2 Timoteu

4 M ngu kaan a we sha ishigh ki Aôndo man Kristu Yesu, un u a lu ôron mbaumav man mbakpenev ijir sha shighe u una va hii u hemen ken Tartor na la, mer: 2 Pasen loho u Aôndo; pasen u nduuluu,* sha ashighe a doon man sha ashighe a i taver kpaa; kôôm ior, taan ve icin taveraa, shi waan ve kwagh a ishima i wan tsung man sha inja i or u fan ityesen. 3 Gadia shighe ngu van u ior vea de u keghen ato a ityesen i wang,* vea gema vea tsua mbatesen kpishi sha asaren a ve, sha u ve̱ ngirigh ve ato* yô. 4 Vea tôô ato a ve sha ityesen i mimi kera, vea gema a ver ato sha akaaôron a aiegh. 5 Kpa we yô, lu tsevaa sha akaa cii, waan ishima a ican, er tom u orpasenivangeli,* er tom wou vighe vighe.

6 Mo yô, mba vanden haan mo er ka nagh ku wain nahan, shighe wam u yemen zurum. 7 M nôngo ityav mbi dedoo, m gba ayem m kure, m dondo akaa a se ne jighjigh a mi la. 8 Hegen je i verem injar i i lu sha ci u mbaperapera, i Ter u a lu orjir u perapera la una nam sha iyange shon la, kpa ka mo tseegh ga, kua mba ve lu veren ashe a shighe u una ande la cii.

9 Nôngo sha afatyô wou cii va hen a mo fefa. 10 Gadia Dema undum sha ci u a soo tar* u hegen ne, nahan a yem ken Tesalonika, Keresen di yem ken Galatia, Titu gema yem ken Damatia. 11 Ka Luka tseegh a lu vea mo ye. U vaan yô, vaan vea Marku, gadia ngum a iwasen kpishi ken tom ne. 12 Kpa m tindi Tikiku ken Efese. 13 U vaan yô, vaan a ikyondo i wuhee i yange m undu hen ya u Karepu ken Teroa la, kua uihyurenmbaruamabera, hemban je yô, mba i er sha akôv a inyam la.

14 Alekezanda, or u a varen iwa i togula la, er kwagh a mo vihi je gande. Yehova* una kimbi un injar sha aeren a na. 15 We kpa gba u u wa ikyo sha kwagh na, gadia yange hendan a akaa a se lu ôron la kpoghuloo je.

16 Zum u m lu palegh iyol sha kwa hiihii sha ishigh ki mbahemenev la, or môm va ta ikyaa a mo ga, ve cii ve undum—Aôndo a̱ de ne ve ibo sha kwagh ne ga. 17 Kpa Ter va tile ikyua a mo ivim a agee, sha er me na a pase loho u dedoo kpoghuloo, shi akuraior cii aa ungwa u yô; shi i yimam sha zwa u begha. 18 Shi Ter una warem sha ikyev i hanma kwagh u ifer cii, shi una kuram sha ci u Tartor na u sha. Icivir i lu i na zan zan gbem sha won. Amen.

19 Sugh Prisika man Akwila kua mba hen ya u Onesiforu sha ci wam.

20 Erasetu ngu ken Korinte, kpa m undu Terofimu uange ken Milete. 21 Nôngo sha afatyô wou va cii man shighe u wuhee ye.

Yubulu ngu sughun we, Pudene kpaa, kua Linu man Kelodia man anmgbianev cii.

22 Ter a̱ ver u sha ieren i dedoo i* u lu tesen la. A̱ tese u erdoo na u sha mhôôn la.