ቅድሚ እቲ በጃ እተገብረ ሕድገት ሓጢኣት

በቲ የሱስ ብደሙ ዝኸፈሎ በጃ ኣቢልና ጥራይ ኢና ሕድገት ሓጢኣት ክንረክብ እንኽእል። (ኤፌ. 1:7) ኰይኑ ግና፡ መጽሓፍ ቅዱስ፡ “ኣምላኽ እናተጻወረ ነቲ ቐደም እተገብረ ሓጢኣት ብምሕዳግ” ይብል እዩ፣ እዚ ድማ ብዛዕባ እቲ የሱስ በጃ ቕድሚ ምኽፋሉ እተገብረ ሓጢኣት እዩ ዜመልክት ነይሩ። (ሮሜ 3:25) ብኸመይ እዩ የሆዋ ነቲ ቕድሚ እቲ በጃ እተገብረ ሓጢኣት ሕድገት እናገበረ ኽነሱ ፍጹም መለክዒታት ፍትሑ ኺሕሉ ዝኸኣለ፧

የሆዋ ኻብቲ ሓደ “ዘርኢ” ነቶም ዚኣምኑ ደቂ ሰብ ከም ዜድሕኖም ዝወሰነሉ ህሞት ኣትሒዙ፡ እቲ በጃ ኸም እተኸፍለ ገይሩ እዩ ዚርኢ ነይሩ። (ዘፍ. 3:15፣ 22:18) ብግዜኡ እቲ ሓደ ወዱ ብፍታዉ በጃ ኸም ዚኸፍል ከኣ፡ ምሉእ ብምሉእ ርግጸኛ እዩ ነይሩ። (ገላ. 4:4፣ እብ. 10:7-10) የሱስ ኣብ ምድሪ ተወካሊ ኣምላኽ ኰይኑ ኣብ ዝመጸሉ እዋን፡ እቲ በጃ ገና ኸይተኸፍለ ኸሎ፡ ሓጢኣት ኪሓድግ ስልጣን ነይርዎ እዩ። ብዋጋ እቲ ኣብ መጻኢ ዚኸፍሎ መስዋእቲ ገይሩ ኸኣ ነቶም እምነት ዘለዎም ሰባት ሓጢኣቶም ሓዲግሎም እዩ።—ማቴ. 9:2-6።