Samuel u Hiihii
16 Shighe kar yô, Yehova kaa a Samuel ér: “U zungwe sha kwagh u Saulu a kuma shighe nan je?+ Gadia m venda un u teman tor sha Iserael.+ Haa mkurem ken korough ough poo+ yem. Me tindi u hen Yese,+ Orbetelehem, sha ci u m tsua môm ken ônov nav mba nomso mer nana lu tor wam.”+ 2 Kpa Samuel pine ér: “Me er nan ve me zaa? Aluer Saulu ungwa kwagh ne yô, una wuam.”+ Yehova gema kaa ér: “Kôr gumbua za a mi za kaa wer, ‘M va mer me na Yehova nagh.’ 3 Nahan lôhô Yese a va hen ijiir i u lu nan nagh la; maa me ôr u kwagh u u er yô. Shi shighe un u me tese u la mkurem sha ci wam kpee je.”+
4 Tsô Samuel er kwagh u Yehova kaa la. Za nyer ken Betelehem,+ mbatamen mba ken gar la mba zough ishigh a na yô, ve gba gbidyen akarkase iyol, pinen ér: “U va ka bem je kpa?” 5 Samuel gema kaa ér: “M va ka bem. M va mer me na Yehova nagh. Wanger nen ayol a en, dondom nen se yem hen ijiir i m lu za nan nagh la.” Maa a wanger Yese man ônov nav mba nomso, been yô, a yem a ve hen ijiir i lu u una za na nagh la. 6 Mba za nyer, nengen a Eliabi+ yô, a kaa ér: “Ka un u Yehova a shigh un mkurem jighilii je a til sha ishigh nagh heen ne.” 7 Kpa Yehova kaa a Samuel ér: “De veren ishima sha mluashe na man ityaven na ga,+ sha ci u m venda un. Gadia gbenda u orumace nan nengen kwagh la kaha a gbenda u Aôndo a nengen la, sha ci u orumace yô, ka nan nenge i lu kwagh u ashe a nengen a mi la, kpa Yehova yô, ka a nenge a kwagh u a lu ken ishima la.”+ 8 Yese maa yila Abinadabi+ va a na sha ishigh ki Samuel, kpa a kaa ér: “Ngun kpa Yehova tsua un ga.” 9 Mba been yô, Yese va a Shama,+ kpa Samuel kaa ér: “Ngun kpa Yehova tsua un ga.” 10 Nahan Yese va a ônov nav mba nomso utaankaruhar sha ishigh ki Samuel, kpa Samuel kaa a Yese ér: “Mô ve môm kpa Yehova tsua nan ga.”
11 Ken masejime yô, Samuel pine Yese ér: “Ka ônov ou mba nomso cii nee?” Yese gema kaa a na ér: “U kiriki la+ ngu a va heen ga zan zan hegen; ngu kuran iyôngo.”+ Maa Samuel kaa a Yese ér: “Tindi i za va a na sha ci u se tema inya u yan kwagh ga zan zan saa una va heen.” 12 Tindin mba ve a na yô, a nyôr a na ker. Un lu nyianor, doo ashe ikyôr shi kuma ashe.+ Maa Yehova kaa ér: “Ka un je ne, mough sha, shighe un mkurem!”+ 13 Tsô Samuel tôô korough ku mkure kura,+ shighe un mkurem sha ishigh ki anmgbianev nav mba nomso mbara. Maa jijingi u Yehova gba nan Davidi agee, hii sha iyange la je zan zan yem ken hemen.+ Maa Samuel va mough yem ken Rama.+
14 Tsô jijingi u Yehova undu Saulu,+ nahan jijingi u bo gema due hen Yehova lu za tan un mciem iyol.+ 15 Mbatomov mba Saulu kaa a na ér: “U nenge yô, jijingi u bo due hen Aôndo ngu va tan we mciem iyol. 16 Nahan ter wase una lumun yô, a ôr mbatomov nav mba ve til un sha ishi ne, ve ker or u nan fe adiguve u kuhwan tsembelee yô.+ Shighe u jijingi u bo a dugh hen Aôndo a ve hen a we yô, nan kuhwa, nahan i lu u guda.” 17 Maa Saulu kaa a mbatomov nav ér: “Yô, za ker nen or u nan fe adiguve u kuhwan tsembelee yô, va nen a nan hen a mo.”
18 Môm ken mbatomov mbara gema kaa ér: “Nenge! Ka m nenge wan u Yese, Orbetelehem la a kuhwan kwagh, a fa kwaghkuhwan tsembelee shi ka or u taver ishima man orutya u ageegh.+ A fa iliam shi a doo or+ shi Yehova ngu a na.”+ 19 Saulu maa tindi mbaôron-loho hen Yese ér ve za kaa ér: “Na wan wou Davidi u a lu kuran ilev la a va hen a mo.”+ 20 Tsô Yese tôô beredi man wain ken ikpa i ikyôv man anivo kange sha jaki, na wan na Davidi ér a za na Saulu. 21 Maa Davidi hingir u za lun vea Saulu shi eren un tom.+ Davidi doo Saulu ishima tsung, nahan hingir or u tôôn un ikyav mbi utyaav. 22 Tsô Saulu tindi loho hen Yese kaa ér: “Wea lumun yô, de Davidi a za hemen u eren mo tom sha ci u kwagh na doom.” 23 Hanma shighe u jijingi u bo u a dugh hen Aôndo la una va hen Saulu yô, Davidi a tôô adiguve a kuhwa, nahan i pever Saulu iyol, shi i lu un guda, maa jijingi u bo la a undu un.+