంకెంత మహిమ ఉండాలి?+ 9 శిక్షకు గురిచేసే ధర్మశాస్త్రమే+ మహిమగలదిగా ఉంటే,+ నీతిని కలగజేసే పరిచర్య+ ఇంకెంత మహిమగలదిగా ఉండాలి? 10 నిజానికి, ఇప్పుడున్నదాని గొప్ప మహిమ కారణంగా, ఒకప్పుడు మహిమగలదిగా చేయబడినదాని మహిమ తొలగిపోయింది.+ 11 ఎందుకంటే, కనుమరుగైపోయేదే మహిమతో వచ్చిందంటే,+ నిలిచివుండే దానికి ఇంకెంత మహిమ ఉండాలి!+
12 మనకు ఇలాంటి నిరీక్షణ+ ఉంది కాబట్టే చాలా ధైర్యంగా మాట్లాడుతున్నాం. 13 కనుమరుగైపోయే దానికి ఏమౌతుందో ఇశ్రాయేలీయులకు కనబడకుండా మోషే తన ముఖం మీద ముసుగు వేసుకునేవాడు. మేము అతనిలా చేయట్లేదు. 14 వాళ్ల మనసులు మొద్దుబారాయి. నేటికీ పాత ఒప్పందం* చదువుతున్నప్పుడు ఆ ముసుగు వాళ్ల మనసుల మీద అలాగే ఉంటుంది.+ ఎందుకంటే క్రీస్తు మీద విశ్వాసం ఉంచడం ద్వారా మాత్రమే అది తొలగిపోతుంది.+ 15 నిజం చెప్పాలంటే, నేటికీ మోషే పుస్తకాలు చదువుతున్నప్పుడల్లా+ వాళ్ల హృదయాల మీద ముసుగు ఉంటుంది.+ 16 కానీ ఒక వ్యక్తి యెహోవా* వైపు తిరిగినప్పుడు ఆ ముసుగు తొలగిపోతుంది.+ 17 యెహోవా* అదృశ్యుడు.*+ యెహోవా* పవిత్రశక్తి ఎక్కడ ఉంటుందో అక్కడ స్వేచ్ఛ ఉంటుంది.+ 18 మనమంతా ముసుగులేని ముఖాలతో అద్దాల్లా యెహోవా* మహిమను ప్రతిఫలిస్తున్నాం. మనం అంతకంతకూ ఎక్కువ మహిమను ప్రతిఫలిస్తూ, అదృశ్యుడైన* యెహోవా* మనల్ని ఎలా మారుస్తున్నాడో* సరిగ్గా అలాగే, ఆయన ప్రతిబింబంలాగే మారుతున్నాం.*+