పరిపాలక సభలో కొత్త సభ్యుడు

యెహోవాసాక్షుల పరిపాలక సభలో సేవచేసేందుకు కొత్త సభ్యుడు ఎంపికయ్యాడని 2012 సెప్టెంబరు 5, బుధవారం ఉదయం అమెరికా, కెనడా బెతెల్‌ కుటుంబాల్లో ప్రకటన చేశారు. 2012 సెప్టెంబరు 1 నుండి సహోదరుడు మార్క్‌ సాండర్సన్‌ పరిపాలక సభ సభ్యునిగా సేవచేయడం మొదలుపెట్టాడు.

సహోదరుడు సాండర్సన్‌ అమెరికాలోని కాలిఫోర్నియాలో ఉన్న సాన్‌ డీగోలో ఒక క్రైస్తవ కుటుంబంలో పెరిగాడు, 1975 ఫిబ్రవరి 9న బాప్తిస్మం తీసుకున్నాడు. ఆ తర్వాత 1983 సెప్టెంబరు 1 నుండి కెనడాలోని సస్కత్‌చెవాన్‌లో పయినీరుగా సేవ చేయడం మొదలుపెట్టాడు. 1990 డిసెంబరులో, అమెరికాలో పరిచర్య శిక్షణా పాఠశాల (ఇప్పుడు ‘ఒంటరి సహోదరుల కోసం బైబిలు పాఠశాల’) ఏడవ తరగతి నుండి పట్టభద్రుడయ్యాడు. సహోదరుడు సాండర్సన్‌ 1991 ఏప్రిల్‌లో కెనడాలోని న్యూఫౌండ్‌ల్యాండ్‌ అనే ద్వీపంలో ప్రత్యేక పయినీరుగా నియమితుడయ్యాడు. ప్రత్యామ్నాయ ప్రాంతీయ పర్యవేక్షకునిగా సేవచేశాక ఆయన 1997 ఫిబ్రవరిలో కెనడా బెతెల్‌లో సేవ చేసేందుకు ఆహ్వానాన్ని అందుకున్నాడు. 2000 నవంబరులో, ఆయనను అమెరికాలోని బ్రాంచి కార్యాలయానికి పంపించారు. అక్కడ ఆయన హాస్పిటల్‌ ఇన్ఫర్మేషన్‌ సర్వీసెస్‌లో, ఆ తర్వాత సర్వీస్‌ డిపార్ట్‌మెంట్‌లో సేవచేశాడు.

బ్రాంచి కమిటీ సభ్యుల కోసం ఏర్పాటు చేయబడిన పాఠశాలకు సహోదరుడు సాండర్సన్‌ 2008 సెప్టెంబరులో హాజరయ్యాడు. ఆ తర్వాత ఆయనను ఫిలిప్పీన్స్‌ బ్రాంచి కమిటీ సభ్యునిగా నియమించారు. 2010 సెప్టెంబరులో ఆయనను తిరిగి అమెరికాకు ఆహ్వానించారు. అక్కడ ఆయన పరిపాలక సభలోని సర్వీస్‌ కమిటీకి సహాయకునిగా సేవచేశాడు.