గలతీయులు

1 మనుషుల నుండో, ఒక మనిషి ద్వారానో కాకుండా యేసుక్రీస్తు ద్వారా,+ మృతుల్లో నుండి ఆయన్ని బ్రతికించిన తండ్రైన దేవుని ద్వారా+ అపొస్తలునిగా నియమించబడిన పౌలు అనే నేను, 2 నాతో ఉన్న సహోదరులందరూ గలతీయలోని సంఘాలకు రాస్తున్న ఉత్తరం:

3 మన తండ్రైన దేవుడు, అలాగే ప్రభువైన యేసుక్రీస్తు మీకు అపారదయను, శాంతిని అనుగ్రహించాలి. 4 మన తండ్రైన దేవుని ఇష్టప్రకారం+ మనల్ని ఈ దుష్ట వ్యవస్థ*+ నుండి కాపాడడానికి యేసుక్రీస్తు మన పాపాల కోసం తనను తాను అర్పించుకున్నాడు.+ 5 దేవునికి యుగయుగాలు మహిమ కలగాలి. ఆమేన్‌.

6 క్రీస్తు అపారదయతో మిమ్మల్ని పిలిచిన దేవుణ్ణి మీరు ఇంత త్వరగా వదిలేసి వేరే మంచివార్త వైపు తిరగడం+ చూస్తుంటే నాకు చాలా ఆశ్చర్యంగా ఉంది. 7 అంటే, వేరే మంచివార్త ఉందని కాదు; బదులుగా క్రీస్తు గురించిన మంచివార్తను తప్పుగా చిత్రీకరిస్తూ మిమ్మల్ని పక్కదారి పట్టించాలని అనుకుంటున్నవాళ్లు కొందరు ఉన్నారు.+ 8 అయితే, మేము గానీ పరలోకం నుండి వచ్చిన ఒక దేవదూత గానీ, మేము మీకు ప్రకటించిన మంచివార్తకు భిన్నమైన దాన్ని మంచివార్తలా మీకు ప్రకటిస్తే, అతను శాపగ్రస్తుడు. 9 నేను ముందు చెప్పాను, ఇప్పుడు మళ్లీ చెప్తున్నాను: మీరు అంగీకరించిన మంచివార్తకు భిన్నమైన దాన్ని మంచివార్తలా ప్రకటించేవాళ్లు ఎవరైనాసరే, వాళ్లు శాపగ్రస్తులు.

10 నిజానికి, ఇప్పుడు నేను మనుషుల్ని మెప్పించడానికి ప్రయత్నిస్తున్నానా, దేవుణ్ణి మెప్పించడానికి ప్రయత్నిస్తున్నానా? లేదా నేను మనుషుల్ని సంతోషపెట్టడానికి ప్రయత్నిస్తున్నానా? నేనింకా మనుషుల్నే సంతోషపెడుతుంటే గనుక క్రీస్తు దాసుణ్ణి కాను. 11 సహోదరులారా, మీరు ఒక విషయం తెలుసుకోవాలని కోరుకుంటున్నాను. అదేమిటంటే, నేను మీకు ప్రకటించిన మంచివార్త మనుషుల నుండి వచ్చింది కాదు;+ 12 ఎందుకంటే, నేను దాన్ని మనుషుల నుండి పొందలేదు, మనుషులు దాన్ని నాకు బోధించలేదు, బదులుగా యేసుక్రీస్తే స్వయంగా దాన్ని నాకు బయల్పర్చాడు.

13 నేను అంతకుముందు యూదా మతంలో ఉన్నప్పుడు+ ఎలా ఉండేవాడినో మీరు విన్నారు. అప్పట్లో నేను దేవుని సంఘాన్ని తీవ్రంగా హింసిస్తూ నాశనం చేస్తూ వచ్చాను;+ 14 నా పూర్వీకుల సంప్రదాయాల పట్ల నేను ఎంతో ఉత్సాహం చూపించేవాణ్ణి.+ అందువల్ల యూదా మతాన్ని అనుసరించే విషయంలో నా వయసు ఉన్న చాలామంది యూదుల కన్నా నేను ఎంతో ముందుండేవాణ్ణి. 15 కానీ తల్లి గర్భం నుండి నన్ను బయటికి తెచ్చి, తన అపారదయతో నన్ను పిలిచిన దేవుడు+ 16 నేను తన కుమారుని గురించిన మంచివార్తను అన్యజనులకు ప్రకటించేలా+ నా ద్వారా ఆయన్ని బయల్పర్చడం మంచిదని అనుకున్నప్పుడు, నేను వెంటనే ఏ మనిషినీ సంప్రదించలేదు; 17 లేదా నాకంటే ముందు అపొస్తలులైన వాళ్లను కలవడానికి యెరూషలేముకు వెళ్లలేదు; బదులుగా నేను అరేబియాకు వెళ్లాను, తర్వాత దమస్కుకు+ తిరిగొచ్చాను.

18 మూడు సంవత్సరాల తర్వాత, నేను కేఫాను*+ కలవడానికి యెరూషలేముకు వెళ్లి+ 15 రోజులు అతని దగ్గర ఉన్నాను. 19 ప్రభువు తమ్ముడైన యాకోబును+ తప్ప మిగతా అపొస్తలుల్లో ఎవ్వర్నీ నేను చూడలేదు. 20 నేను మీకు రాస్తున్న సంగతులు అబద్ధాలు కావని దేవుని ముందు మీకు హామీ ఇస్తున్నాను.

21 తర్వాత నేను సిరియా, కిలికియ ప్రాంతాలకు వెళ్లాను.+ 22 అయితే అప్పటికి, యూదయలో ఉన్న క్రీస్తు సంఘాలు నన్ను చూడలేదు. 23 కానీ వాళ్లు ఆ నోటా ఈ నోటా ఈ మాట వినేవాళ్లు: “గతంలో మనల్ని హింసించిన వ్యక్తి,+ తాను ఏ విశ్వాసాన్నైతే నాశనం చేస్తూ వచ్చాడో+ ఇప్పుడు అదే విశ్వాసం గురించిన మంచివార్తను ప్రకటిస్తున్నాడు.” 24 అలా వాళ్లు నా కారణంగా దేవుణ్ణి మహిమపర్చడం మొదలుపెట్టారు.