సహానుభూతి చూపించండి

సమస్య

మనకు, వేరేవాళ్లకు మధ్య ఉన్న తేడాల మీదే మనసుపెడితే, ఆ తేడాల్ని వాళ్ల తప్పులుగా లేదా లోపాలుగా చూసే ప్రమాదం ఉంది. దానివల్ల మనకు భిన్నంగా ఉన్నవాళ్లను చిన్నచూపు చూసే అవకాశం ఉంది. ఎదుటివాళ్ల మీద అలాంటి తప్పుడు అభిప్రాయం ఏర్పడితే, మనకు వాళ్ల మీద సహానుభూతి చూపించడం కష్టమౌతుంది. సహానుభూతి చూపించలేక పోతున్నామంటే మనలో వివక్ష అనే జబ్బు ఉన్నట్టే.

బైబిలు సలహా

“సంతోషించేవాళ్లతో సంతోషించండి; ఏడ్చేవాళ్లతో ఏడ్వండి.”—రోమీయులు 12:15.

అంటే . . . ఒక్కమాటలో చెప్పాలంటే, సహానుభూతి చూపించాలి. మనల్ని వేరేవాళ్ల స్థానంలో ఊహించుకుని వాళ్ల బాధను మన బాధలా, వాళ్ల సంతోషాన్ని మన సంతోషంలా భావించడమే సహానుభూతి.

సహానుభూతి చూపించడం వల్ల వచ్చే ప్రయోజనం ఏంటి?

మనం ఎవరి మీదైనా సహానుభూతి చూపించినప్పుడు వాళ్లూ మనలాంటి వాళ్లే అని గుర్తిస్తాం. వాళ్లకూ మనలాంటి భావాలే ఉన్నాయని, వాళ్లూ మనలాగే స్పందిస్తారని అర్థం చేసుకుంటాం. ఏ నేపథ్యం వాళ్లయినా సరే, మనుషులంతా ఒకే కుటుంబమని గుర్తించేలా సహానుభూతి సహాయం చేస్తుంది. వాళ్లు ఏయే విషయాల్లో మనలా ఉన్నారో ఆలోచించినప్పుడు వాళ్ల మీద మనకు మంచి అభిప్రాయం ఏర్పడుతుంది.

అంతేకాదు సహానుభూతి ఉంటే వేరేవాళ్లను గౌరవిస్తాం. సెనెగల్‌ దేశానికి చెందిన ఆన్‌-మేరీ ఒకప్పుడు, తక్కువ కులం వాళ్లను చిన్నచూపు చూసేది. అయితే సహానుభూతి అనే లక్షణం తనకెలా సహాయం చేసిందో ఆమె వివరిస్తోంది: “వాళ్లు ఎన్ని ఇబ్బందులు పడుతున్నారో చూసి, వాళ్ల స్థానంలో ఉంటే నాకెలా అనిపిస్తుందో ఊహించుకున్నాను. అసలు నేను ఏవిధంగా వాళ్లకన్నా గొప్ప, వాళ్లు ఏవిధంగా నాకన్నా తక్కువ అని ఆలోచించాను. ఈ కులం నేను ఎంచుకున్నదీ కాదు, ఈ హోదా నేను సంపాదించుకున్నదీ కాదు.” అవును, వేరేవాళ్ల కష్టాల్ని అర్థంచేసుకోవడానికి ప్రయత్నించినప్పుడు, వాళ్లను విమర్శించే బదులు సహానుభూతి చూపిస్తాం.

మీరేం చేయవచ్చు?

ఏదైనా ఒక వర్గం వాళ్ల మీద మీకు చెడు అభిప్రాయం ఉంటే, వాళ్లు ఏ విషయాల్లో మీలా లేరో ఆలోచించే బదులు వాళ్లు ఏ విషయాల్లో మీలా ఉన్నారో ఆలోచించండి. ఉదాహరణకు, ఈ సందర్భాల్లో వాళ్లకెలా అనిపిస్తుందో ఊహించండి:

• కుటుంబంతో కలిసి భోజనం చేస్తున్నప్పుడు

• రోజంతా కష్టపడి పనిచేసిన తర్వాత

• స్నేహితులతో సమయం గడుపుతున్నప్పుడు

• ఇష్టమైన పాటలు వింటున్నప్పుడు

తర్వాత, వాళ్ల స్థానంలో మిమ్మల్ని ఊహించుకోండి. ఈ ప్రశ్నలు వేసుకోండి:

• ‘ఎవరైనా నన్ను చిన్నచూపు చూస్తే నాకెలా అనిపిస్తుంది?’

• ‘వేరేవాళ్లు నా గురించి తెలుసుకోకుండానే ఒక అభిప్రాయానికి వచ్చేస్తే నాకెలా ఉంటుంది?’

• ‘నేనూ ఆ వర్గం వాడినే అయితే, ఇతరులు నాతో ఎలా ప్రవర్తించాలని కోరుకుంటాను?’