2 Mbakorinte

9 Nahan, sha kwagh u tom u nan iwasen sha ci u uicighanmbaiorov la yô, saa me nger ne kwagh sha mi keng ga, 2 gadia m fa ne wa iyol ne mba keghen a kegh, je m ngu kaan ihyagh a anmgbianev mba ken Masedonia sha mi mer, mba ken Akaya kegh iyol u wasen kuma inyom hegen, shi gbashima wen la na yô, mbagenev kpishi ken a ve seer zuan a ishimataver. 3 Kpa m ngu tindin anmgbianev, sha er ihyagh i se lu kaan sha kwagh u ne er sha gbaa ne la ia lu gbilinkwagh ga, shi né wa iyol ne lu keghen a kegh vough er m kaa a ve mer ne er nahan yô. 4 Gadia aluer mba ken Masedonia va vea mo man ve va nenge ne mba a̱ wa iyol ga yô, se hee, shi ne kpa ne hee, sha ci u jighjigh u se ne ne la. 5 Nahan m nenge yô, ka hange hange u me taver anmgbianev asema ve va hen a ven tsuaa, ve va kohol iyua i ne vande tôndon zwa u nan kpishi la. Nahan se vaan yô, se nenge a iyua i ne ne mgbeghaa la. Kwagh ne una tese ér i kighir ne a kighir ga, kpa ne na ka sha ci u ne mba a ishima i nan kwagh mgbeghaa.

6 Kpa sha kwagh ne yô, or u nana lôô cuku yô, nana sunda cuku, shi or u nana lôô kpishi yô, nana sunda kpishi. 7 Hanma or nana̱ na er nan we ken ishima i nan la vough, i̱ de lu zunguluu ga, shin sha mkighir kpaa ga, gadia or u nan kwagh sar sar nan doo Aôndo ishima.

8 Heela tseegh ga, Aôndo una fatyô u tesen ne erdoo na u sha mhôôn la wuee, sha er kwagh a ban ne ma shighe môm ga, shi ne lu a akaa kpishi a i gbe u ne lu a mi sha u eren hanma tom u dedoo la cii yô. 9 (Ka vough er i nger nahan, ér: “A na kwagh wuee;* a na mbaatsanev. Perapera na una lu gbem sha won.” 10 Nahan Un u ka a na ortanivor ivor kpishi, kua kwaghyan u nana ya la, una na ne ivor i ne lôô yô, man una na ia seer kpishi, shi una wase akaa a dedoo aa due ken ityom yen i perapera la kpishi.) 11 Aôndo ngu nan ne averen kpishi sha er ne fatyô u nan iyua mgbeghaa yô, shi ior vea wuese Aôndo sha ci u iyua yen i se lu va nan mbagenev la; 12 gadia tom u nan iwasen ne ngu sha ci u nan uicighanmbaiorov akaa a kwagh a gbe ve a mi la mgbeghaa tsô ga, kpa shi ua na Aôndo una zua a iwuese kpishi. 13 Tom u nan iwasen ne ua tese ior mba ne lu yô, nahan ior vea wuese Aôndo sha ci u ne mba eren kwagh u ne pasen ken loho u dedoo u sha kwagh u Kristu la, man sha ci u iyua i ne ne mgbeghaa sha ci ve kua ior cii la. 14 Shi né doo ve ishima, nahan vea zamber Aôndo sha ci wen, sha erdoo u sha mhôôn u Aôndo a tese ne kpishi la.

15 Se wuese nen Aôndo er a ne se iyua i i doo je i gande u ôron ne yô.