8, 9. మొదటి పేతురు 5:6-11 నుండి మనం ఏ ఓదార్పును పొందవచ్చు?

⁸ పేతురు యింకా యిలా అన్నాడు: “దేవుడు తగిన సమయమందు మిమ్మును హెచ్చించునట్లు ఆయన బలిష్ఠమైన చేతిక్రింద దీనమనస్కులై యుండుడి. ఆయన మిమ్మును లక్ష్యపెడుతున్నాడు గనుక మీ చింత యావత్తు ఆయనమీద వేయుడి. నిబ్బరమైన బుద్ధి గలవారై మెలకువగా ఉండుడి; మీ విరోధియైన అపవాది గర్జించు సింహమువలె ఎవరిని మ్రింగుదునా అని వెదకుచు తిరుగుచున్నాడు. లోకమందున్న మీ సహోదరులయందు ఈ విధమైన శ్రమలే నెరవేరుచున్నవని యెరిగి, విశ్వాసమందు స్థిరులై వానిని ఎదిరించుడి. తన నిత్యమహిమకు క్రీస్తునందు మిమ్మును పిలిచిన సర్వకృపా నిధియగు దేవుడు, కొంచెము కాలము మీరు శ్రమపడిన పిమ్మట, తానే మిమ్మును పూర్ణులనుగాచేసి స్థిరపరచి బలపరచును. యుగయుగములకు ప్రభావమాయనకు కలుగునుగాక. ఆమేన్‌.”—1 పేతురు 5:6-11 (NW).

10. చింతను తగ్గించుకోడానికి సహాయం చేసే ఏ మూడు లక్షణాలను గూర్చి 1 పేతురు 5:6, 7 సూచిస్తుంది?

¹⁰ చింతను ఎదుర్కోడానికి మనకు సహాయం చేయగల మూడు లక్షణాలను 1 పేతురు 5:6, 7 సూచిస్తుంది. ఒకటి దీనత్వం, లేక “దీనమనస్సు.” సహనం కలిగివుండవలసిన అవసరతను సూచిస్తూ 6వ వచనం “తగిన సమయమందు” అనే మాటతో ప్రారంభమౌతుంది. ‘దేవుడు మన యెడల శ్రద్ధ కలిగివున్నాడు’ గనుక మనం నమ్మకంగా మన చింత యావత్తు దేవునిపై వేయవచ్చు అని 7వ వచనం చూపిస్తుంది, ఆ మాటలు యెహోవా యందు దృఢ నమ్మకాన్ని ప్రోత్సహిస్తున్నాయి. కాబట్టి దీనత్వం, సహనం, దేవుని యందు దృఢ నమ్మకం చింతను పోగొట్టుకోడానికి ఎలా మనకు సహాయం చేస్తాయో చూద్దాము.

దీనత్వం ఎలా సహాయం చేయగలదు

11. చింతను ఎదుర్కోడానికి మనకు దీనత్వం ఎలా సహాయం చేయగలదు?

¹¹ మనం దీనత్వం కలిగివుంటే, దేవుని ఆలోచనలు మన స్వంత ఆలోచనలకంటే ఎంతో ఉన్నతమైనవని మనం అంగీకరిస్తాము. (యెషయా 55:8, 9) యెహోవా యొక్క అపరిమితమైన జ్ఞానంతో పోల్చినప్పుడు మన పరిమితమైన ఆలోచనా సామర్థ్యాన్ని గుర్తించడానికి దీనత్వం మనకు సహాయం చేస్తుంది. నీతిమంతుడైన యోబు విషయంలోవలె, ఆయన మనం గ్రహించని విషయాలను చూస్తాడు. (యోబు 1:7-12; 2:1-6) “బలిష్టమైన దేవుని చేతి క్రింద” మనల్ని మనం తగ్గించుకోవడం ద్వారా, సర్వోన్నత సర్వాధిపతికి సంబంధించి మనం మన తక్కువ స్థానాన్ని అంగీకరిస్తున్నాము. తద్వారా ఆయన అనుమతించే పరిస్థితులను ఎదుర్కోడానికి యిది మనకు సహాయం చేస్తుంది. మన హృదయాలు తక్షణ ఉపశమనాన్ని కోరుకోవచ్చు, కాని యెహోవా లక్షణాలు పూర్తి సమతుల్యతను కలిగివున్నాయి గనుక, మన పక్షంగా ఎప్పుడు, ఎలా ప్రవర్తించాలో ఆయనకు కచ్చితంగా తెలుసు. మన చింతలను ఎదుర్కోడానికి ఆయన సహాయం చేస్తాడనే నమ్మకంతో, చిన్న పిల్లలవలె, మనం యెహోవా బలమైన చేతిని పట్టుకుందాము.—యెషయా 41:8-13.

