సృష్టికర్తకు మనమీద ప్రేమ, శ్రద్ధ ఉన్నాయి

1. మన సృష్టికర్త సూర్యుణ్ణి ఉదయింపజేస్తున్నాడు

సూర్యకాంతి లేని భూమిని మీరు ఊహించుకోగలరా? సూర్యుని శక్తితోనే చెట్లు ఆకుల్ని, పువ్వుల్ని, పండ్లను, విత్తనాల్ని ఇస్తున్నాయి. అంతేకాదు, ఆ శక్తితోనే అవి వేర్ల ద్వారా నేలలోని నీటిని పీల్చుకుని ఆకులన్నిటికీ సరఫరా చేస్తున్నాయి, తర్వాత ఆ నీటిని ఆవిరి రూపంలో గాల్లోకి వదులుతున్నాయి.

2. మన సృష్టికర్త వర్షం కురిపిస్తున్నాడు

వర్షం మనకు దేవుడిచ్చిన ఒక అద్భుతమైన వరం. దానివల్లే భూమ్మీద పంటలు పండుతున్నాయి. దేవుడు ఆకాశం నుండి వర్షాల్నీ, పుష్కలంగా పంటనిచ్చే రుతువుల్నీ ఇస్తూ ఆహారంతో మనల్ని సంతృప్తిపరుస్తున్నాడు, మన హృదయాల్ని సంతోషంతో నింపుతున్నాడు.

3. మన సృష్టికర్త ఆహారాన్ని, బట్టల్ని ఇస్తున్నాడు

చాలామంది తండ్రులు తమ కుటుంబానికి సరిపడా ఆహారాన్ని, బట్టల్ని సమకూర్చగలమో లేమో అని ఆందోళనపడుతున్నారు. లేఖనాలు ఏం చెప్తున్నాయో పరిశీలించండి: “ఆకాశపక్షుల్ని బాగా గమనించండి; అవి విత్తవు, కోయవు, గోదాముల్లో పోగుచేసుకోవు, అయినా మీ పరలోక తండ్రి వాటిని పోషిస్తున్నాడు. మీరు వాటికన్నా విలువైనవాళ్లు కారా?”—మత్తయి 6:25, 26.

‘గడ్డిపూలు ఎలా పెరుగుతాయో జాగ్రత్తగా గమనించండి; తన పూర్తి వైభవంతో ఉన్న [రాజైన] సొలొమోను కూడా ఈ పూలలో ఒకదానంత అందంగా అలంకరించబడలేదని నేను మీతో చెప్తున్నాను. ఇవాళ ఉండి రేపు పొయ్యిలో వేయబడే గడ్డిమొక్కలనే దేవుడు అలా అలంకరిస్తున్నాడంటే, ఆయన మీకు తప్పకుండా బట్టలు ఇస్తాడు కదా?’—మత్తయి 6:28-30.

మనకు ఆహారాన్నీ బట్టల్నీ ఇవ్వగల దేవుడు, మన మిగతా అవసరాల్ని తీర్చుకోవడానికి కూడా సహాయం చేయగలడు. మనం దేవునికి నచ్చినట్టు జీవిస్తే, ఆహారాన్ని పండించడానికి మనం చేసే కృషిని ఆయన దీవిస్తాడు, లేదా కుటుంబాన్ని పోషించుకోవడానికి కావల్సిన ఉద్యోగం దొరికేలా సహాయం చేస్తాడు.—మత్తయి 6:32, 33.

సూర్యుడు, వర్షం, పక్షులు, పువ్వుల గురించి ఆలోచించినప్పుడు దేవున్ని ప్రేమించడానికి మనకు ఎన్నో కారణాలు దొరుకుతాయి. తర్వాతి ఆర్టికల్‌లో, మన సృష్టికర్త తన సందేశాన్ని మనుషులకు ఏ విధంగా తెలియజేశాడో చూస్తాం.