ኣብ ኣገልግሎት ክእለትካ ኣመሓይሽ—ንሓደስቲ ኣስፋሕቲ ኣሰልጥን

ኣገዳሲ ዝዀነ ስለምንታይ እዩ፧ ሓደስቲ ደቀ መዛሙርቲ የሱስ፡ “ንዅሉ” እቲ ንሱ ‘ዝኣዘዞም’ ነገራት ኪሕልዉ ይግባእ። እዚ ኸኣ ንኻልኦት ሰባት ሓቂ ምስትምሃር እውን የጠቓልል እዩ። (ማቴ. 28:19, 20) ሓያሎ ሓደስቲ ሰባት ኣብ ቤት ትምህርቲ ቲኦክራስያዊ ኣገልግሎት ኪካፈሉ በቒዖም እዮም፣ ብዘይካዚ፡ ንኣባላት ስድራ ቤቶም ወይ ንፈተውቶም ብዘይ ወግዓዊ መገዲ ይምስክሩሎም ይዀኑ እዮም። ይኹን እምበር፡ ብዛዕባ እቲ ዚምሃርዎ ትምህርቲ ዘለዎም ሞሳ እናዓበየ ምስ ከደ፡ ከምኡ እውን፡ የሆዋ ንዅሎም ሰባት ሓቂ ኺንገሮም ከም ዚደሊ ምስ ፈለጡ፡ ኣብ ኣገልግሎት ወፍሪ ኺካፈሉ ይደልዩ ይዀኑ። (ሮሜ 10:13, 14) ሓደስቲ ሰባት፡ ዘይተጠምቁ ኣስፋሕቲ ኪዀኑ ምስ ተፈቕደሎም፡ መንፈሳዊ ዕቤት ምእንቲ ኺገብሩ ጽቡቕ ስልጠና የድልዮም እዩ።—ሉቃ. 6:40።

እንታይ ክትገብር ኣሎካ፧

ነቲ ሓድሽ ኣስፋሒ፡ ንኺሰብኽን ንኺምህርን ዜድልዮ ሕታማት ኪወስድ ንገሮ። ኣብቲ ንኣገልግሎት እትጥቀመሉ ቦርሳኻ እንታይ ከም እትሕዝ ኣርእዮ፣ ነፍሲ ወከፍ ሕታም እንታይ ዕላማ ኸም ዘለዎ ድማ ግለጸሉ።
ብሓባር ኴንኩም፡ ኣብ ናይ መንግስቲ ኣገልግሎትና ኻብ ዝወጸ ንመርኣያ ዚኸውን ኣቀራርባ መሪጽኩም ተለማመዱ። ነቲ ሓድሽ ኣስፋሒ፡ ነቲ ኣቀራርባ ብናይ ገዛእ ርእሱ ቓላት ኬቕርቦ ኣተባብዓዮ። ኣብታ ቤት ትምህርቲ ኣገልግሎት እትብሃል መጽሓፍ፡ ኣብ ገጽ 82 ተዘርዚሩ ኻብ ዘሎ መልክዕ ኣቀራርባ፡ ኣብ ክልኹም ልሙድ ዝዀነ መሪጽካ፡ ነቲ ኣስፋሒ ኣለማምዶ። ትሕትና ዜንጸባርቕ ኣከዳድናን ኣመለኻኽዓን ኣገዳሲ ምዃኑ ኣጕልሓሉ።—2 ቈረ. 6:3, 4።
ብቐጻሊ ኣሰልጥኖ። ናይ ክሊ ካርታ ኣርእዮ፡ ካብ ቤት ናብ ቤት ኬገልግል ከሎ ብኸመይ መዝገብ ከም ዚሕዝ ድማ ምሃሮ። ንተገደስቲ ብኸመይ ከም ዚምዝግቦም ኣርእዮ። ኣብ ኣገልግሎት ነታ ጉድ ኒውስ ፎር ፒፕል ኦቭ ኦል ኔሽንስ (ንዅሎም ኣህዛብ ዚኸውን ብስራት) ዘርእስታ ንእሽቶ መጽሓፍ ኰነ ነቲ jw.org ዚብሃል ወብ ሳይትና ብኸመይ ከም ዚጥቀመሉ ምሃሮ። ተገዳስነት ዘለዎ ሰብ እንተ ረኺቡ፡ ኪከታተሎ ሓገዞ።—1 ቈረ. 3:6።
ተዓገሶ፡ ንኣዶ። (ምሳ. 25:11) ጽቡቕ ኣብነት ኩኖ። ቅንኣትካን እተርእዮ ብሕታዊ ተገዳስነትን፡ ኣብቲ ቐጺሉ ዘሎ ዓመታት ኣወንታዊ ጽልዋ ኺገብረሉ እዩ።

ኣብዛ ወርሒ እዚኣ፡ ነዚ ፈትኖ፦

ምስ ተምሃራይካ ዄንካ ኣብቲ ኣብ በቤት ዚግበር ምስክርነት ዕየ፣ ናብ ተመላሊስካ ምብጻሕ ወይ ናብ መጽናዕቲ መጽሓፍ ቅዱስ ውሰዶ። ተምሃራይ እንተ ዘይብልካ ግና፡ ብዙሕ ተመክሮ ንዘይብሉ ኣስፋሒ ምሳኻ ኺዓዪ ዓድሞ።