12. హెబ్రీయులు 13:5 నందలి మాటలను మనం దీనంగా అన్వయించుకున్నట్లయితే, వస్తుసంబంధ భద్రతను గూర్చిన చింత ఎలా ప్రభావితం కాగలదు?

¹² దేవుని వాక్యం నుండి ఉపదేశాన్ని అన్వయించుకోడానికి సుముఖత కూడా దీనత్వంలో యిమిడి వుంది, యిది తరచూ చింతను తగ్గిస్తుంది. ఉదాహరణకు, మన చింత వస్తు సంపదల కొరకు మనము పూర్తిగా నిమగ్నమై వుండడం ద్వారా వచ్చినదైతే, మనం పౌలు ఉపదేశం వైపు దృష్టి మళ్లించడం మంచిది: “ధనాపేక్షలేనివారై మీకు కలిగినవాటితో తృప్తిపొంది యుండుడి. నిన్ను ఏమాత్రమును విడువను, నిన్ను ఎన్నడును ఎడబాయను అని [దేవుడు] చెప్పెను గదా.” (హెబ్రీయులు 13:5) అలాంటి ఉపదేశాన్ని వినయంగా అన్వయించుకోవడం ద్వారా, వస్తు సంబంధ భద్రతను గూర్చిన గొప్ప చింతనుండి అనేకులు తమను తాము స్వతంత్రులను చేసుకున్నారు. వారి ఆర్థిక పరిస్థితి మెరుగుపడి యుండక పోవచ్చు, కాని వారికి ఆత్మీయంగా హాని కలిగేలా అది వారి ఆలోచనలను లోపరచుకొనదు.

సహనం యొక్క పాత్ర

13, 14. (ఎ) ఓర్పుతో కూడిన సహనానికి సంబంధించి, యోబు ఏ మాదిరి నుంచాడు? (బి) యెహోవా కొరకు సహనంతో ఎదురు చూడడం మనకు ఏమి చేయగలదు?

¹³ మొదటి పేతురు 5:6 నందలి “తగిన సమయమందు” అనే పదం ఓర్పుతో కూడిన సహనాన్ని గూర్చిన అవసరతను సూచిస్తుంది. కొన్నిసార్లు ఒక సమస్య చాలా కాలం వరకు వుంటుంది, అది చింతను అధికం చేయవచ్చు. ప్రాముఖ్యంగా, అలాంటి పరిస్థితిల్లోనే మనం విషయాన్ని యెహోవా చేతుల్లో విడిచిపెట్ట వలసిన అవసరత వుంటుంది. శిష్యుడైన యాకోబు యిలా వ్రాశాడు: “సహించిన వారిని ధన్యులనుకొనుచున్నాము గదా? మీరు యోబు యొక్క సహనమునుగూర్చి విన్నారు. యెహోవా యిచ్చిన ప్రతిఫలాన్నిబట్టి యెహోవా ఎంతో జాలియు కనికరమును గలవాడని మీరు తెలిసికొని యున్నారు.” (యాకోబు 5:11 NW) యోబు ఆర్థిక నాశనాన్ని అనుభవించాడు, పదిమంది పిల్లలను మరణమందు కోల్పోయాడు, భయంకరమైన రోగంతో బాధపడ్డాడు, అబద్ధ ఆదరణకర్తల చేత తప్పుగా నిందించబడ్డాడు. అలాంటి పరిస్థితుల్లో సహజంగా కనీసం కొంత చింత తప్పకుండా వుంటుంది.

¹⁴ ఏమైనప్పటికీ, ఓర్పుతో కూడిన సహనం విషయంలో యోబు మాదిరికరంగా వున్నాడు. మనం కఠినమైన విశ్వాస పరీక్షను ఎదుర్కుంటున్నట్లయితే, ఆయన చేసినట్లు, మనం ఉపశమనం కొరకు ఎదురు చూడవచ్చు. కాని చివరికి యోబు బాధనుండి ఆయనను విడిపించి, ఆయనను అత్యధికంగా ఆశీర్వదించడం ద్వారా దేవుడు ఆయన పక్షంగా వ్యవహరించాడు. (యోబు 42:10-17) యెహోవా కొరకు ఓర్పుతో ఎదురు చూడడం మన సహనాన్ని పెంచుతుంది, ఆయన యెడల మన భక్తి యొక్క లోతును తెలియజేస్తుంది.—యాకోబు 1:2-4.