Orpasenkwagh

11 Kende kwaghyan wou sha zarmnger,+ gadia ayange a kar kpishi yô u hide shi u zua a mi.+ 2 Kar kwar na iorov utaankaruhar, shin anigheni je kpaa,+ gadia u fa ican i ia va va sha tar ga.*

3 Aluer abeen iv a mngerem yô, aa nôô ura sha tar; man aluer kon gba ken imbusutariyan shin ken imbusutarimese yô, ijiir i kon la u gbe la, ka her ua lu ye.

4 Or u nan ver ishima sha ahumbe yô, nana lôô kwagh ga, or u nan kenger abeen kpaa, nana sunda ga.+

5 Er u fe gbenda u jijingi a eren tom ken akuhe a wan u ken uya ga nahan,*+ kape u fe ityom i Aôndo u mimi u a eren akaa cii la ga je la.+

6 Lôô ivor you pepe, shi de deen wer uwegh ough ku mem ga zan zan aikighe;+ gadia u fa i ia doo la ga, a lu i ngin shin i ngila shin a lu u i cii ia doo kpa u fa ga.

7 Iwanger doo, shi doo u ashe aa nenge a iyange. 8 Aluer or tsa anyom kpishi yô, i saan nan iyol ken a cii.+ Kpa shi nana umbur ér ayange a imegh aa fatyô u lun kpishi; akaa a a lu van la cii ka agbilinakaa.+

9 We gumor, ember shighe u u lu iyev ne, shi i saan ishima you iyol sha ayange a iyev ou. Dondo igbenda i ishima you, shi za ape ashe a ou a tese u la cii; kpa fa wer Aôndo u mimi la una va ôr u ijir* sha akaa ne cii.+ 10 Nahan dugh akaa a zan iyol ken ishima you kera, shi kar a akaa a vihin sha iyol you sha, gadia iyev man gbong gbong u gumor cii ka gbilinkwagh.+