Duteronomi

22 “Aluer u nenge bua shin iyôngo i anngôu ngi tsumen yô, de gem ashe kera sha apera ga.+ Hide a mi hen anngôu kpee je. 2 Kpa aluer anngôu la ngu ikyua a we ga shin u fa un ga yô, hide a zendenya la hen ya wou, a va lu her a we zan zan anngôu la una kar va keren un. Maa u hide a mi u na un.+ 3 Kape u er a jaki i anngôu shin ikyondo na shin nyityôkwagh igen i i saa un man u va zough a mi je la. De gem ashe kera ga.

4 “Aluer u nenge jaki shin bua u anngôu gure hen gbenda yô, de gbe karen yemen undun un her nahan ga. Wase un u moughon a zendenya la sha kpee je.+

5 “Kwase nana de huan ikyondo i* nomsoor ga, shi nomsoor kpaa nana de huan ikyondo i* kwase ga. Sha ci u or u nan eren nahan yô, nan ndôhôr Yehova Aôndo wou ishima.

6 “Aluer u za asegh sha iya-inyon hen gbenda, man ngi a ônov shimi shin aji, shi ngô uve sha ônov mbara shin sha aji la yô, a lu sha kon shin a lu hen inya kpaa, de ker ngô la a ônov imôngo ga.+ 7 Pase ngô la a yem, kpa ônov yô u fatyô u kôron. Er kwagh ne sha er kwagh a za a we a doo shi u tsa gbem yô.

8 “Shighe u u maa iyou yô, kase igyar sha haav mbu i,*+ sha er u va a iboawambe sha iyou you sha ci u or osough sha mi va gba shin inya ga yô.

9 “De lôôn ivor atô kposo kposo ahar ken sule wou u wain ga.+ Aluer u er nahan yô, hanma kwagh u ivor la i ume kua kwagh u u zough a mi hen sule u wain la cii, a ngohol a yem a mi hen icighanjiir.

10 “De kangen bua man jaki igbur wer ve kaha kwagh imôngo ga.+

11 “De huan ikyondo i i nungwa mou sha aive i tume ga.+

12 “Er ica sha azongo anyiin a ikyondo you i u huan la.+

13 “Aluer or vôso kwase nan tsa a na, kpa kwase la kera va doo nan ishima ga* 14 nan kaa ér a er dang, nan vihi nan iti sha u kaan ér: ‘M vôso kwase ne, kpa m va tse a na yô, m nenge a ikyav i tesen ér ngu iniuun ga’ yô, 15 ter u wankwase la kua ngô na ve va a ikyav i tesen ér ngu iniuun hen mbatamen hen hundagar. 16 Ter u wankwase la a kaa a mbatamen mbara ér, ‘Yange m na or ne wan wam vôso hingir kwase na, kpa a kera doo un ishima ga,* 17 nahan ngu wan un kwagh iyol ér a er dang, ngu kaan ér: “M zua a ikyav i tesen ér wan wou u kwase ngu iniuun ga.” Man nenge ase, ka ikyav i iniuun i wan wam je ne.’ Maa vea samber ikyondo la sha ishigh ki mbatamen mba hen gar la. 18 Mbatamen mba hen gar la+ maa vea kôr or la vea tsaha+ nan. 19 Vea ya nan zwajirigh sha ushekel* mba azurufa 100. I̱ gema ve i na ter u wankwase la, sha ci u a vihi iniuunkwase i ken Iserael iti,+ shi una lu kwase na her. Mayange a lumun ér a pav a na ga, ken ayange a uma na cii.

20 “Kpa aluer kwagh la ka mimi, ikyav ngi i tesen ér wankwase la yange lu iniuun ga yô, 21 i due a wankwase la i va a na hen hunda u ya u ter na, nomso mba hen gar la ve ta un awen ve wua, sha ci u a er kwagh u kunya+ ken Iserael sha u eren idya* hen ya u ter na.+ Kape u dugh kwaghbo hen atô wou kera la.+

22 “Aluer i kohol or yaven a kwase u orgen yô, ve uhar cii ve kpe kpee, or u a yav a kwase la kua kwase la cii.+ Kape u er ve u dugh kwaghbo ken Iserael kera la.

23 “Aluer or tsôr iniuunkwase man orgen za zua a na ken gar yav a na yô, 24 due nen a ve uhar cii, va nen a ve hen hunda u gar la, va ta nen ve awen ve kpe, wankwase la yô ka sha ci u ngu ken gar kpa a haa vaa ga, or la di ka sha ci u a hee kwase u orgen.+ Kape u dugh iferkwagh ken atô wou kera ne.

25 “Nahan kpa, aluer or la za kohol wankwase u i tsôr un la ka ken toho, man a hemba un agee a yav a na yô, or u a yav a na la a kpe un tswen, 26 kpa wankwase la yô de eren un kwagh ga. Wankwase la er isholibo i kuman ku ga. Kwagh ne ngu vough er or u nan te num sha orgen nan woo nan* nahan.+ 27 Gadia a za kohol wankwase u i tsôr un la ken toho, wankwase la haa vaa kpa or lu u yiman un ga.

28 “Aluer or za kohol iniuunkwase i or lu a tsôr i ga, man nan kôr i nan yav a i man i va fa yô,+ 29 or u nan yav a wankwase shon la, nana na ter na ushekel mba azurufa 50, nahan una hingir kwase u nan.+ Er nan hee un yô, a lumun ér nana pav a na ga, ken ayange a uma u nan cii.

30 “Or môm nana de vôson kwase u ter u nan ga, sha er nana hee ter u nan ga yô.*+