సంఖ్యాకాండం

12 మోషే కూషీయురాలిని పెళ్లి చేసుకున్నాడని+ మిర్యాము, అహరోను అతనికి వ్యతిరేకంగా మాట్లాడడం మొదలుపెట్టారు. 2 వాళ్లు ఇలా అంటూ ఉన్నారు: “యెహోవా మోషే ద్వారా మాత్రమే మాట్లాడాడా? మా ద్వారా కూడా మాట్లాడాడు కదా?”+ యెహోవా ఆ మాటల్ని వింటూ ఉన్నాడు.+ 3 మోషే, భూమ్మీద ఉన్న వాళ్లందరిలోకెల్లా అత్యంత సాత్వికుడు.*+

4 యెహోవా ఉన్నట్టుండి మోషే, అహరోను, మిర్యాములతో, “మీరు ముగ్గురూ ప్రత్యక్ష గుడారం దగ్గరికి రండి” అన్నాడు. దాంతో ఆ ముగ్గురూ అక్కడికి వచ్చారు. 5 అప్పుడు యెహోవా మేఘస్తంభంలో దిగివచ్చి+ గుడారపు ప్రవేశ ద్వారం దగ్గర నిలబడి అహరోనును, మిర్యామును పిలిచాడు. వాళ్లిద్దరూ ముందుకు వెళ్లారు. 6 ఆయన వాళ్లతో ఇలా అన్నాడు: “దయచేసి నా మాటలు వినండి. మీ మధ్య యెహోవా ప్రవక్త ఎవరైనా ఉంటే, నేను ఎవరన్నది అతనికి ఒక దర్శనంలో+ తెలియజేస్తాను, కలలో+ నేను అతనితో మాట్లాడతాను. 7 కానీ నా సేవకుడైన మోషే విషయం అలాకాదు! నా ఇల్లంతటి మీద అతనికి అధికారం ఇచ్చాను.*+ 8 ముఖాముఖిగా నేను అతనితో మాట్లాడతాను;+ పొడుపుకథలతో కాకుండా స్పష్టంగా అతనితో మాట్లాడతాను; యెహోవా ప్రత్యక్షతను అతను చూస్తాడు. అలాంటిది, నా సేవకుడైన మోషేకు వ్యతిరేకంగా మాట్లాడడానికి మీరెందుకు భయపడలేదు?”

9 కాబట్టి యెహోవా కోపం వాళ్లమీద రగులుకుంది, ఆయన వాళ్ల దగ్గర నుండి వెళ్లిపోయాడు. 10 మేఘం గుడారం పైనుండి దూరంగా వెళ్లిపోయింది; అప్పుడు ఇదిగో! మిర్యాముకు కుష్ఠువ్యాధి వచ్చింది, అది మంచు అంత తెల్లగా ఉంది.+ అహరోను మిర్యాము వైపు తిరిగినప్పుడు, ఆమె కుష్ఠువ్యాధితో శిక్షించబడిందని గమనించాడు.+ 11 వెంటనే అహరోను మోషేతో ఇలా అన్నాడు: “నా ప్రభువా, నిన్ను వేడుకుంటున్నాను! ఈ పాపాన్ని బట్టి మా మీదికి శిక్ష రానివ్వకు! మేము చాలా తెలివితక్కువ పని చేశాం. 12 దయచేసి ఆమెను, చనిపోయి సగం కుళ్లిన శరీరంతో పుట్టిన బిడ్డలా ఇలాగే ఉండిపోనివ్వకు!” 13 అప్పుడు మోషే, “దేవా, దయచేసి ఆమెను బాగుచేయి! దయచేసి ఆమెను బాగుచేయి!” అని యెహోవాను వేడుకోవడం మొదలుపెట్టాడు.+

14 అప్పుడు యెహోవా మోషేతో ఇలా అన్నాడు: “ఒకవేళ ఆమె తండ్రి ఆమె ముఖం మీద ఉమ్మేస్తే, ఆమె ఏడురోజుల పాటు ఆ అవమానాన్ని మోస్తుంది కదా? ఏడురోజుల పాటు ఆమెను పాలెం బయట ఉంచాలి,+ తర్వాత ఆమెను పాలెం లోపలికి తీసుకురావచ్చు.” 15 కాబట్టి మిర్యామును ఏడురోజుల పాటు పాలెం బయట ఉంచారు,+ ఆమెను మళ్లీ పాలెంలోకి తీసుకొచ్చే వరకు ఇశ్రాయేలీయులు అక్కడి నుండి బయల్దేరలేదు. 16 తర్వాత ప్రజలు హజేరోతు+ నుండి పారాను ఎడారికి+ వెళ్లి అక్కడ డేరాలు వేసుకోవడం మొదలుపెట్టారు.