U Hiihii hen Mbakorinte
9 M ngu a ian i eren kwagh u m soo la gaa? M ngu apostoli gaa? M nenge a Yesu Ter wase gaa?+ Ne mba kwagh u a dugh ken tom wam u ken Ter ne gaa? 2 Mea lu apostoli sha ci u mbagenev ga je kpa, ne yô, m ngu apostoli sha ci wen jighilii! Gadia ne mba ikyav i tesen ér m ngu apostoli u Ter.
3 Ka kwagh u m lu a mi u ôron mba ve puun mo la je ne: 4 Se mba a ian i yan kwagh shi man kwagh, shin ka nahan ga? 5 Se mba a ian i zenden a kwase u nan jighjigh* u se vese yô,+ er mbaapostoli mbagenev cii, kua anmgbianev mba Ter+ man Kefa*+ ve eren nahan gaa? 6 Shin ka mo man Banaba+ tseegh se lu a ian i den tom u se eren sha u koson ayol a ase la ga ase? 7 Ka hanma orshoja je nana dugh inyaregh ki nan nana er tom shojaa a mi sha wono? Ka an je nana er sule u wain ve nana ya atam a u ga?+ Shin ka an nana kuran ilev je ve nana de man atumba a ilev mbi shono?
8 M ngu ôron akaa ne sha mnenge u oro? Ken Tindi yô i ôr akaa ne gaa? 9 Gadia i nger ken Tindi u Mose ér: “De we bua kper sha zwa zum u a lu shoghor samuyia ga.”+ Ka ibua i gbe Aôndo kwagh yee? 10 Kera ka sha ci wase jighilii a ôr kwagh ne gaa? Jighilii yô, yange i nger kwagh ne lu sha ci wase, sha ci u or u a lu kahan iyiav man or u a lu gbidyen iyiav cii ka i gba u vea er nahan keng a ishimaverenkeghen i zuan a kwagh.
11 Aluer se lôô akaa a ken jijingi hen a ven yô, a lu ne zegekwagh u nan se iwasen sha akaa a iyolough a kwagh a gbe se a mi laa?+ 12 Aluer mbagenev mba a ian i kaan ér ne̱ na ve ambaakaa ne yô, se hemba mban a ian la cii gaa? Nahan cii kpa se ôr ga,+ se mba wan ishima a akaa cii, sha er se yange ior u ungwan loho u dedoo u sha kwagh u Kristu la sha ma gbenda ga yô.+ 13 Ne fa er mba ve eren icighantom la ka ve yaan akaa a ken tempel gaa? Man mba ve eren tom hanma shighe hen atse a nan nagh la yô, mba kera zough a kwar ken akaa a i lu nan sha atse la gaa?+ 14 Nahan kape Ter a ne zwa ér mba ve pasen loho u dedoo la kpa i koson ve sha ci u loho u dedoo u ve pasen la je la.+
15 Kpa m er kwagh môm sha akaa a i nem ian i eren la ga.+ Jighilii yô, m ngu ngeren akaa ne ka sha u i erem kwagh ne ga, gadia guda me kpe—or môm nana fatyô u karen a atôakyaa a m lu a mi a tan ihyagh la kera ga!+ 16 Nahan aluer m ngu pasen loho u dedoo yô, kam ityôkyaa i tan ihyagh ga, sha ci u gba u me er nahan keng. Mimi je, aluer m pase loho u dedoo ga yô, kwagh a tserem!+ 17 Aluer m tsua a ishima yam u eren kwagh ne yô, injar ngi sha ci wam; kpa aluer m ngu eren ka sha ishima yam ga je kpa, gba u me eren her, sha ci u ka tom u i wem sha ikyev yô.+ 18 Nahan injar yam ka nyi? Injar yam yô, ka u pasen loho u dedoo gbilin. Me er nahan yô, me kera kaa mer i̱ nam akaa a m lu a ian i kaan mer i̱ naan mo sha er me pase loho u dedoo la ga.
19 Gadia shin er m lu kpan u or ga nahan kpa, m hingir kpan u ior cii, sha er me yima ior kpishi er m fetyô la yô. 20 Hen Mbayuda yô, m hingir er Oryuda nahan, sha er me yima Mbayuda yô;+ hen mbadondon tindi yô, m hingir er or u dondon tindi nahan, shin er mo iyol yam m lu sha ikyev i tindi ga nahan kpaa, sha er me yima mba ve dondon tindi la yô.+ 21 Hen mba ve dondon tindi ga yô, m hingir er or u dondon tindi ga nahan, shin er mo iyol yam m dondon tindi u Aôndo man u Kristu la nahan kpaa,+ sha er me yima mba ve dondon tindi ga la yô. 22 Hen mba gban kera yô, m hingir or u gban kera, sha er me yima mba gban kera yô.+ M er hanma kwagh u m fetyô cii sha u wasen hanma injaor cii, sha er me nôngo sha afatyô wam cii me yima mbagenev yô. 23 M ngu eren akaa cii sha ci u loho u dedoo, sha er me pase mbagenev u yô.+
24 Ne kera fa er mbagbanayem cii ka ve yevese, kpa i lu or môm tseegh nan ya iyua gaa? Yevese nen sha gbenda u ne ya iyua la yô.+ 25 Hanma or u nan lu ken gesa u anumbegh* cii ka nan kôr iyol i nan tsaha sha akaa cii. Ve ka ve er nahan sha er vea zua a iyua i saan ishe yô,+ kpa se yô, ka sha u zuan a iyua i saan ishe ga la.+ 26 Sha nahan yô, m ngu yevese bema be bema ga;+ m ngu keren azu sha inja, m gbe keren sha ahumbe tsô ga; 27 kpa m ngu gbidyen* iyol yam+ geman i kpan, sha er zum u me pase mbagenev kwagh kera yô, mo iyol yam me gema me yina* ga yô.