Ekesodu

19 Mba ker ken uwer u sha utar, zum u Mbaiserael due ken tar u Igipiti kera la yô, sha iyange shon la je, ve va nyôr hen taaikyôngo u Senai. 2 Ve mough hen Rafidim,+ ve va nyôr hen taaikyôngo u Senai, ve haa afo hen taaikyôngo shon. Iserael haa afo hen ishigh ki uwo la.+

3 Tsô Mose unde za hen Aôndo u mimi la, Yehova lam a na sha uwo la+ kaa a na ér: “Ka kwagh u u ôr ya u Yakob, u kaa a Mbaiserael je ne, 4 ‘Ne ayol a en ne nenge kwagh u m er a Mbaigipiti,+ sha er me tôô ne sha akper a igyuvegh, me va a ven hen a mo la.+ 5 Aluer ne mba ungwan imo yam vindi vindi, shi ne mba kuran ikyuryan yam yô, ken ior mba sha won cii,+ ka ne ne hingir kwagh wam jim* ye, sha ci u tar cii ka u wam.+ 6 Ne hingir mo tartor u upristi man icighanikyurior.’+ Ka kwagh u u za ôr Mbaiserael je ne.”

7 Nahan Mose yem za yila mbatamen mba nongoior la, a ôr ve akaa a Yehova ôr un la cii.+ 8 Been yô, ior cii gba zwa môm, ve kaa ér: “Akaa a Yehova ôr cii se er.”+ Tsô Mose hide fese za ôr Yehova kwagh u ior ôr la. 9 Tsô Yehova kaa a Mose ér: “Nenge! m ngu van her a we ken ibyeenegh ki iligh, sha er ior vea ungwa zum u m lu lamen a we, man sha er we kpa vea naan we jighjigh hanma shighe yô.” Maa Mose ôr Yehova mkaanem ma ior ôr la.

10 Yehova maa kaa a Mose ér: “Za hen ior, za wanger ve nyian man kper, ve kire akondo a ve. 11 Ve wa iyol ve keghen iyange i sha utar la, sha ci u sha iyange i sha utar la Yehova una sen sha Uwo u Senai, sha ashe a ior cii. 12 Ver ior akighir i ningir uwo ne i tser, shi kaa ior wer, ‘Wa nen ikyo, or môm nana de unden sha uwo ne shin nana benden a itine i u ga. Antior u nan bende a uwo ne yô, a wua nan kpee je. 13 Or a de benden nan uwegh iyol ga, kpa i ta nan awen, gayô i tume nan kwagh.* A lu zendenya shin or kpaa, nana lu uma ga.’+ Kpa shighe u korough ku iyôngo ku gbe imo yô,+ ve unde ve va sha uwo.”

14 Maa Mose hungwa sha uwo la va kohol ior, tsô a gba wanger ior, shi ve kire akondo a ve kpaa.+ 15 Shi a kaa a ior ér: “Wa nen iyol keghen nen iyange i sha utar la. Or a de tse a kwase ga.”*

16 Ka va kom iyange i sha utar la pepe yô, idyuran lu duran shi inyiar lu nyiar, ibyeenegh ki yuhwan+ lu sha uwo la, shi korough lu kaan imo taver taver, ior mba ve lu ken afo cii gba gbidyen akarkase iyol.+ 17 Tsô Mose due a ior ken afo ér ve za kohol Aôndo u mimi la, nahan ve za tile hen itinewoogh la. 18 Mnyim kpurum sha Uwo u Senai la, sha ci u Yehova sen va tema sha u ken usu;+ u lu duen mnyim kôndon er ka mnyim ma ken atse nahan, uwo la cii lu tenger sha agee.+ 19 Er imo i korough kura lu taver seer a seer la, Mose ôr kwagh, maa imo i Aôndo u mimi la vengese.

20 Nahan Yehova sen va tema sha ityough ki Uwo u Senai. Yehova maa yila Mose sha ityough ki uwo la. Tsô Mose kôndo sha mi.+ 21 Yehova maa kaa a Mose ér: “Hungwa za ta ior mbara icin wer, ve de nôngon ér saa vea sendegh a kar a va nenge a Yehova ga, gayô ve kpishi vea tim. 22 Shi kaa upristi mba ve ve ikyua a Yehova hanma shighe la wer, ve wanger ayol a ve sha er Yehova una tsaha ve ga yô.”+ 23 Mose maa kaa a Yehova ér: “Ior mbara vea fatyô u unden sha Uwo u Senai ne ga, sha ci u u vande tan se icin u kaa wer, ‘Ver akighir hen uwo ne, shi tsegha u kpaa.’”+ 24 Nahan kpa, Yehova kaa a na ér: “Sen za, za hide va, we vea Aron, kpa de den upristi man ior mbara wer ve sendegh ér saa vea kar vea kôndo a va hen Yehova ga, sha er una tsaha ve ga yô.”+ 25 Nahan Mose hungwa za hen ior mbara za ôr ve.